Esther 3 - Marahay na Bareta Biblia

Nagplano si Haman na Gadanon an mga Judio

¹ Pakatapos kan mga pangyayaring ini, ilinangkaw ni Hadeng Jerjes sa katongdan si Haman na aking lalaki ni Hammedata, na sarong Agageo. Ginibo niya ining pangenot na ministro.

² An gabos na opisyal na naglilingkod sa hade nagluluhod saka nagtataong galang ki Haman, huli ta ini an pagboot kan hade. Alagad si Mardokeo dai nagluluhod o nagtataong galang ki Haman.

³ Naghapot saiya an ibang opisyal, “Tadaw ta linalapas mo an pagboot kan hade?”

⁴ Aroaldaw sinasabi ninda ini saiya, alagad habo siyang maghinanyog. Kaya inosip ninda si Mardokeo ki Haman tanganing mahiling kun may halaga an mga tataramon ni Mardokeo; huli ta sinabi kaini na siya sarong Judio.

⁵ Kan mapatotoohan ni Haman na dai nagluhod o nagtaong galang saiya si Mardokeo, naanggot siya nin makuri,

⁶ asin kan naaraman niya na Judio si Mardokeo, naisip niya na bako sanang ini an papadusahan niya. Nagplano siya na ipagadan an lambang Judio sa bilog na imperyo nin Persia.

⁷ Kan ikadoseng taon nin paghahade ni Hadeng Jerjes, kan enot na bulan, an bulan nin Nisan, nagboot si Haman na gibohon an ripa na inapod Purim, tanganing maaraman niya kun anong aldaw saka bulan na dapat gibohon an saiyang plano. An luminuwas iyo an ikatreseng aldaw kan ikadoseng bulan, an bulan nin Adar.

⁸ Dangan nagsabi si Haman ki Hadeng Jerjes, “Igwa nin sarong rasa nin mga tawo na nakawarak sa bilog mong imperyo asin manunumpongan sa lambang probinsya. May sinusunod sindang mga kaugalean na iba kan sa ibang tawo, asin dai ninda kinukuyog an saimong mga katogonan. Mayo sinda nin ibubungang marahay sa saimo kun pabayaan mo sinda.

⁹ Kaya kun pagmarahayon mo, Mahal na Hade, magpaluwas ka nin sarong pagboot na gadanon sinda. Dangan nanunuga ako na mabugtak ako nin tres syentos setenta y singkong tonelada nin plata sa kaban nin yaman kan hade para sa palakaw kan imperyo.”

¹⁰ Hinale kan hade sa saiyang muro an singsing na panselyo asin itinao sa kaiwal kan mga Judio, ki Haman na aking lalaki ni Hammedata, na sarong Agageo.

¹¹ Sinabihan siya kan hade, “Saimo na an kwarta mo asin man an mga tawo. Giboha an boot mong gibohon sainda.”

¹² Kaya kan ikatreseng aldaw kan enot na bulan, ipinaapod an mga sekretaryo kan hade. Isinurat kan mga ini an gabos na pagboot ni Haman para sa mga pamayo saka mga gobernador kan mga probinsya asin para sa mga opisyal sosog sa paagi nin pagsurat kan lambang probinsya asin sosog sa lengwahe kan lambang tawo. Ginibo an surat sa ngaran ni Hadeng Jerjes asin sinelyohan kan singsing niya.

¹³ An mga surat na ini dinara kan mga sinugo sa lambang probinsya kan imperyo. An laog kan mga surat iyo an pagboot na gadanon an gabos na Judio, hoben saka gurang, mga babae sagkod mga aki, sa laog nin sarong aldaw, sa ikatreseng aldaw nin Adar. Daing herak sindang gagadanon asin sasamsaman kan saindang pagsadiri.

¹⁴ An dokumento ihinayag sa publiko sa lambang probinsya tanganing mag-andam an gabos na tawo sa aldaw na nasambit.

¹⁵ Sa pagboot kan hade, nagluwas tolos an mga sugo, asin an dekreto ipinahayag sa Susa, an pangenot na syudad. Mantang maogmang nag-iinoman an hade saka si Haman, nagkariribok an gabos na taga Susa.