Esther 2 - Marahay na Bareta Biblia

Nagin Reyna si Esther

¹ Pakatapos kan mga pangyayaring ini, kan napara na an kaanggotan kan hade, nagiromdoman niya si Vasti saka an ginibo kaini, asin an pagboot niya laban saiya.

² Nagsabi sa hade an nagkapira sa saiyang mga parahatol, “Tadaw ta dai ka magpahanap nin magagayon na hoben na birhen?

³ Pumili ka nin mga opisyal sa lambang probinsya kan imperyo asin pagbotan mo sinda na darahon an gabos na magagayon na hoben na birhen sa saimong harem digdi sa Susa, an pangenot na syudad. An mga babae ibugtak mo sa pangataman ni Hegai, an eunukong namamahala sa saimong mga babae, asin patawan mo sinda nin mga pampagayon na kaipuhan ninda.

⁴ Dangan an babaeng mawilihan mo iyo an gibohon mong reyna na kasalihid ni Vasti.” Nagustohan kan hade an hatol kaya sinunod niya ini.

⁵ Duman sa Susa, igwa nin nag-erok na sarong Judio. Siya iyo si Mardokeo na aking lalaki ni Jair asin makoapo ni Simei, na aking lalaki ni Kis na Benjaminita.

⁶ Saro si Mardokeo sa mga nabihag sa Jerusalem ni Hadeng Nebukadnezzar asin dinara sa Babilon kaiba ni Hadeng Jehoiakin nin Juda.

⁷ Igwa siya nin prima, si Esther, na sa tataramon na Hebreyo an ngaran Hadassa; magayon siyang daraga saka marahay an tindog. Pagkagadan kan mga magurang ni Esther, inampon siya ni Mardokeo asin pinadakula siring sa sadiring aki.

⁸ Kan ipaluwas kan hade an bago niyang pagboot, saro si Esther sa kadakul na daragang tinipon sa Susa. Dinara sinda sa palasyo sa pangangataman ni Hegai, na namamahala kan harem kan hade.

⁹ Nawilihan ni Hegai si Esther asin pinaorog niya ini. Tinawan niya tolos si Esther nin mga pampagayon saka espesyal na kakanon. Tinawan siya ni Hegai kan pinakamarahay na lugar sa harem asin nin pitong babaeng katabang na pinili hale sa palasyo.

¹⁰ Dai sinabi ni Esther na saro siyang Judio huli ta iyo iyan an pasunod saiya ni Mardokeo.

¹¹ Aroaldaw minaduman si Mardokeo sa patyo kan harem tanganing aramon an kamugtakan ni Esther.

¹² An kaugalean na pagpagayon sa mga babae minaabot sa sarong taon—anom na bulan na minamasahe sa lana nin mira asin anom na bulan na binubugtakan nin mga pahamot saka mga pampagayon. Pakatapos kaiyan, saro-saro na dadarahon ki Hadeng Jerjes an mga babae.

¹³ Pagduman kan lambang babae sa palasyo hale sa harem, pwede niyang isulot an anoman na gubing na saiyang mawoton sa pag-atubang sa hade.

¹⁴ Minaduman siya sa banggi, dangan pagkaaga dadarahon siya sa saro pang harem asin ibubugtak sa pangataman ni Saasgaz, an eunukong namamahala sa mga kasaroan kan hade. Dai na siya makakaduman giraray sa hade; makakabalik sana siya kun nawilihan siya kan hade asin apodon an saiyang ngaran.

¹⁵ Nag-abot an aldaw kan pagduman ni Esther sa hade. Si Esther aki ni Abihail asin prima ni Mardokeo, na nag-ampon saiya bilang sadiri kaining aking babae; nawilihan si Esther kan lambang saro na nakahiling saiya. Kan siya na an maduman sa hade, isinulot niya an gubing na ipinasulot saiya ni Hegai, an eunukong namamahala kan harem.

¹⁶ Kaya kan ikapitong taon ni Jerjes bilang hade, kan ikasampolong bulan, an bulan nin Tebet, si Esther inatubang ki Hadeng Jerjes duman sa palasyo.

¹⁷ Nagustohan siya kan hade orog ki sa arin man sa mga babae; nawilihan siya asin namotan kan hade orog ki sa arin sainda. Kaya kinoronahan siya kan hade saka ginibong reyna bilang kasalihid ni Vasti.

¹⁸ Nagtao an hade nin dakulang bangkete sa kaomawan ni Esther asin inalok niya an gabos niyang opisyal saka mga parapamahala. Nagpahayag siya nin pyesta opisyal sa bilog na imperyo asin nanao nin dakul na regalo.

Ilinigtas ni Mardokeo an Hade

¹⁹ Dangan tinawan kan hade si Mardokeo nin sarong halangkaw na katongdan. (

²⁰ Dai pa kaidto ipinapaaram ni Esther na siya sarong Judio, sosog sa pasunod saiya ni Mardokeo; si Esther nagkuyog ki Mardokeo arog kan pagkuyog niya digdi kan siya aki pa.)

²¹ Kan panahon na si Mardokeo igwang katongdan sa palasyo, naanggot ki Hadeng Jerjes si Bigtana saka si Teres, an duwang eunuko na nagbabantay sa agihan pasiring sa mga kwarto kan hade. Nagplano sindang gadanon ini.

²² Naaraman ni Mardokeo an plano kaya inosip niya ini ki Reyna Esther. Inosip ni Reyna Esther sa hade an naaraman ni Mardokeo.

²³ Nagkaigwa nin pagsiyasat asin naaraman na totoo an bareta, kaya binitay an duwang eunuko. Dangan nagboot an hade na an pangyayaring ini isurat sa mga opisyal na talaan kan imperyo.