Exodo 16 - Marahay na Bareta Biblia

An Manna asin an mga Pugo

¹ Hale sa Elim, nagpadagos sa pagbaklay an mga Israelita, asin sa ikakinseng aldaw kan ikaduwang bulan pakahale ninda sa Egipto, nakaabot sinda sa kalangtadan nin Sin sa pagultanan kan Elim asin Sinai.

² Duman sa kalangtadan, an gabos na tawo nagreklamo ki Moises asin ki Aaron

³ na an sabi, “Marahay pang ginadan na kami nin Kagurangnan sa Egipto. Duman nakakatukaw pa kami, nakakakakan nin karne asin kan gabos ming magustohan. Alagad dinara mo kami digdi sa kalangtadan tanganing magadan sa gutom.”

⁴ Nagtaram an Kagurangnan ki Moises, “Papauranan ko kamo nin tinapay hale sa langit. Aroaldaw, maruluwas an mga tawo asin matiripon kan magkakanigong pagkakan ninda sa sarong aldaw. Huli kaini maaaraman ko kun masunod sinda kan sakong mga togon o dai.

⁵ Sa ikaanom na aldaw doble kan dati nindang kinukua sa aroaldaw an saindang titiponon asin aandamon.”

⁶ Kaya sinabihan ni Moises saka ni Aaron an mga Israelita, “Ngunyan na banggi maaaraman nindo na an Kagurangnan an nagluwas saindo sa Egipto.

⁷ Sa aga mahihiling nindo an kamurawayan nin Kagurangnan bilang kasimbagan niya sa saindong mga reklamo saiya; huli ta siisay man baya kami na pagreklamohan nindo?”

⁸ Dangan nagsabi pa si Moises, “An Kagurangnan an matao saindo nin makakakan na karne pagkabanggi asin bastanteng tinapay pagkaaga, huli ta nadangog niya an pagreklamo nindo saiya; ta siisay man baya kami? Sa katotoohan, kun kamo nagrereklamo samo, sa Kagurangnan kamo nagrereklamo.”

⁹ Sinabihan ni Moises si Aaron, “Sabihan mo an bilog na komunidad nin mga Israelita na magdigdi asin magtindog sa atubang nin Kagurangnan, huli ta nadangog niya an saindang mga reklamo.”

¹⁰ Kan nagtataram si Aaron sa komunidad nin mga Israelita, sinda gabos nagkiriling sa kalangtadan asin bigla nindang nahiling sa panganoron an kamurawayan nin Kagurangnan.

¹¹ Nagtaram an Kagurangnan ki Moises,

¹² “Nadangog ko an mga reklamo kan mga Israelita. Sabihan mo sinda na pagsolnop kan aldaw magkakaigwa sinda nin karne, asin pagkaaga tatawan ko sinda nin bastanteng tinapay. Dangan mamimidbid ninda na ako an Kagurangnan, iyo an saindang Dios.”

¹³ Pagkabanggi duminagsa an dakul na pugo dangan natahoban an kampo; asin pagkaaga, nahiling an mahibog na ambon sa palibot kan kampo.

^14-15 Kan mawara na an ambon, nahiling kan mga Israelita na an kalangtadan pano nin mahihimpis asin saradit na mga bagay na garo nagbilog na ambon sa daga. Dai ninda aram kun ano idto kaya naghinarapotan sinda, “Ano daw ini?” Nagsabi si Moises, “Iyan an tinapay na itinao nin Kagurangnan na saindong kakakanon.

¹⁶ Ipinagboot nin Kagurangnan na an lambang saro saindo kumua sosog sa pangangaipo niya asin kan saiyang pamilya; duwang litro an lambang saro.”

¹⁷ Ginibo ini kan mga Israelita, may nagkuang dakul, may nagkuang dikit.

¹⁸ Alagad kan takadon ninda ini, an nagkuang dakul dai nin nagsobra, asin an nagkuang dikit dai nin nagkulang. Tama sana nanggad sa saindang pangangaipo an saindang nakua.

¹⁹ Sinabihan sinda ni Moises, “Mayo nin magtada kaiyan para sa aga.”

²⁰ Alagad an nagkapira sainda dai nagtubod ki Moises; nagtada sinda nin tinapay. Pagkaaga, inulod asin nagbata an saindang itinada. Naanggot sainda si Moises.

²¹ Aga-aga, an lambang saro minakua sosog sa pangangaipo niya, asin an mga tinapay na natada sa daga, natutunaw kun mainit na an aldaw.

²² Sa ikaanom na aldaw, doble an tinapay na saindang kinua; apat na litro para sa lambang saro. Nagduman ki Moises an gabos na lider kan komunidad asin sinabi saiya an nangyari.

²³ Sinabihan sinda ni Moises, “Ipinagboot nin Kagurangnan na lutoon na nindo ngunyan an gusto nindong lutoon. An pagkakan na matada isaray nindo para sa masunod na aldaw, huli ta an bilog na aldaw sa aga, aldaw nin pahingalo, sarong banal na Sabbath para sa Kagurangnan.”

²⁴ Arog sa ipinagboot ni Moises sinaray ninda para sa masunod na aldaw an mga natada; dai ini nagbata o inulod.

²⁵ Nagsabi si Moises, “Kakanon nindo iyan ngunyan, huli ta ngunyan iyo an Sabbath, an aldaw nin pahingalo para sa Kagurangnan asin mayo kamong makukuang pagkakan sa luwas.

²⁶ Anom na aldaw kamong makua nin pagkakan, alagad sa ikapitong aldaw, an aldaw nin pahingalo, mayo kamong makukua.”

²⁷ Sa ikapitong aldaw, may mga tawong nagluwas tanganing magkua nin pagkakan alagad mayo sindang nakua.

²⁸ Kaya tinaraman nin Kagurangnan si Moises, “Sagkod nuarin kamo masuhay sa sakong mga togon saka pagboot?

²⁹ Giromdoma nindo na tinawan ko kamo nin aldaw nin pahingalo, kaya sa ikaanom na aldaw tinatawan ko kamo nin pagkakan para sa duwang aldaw. An lambang saro dai maghale sa saiyang lugar asin mayong magluwas sa harong sa ikapitong aldaw.”

³⁰ Kaya dai nagtrabaho an mga tawo sa ikapitong aldaw.

³¹ Manna an inginaran kan mga Israelita sa tinapay. Nakakaarog ini sa sadit asin maputing pisog nin kulantro, dangan garo galyetas na minasa sa dugos an namit kaini.

³² Nagsabi si Moises sa mga tawo, “Ipinagboot nin Kagurangnan na itago ta an ibang manna tanganing mahiling kan satong kapagarakian an tinapay na ipinakakan niya sato sa desyerto pakatapos na iluwas niya kita sa Egipto.”

³³ Nagsabi si Moises ki Aaron, “Kumua ka nin sarong dulay, laogan mo nin duwang litrong manna dangan ibugtak mo sa atubang nin Kagurangnan tanganing sarayon para sa satong kapagarakian.”

³⁴ Siring sa ipinagboot nin Kagurangnan ki Moises, ibinugtak ni Aaron an dulay na igwang manna sa atubangan kan Kaban nin Tipan tanganing sarayon.

³⁵ Sa laog nin kwarentang taon, manna an kinakan kan mga Israelita sagkod na nakaabot sinda sa daga nin Canaan. (

³⁶ An kinaugalean na takad kaidto katimbang nin beynte litros.)