Esdras 8 - Marahay na Bareta Biblia

An mga Nagbalik hale sa Pagkatapokan

¹ Iyo ini an lista kan mga pamayo kan mga kamaganakan na itinapok sa Babilonia asin nagbalik sa Jerusalem kaiba ni Esdras kan si Artajerjes iyo an emperador:

^2-14 Si Gersom, kan kamaganakan ni Finehas si Daniel, kan kamaganakan ni Itamar si Hattus na aking lalaki ni Secanias, kan kamaganakan ni David si Zacarias, kan kamaganakan ni Paros, kaiba an syento singkwentang lalaki na kaayon sa saiyang kamaganakan (na gabos nasa lista kan saindang pamilya) Si Elieoenai na aking lalaki ni Zerahias, kan kamaganakan ni Pahat-moab, kaiba an duwang gatos na lalaki si Secanias na aking lalaki ni Jahaziel, kan kamaganakan ni Zattu, kaiba an tolong gatos na lalaki si Ebed na aking lalaki ni Jonatan, kan kamaganakan ni Adin, kaiba an singkwentang lalaki si Jesaias na aking lalaki ni Atalias, kan kamaganakan ni Elam, kaiba an setentang lalaki si Zebadias na aking lalaki ni Miguel, kan kamaganakan ni Sefatias, kaiba an otsentang lalaki si Obadias na aking lalaki ni Jehiel, kan kamaganakan ni Joab, kaiba an dos syentos dyes y otsong lalaki si Selomit na aking lalaki ni Josifias, kan kamaganakan ni Bani, kaiba an syento sesentang lalaki si Zacarias na aking lalaki ni Bebai, kan kamaganakan ni Bebai, kaiba an beynte y otsong lalaki si Johanan na aking lalaki ni Hakkatan, kan kamaganakan ni Azgad, kaiba an syento dyes na lalaki si Elifelet, si Jeuel asin si Semaias, kan kamaganakan ni Adonikam, kaiba an sesentang lalaki (hudyan sindang nagbalik) si Utai asin si Zaccur, kan kamaganakan ni Bigvai, kaiba an setentang lalaki.

Nakakua si Esdras nin mga Levita para sa Templo

¹⁵ Tinipon ko an bilog na grupo sa tampi kan salog na nagbubulos pasiring sa banwa nin Ahava, asin duman kami nagkampo sa laog nin tolong aldaw. Nahiling ko na igwa nin mga padi sa katiriponan, alagad mayo nin Levita.

¹⁶ Ipinaapod ko an siyam kan mga lider. An mga ini iyo si Eliezer, Ariel, Semaias, Elnatan, Jarib, Elnatan, Natan, Zacarias, asin si Mesullam. Ipinaapod ko man an duwang paratukdo na si Joiarib asin si Elnatan.

¹⁷ Pinaduman ko sinda ki Iddo, na pamayo kan komunidad na nasa Casifia, tanganing sabihan ini asin an saiyang kairiba, an mga trabahador sa Templo, na magpadara nin mga tawong malingkod sa Dios duman sa Templo.

¹⁸ Sa tabang nin Dios, ipinadara ninda samo si Serebias, sarong lalaki na may pakasabot, na sarong Levita na gikan sa kamaganakan ni Mali, asin an dyes y otso niyang aking lalaki saka mga tugang na lalaki.

¹⁹ Ipinadara man ninda si Hasabias asin si Jesaias kan kamaganakan ni Merari, kaiba an beynte nindang kadugo.

²⁰ Laen pa kan mga ini, igwa pa nin dos syentos beynteng mga trabahador sa Templo na an mga ginikanan pinili ni David asin kan mga opisyal kaini tanganing magtabang sa mga Levita. An saindang mga ngaran gabos nasasambit sa lista.

Pinangenotan ni Esdras an mga Tawo sa Pag-ayuno saka sa Pagpamibi

²¹ Duman sa tampi kan Salog nin Ahava ipinagboot ko an pag-ayuno asin an pagpakumbaba sa atubang nin samuyang Dios, tanganing hagadon saiya na pangenotan kami sa samong pagbaklay asin iligtas kami, an samong mga aki asin an gabos nyamong pagsadiri.

²² Nasopog ako na maghagad sa emperador nin sarong tropa nin nakakabayong mga soldados tanganing bantayan kami sa mga kaiwal mantang kami nagbabaklay, huli ta sinabihan ko an emperador na binabantayan nin samuyang Dios an gabos na nagsasarig saiya, asin an bagsik kan saiyang kaanggotan pinapahugpa niya sa gabos na minatalikod saiya.

²³ Kaya nag-ayuno kami saka nagpamibi sa samuyang Dios tanganing iligtas kami, asin dinangog niya an samong pamibi.

An mga Regalo para sa Templo

²⁴ Hale sa mga pangenot na padi, pinili ko an dose: si Serebias, si Hasabias asin sampolo pang iba.

²⁵ Tinimbang ko an plata, an bulawan, asin an mga kagamitan na itinao kan emperador, kan saiyang mga parahatol saka mga opisyal, patin kan banwaan nin Israel tanganing gamiton sa Templo, dangan itinao ko ini sa mga padi.

^26-27 Ini an itinao ko sainda: plata—beynte y singko na tonelada sanggatos na platang kagamitan—setenta kilos bulawan—tres mil kwatro syentos kilos beynteng bulawan na mangko—walong kilo may apat na gatos na gramos duwang mangko nin pinong bronse na an halaga kapantay nin mga bulawan na mangko.

²⁸ Dangan sinabihan ko sinda, “Banal kamo para sa Kagurangnan, an Dios kan saindong mga ginikanan, siring man an plata saka bulawan na kagamitan na bilog na pusong idinolot saiya.

²⁹ Bantayan asin ingatan nindo an mga ini sagkod na makaabot kamo sa Templo. Duman sa mga kwarto kan mga padi, timbangon nindo an mga ini, dangan itao nindo sa mga lider kan mga padi asin kan mga Levita, patin sa mga lider kan banwaan nin Israel sa Jerusalem.”

³⁰ Kaya an mga padi asin an mga Levita iyo an namahala kan bulawan, plata, saka mga kagamitan, tanganing darahon sa Templo sa Jerusalem.

An Pagbalik sa Jerusalem

³¹ Kan ikadoseng aldaw kan enot na bulan, naghale kami sa Salog nin Ahava dangan nagpasiring sa Jerusalem. Tinabangan kami kan samuyang Dios asin ilinigtas kami sa mga pagsalakay saka

³² pag-abot mi sa Jerusalem nagpahingalo kami sa laog nin tolong aldaw.

³³ Kan ikaapat na aldaw, nagduman kami sa Templo, tinimbang an plata, an bulawan asin an mga kagamitan, dangan itinao nyamo an mga ini sa padi na si Meremot an aking lalaki ni Urias. Kaiba niya si Eleazar na aking lalaki ni Finehas asin an duwang Levita na si Jozabad na aking lalaki ni Jesua dangan si Noadias na aking lalaki ni Binnui.

³⁴ An gabos tinimbang asin binilang, dangan isinurat an timbang saka an bilang kan gabos.

³⁵ Kan panahon na idto, an gabos na nagbalik hale sa pagkatapokan nagdara nin mga tinutong na atang para sa Kagurangnan, an Dios nin Israel. Nagdolot sinda nin doseng torong baka para sa bilog na Israel, nubenta y seis na karnero asin setenta y syeteng kordero; nagdolot man sinda nin doseng kanding bilang dolot para sa kasalan. Ini gabos tinutong bilang mga sakripisyo para sa Kagurangnan.

³⁶ An kasuratan na hale sa emperador itinao man ninda sa mga gobernador saka mga opisyal kan probinsya sa ibong kan Salog nin Eufrates; dangan tinabangan kan mga ini an banwaan asin an Templo nin Dios.