Esdras 6 - Marahay na Bareta Biblia

Nakua an Kasuratan kan Pagboot ni Ciro

¹ Kaya nagpaluwas si Emperador Dario nin pagboot na halungkaton an mga libro kan mga hade, sa Babilonia.

² Sarong kasuratan an nakua sa syudad nin Ecbatana, sa probinsya nin Media; ini an laog kan nasambit na kasuratan:

³ “Kan enot na taon kan pamamayo ni Emperador Ciro, nagpaluwas siya nin sarong pagboot na itugdok giraray an Templo sa Jerusalem, an lugar para sa mga sakripisyo saka mga tinutong na atang. An sukol kan Templo kaipuhan beynte y syete metros an langkaw asin beynte y syete metros an lakbang.

⁴ An mga lanob gigibohon na igwa nin sarong raya nin kahoy sa lambang tolong taytay nin pinagpatong-patong na gapo. An gabos na gasto babayadan hale sa kayamanan kan hade.

⁵ Siring man, an mga kagamitan na bulawan saka plata na dinara ni Hadeng Nebukadnezzar hale sa Templo nin Jerusalem pasiring sa Babilon kaipuhan ibalik sa dating lugar kaiyan duman sa Templo sa Jerusalem.”

Nagboot si Emperador Dario na Ipadagos an Trabaho

⁶ Dangan ipinadara ni Emperador Dario an simbag na ini: “Para ki Tattenai na gobernador sa probinsya sa ibong kan Salog nin Eufrates, ki Setar-bozenai asin sa saindang kairibang mga opisyal sa probinsya sa ibong kan Salog nin Eufrates. “Magharayo kamo sa Templo,

⁷ asin dai kamo makilabot sa pagpapatugdok kaiyan. Tugotan nindo an gobernador nin Juda saka an mga kamagurangan kan mga Judio na itugdok an Templo nin Dios sa dating namumugtakan kaiyan.

⁸ Dangan ipinagboboot ko na gibohon nindo ini para sainda: an gasto ninda sa pagpatugdok kuahon nindo tolos hale sa kayamanan kan hade, an buhis kan probinsya sa ibong kan Salog nin Eufrates tanganing dai maontok an trabaho.

⁹ An ano man na kaipuhan kan mga padi sa Jerusalem—mga torilyong baka, mga kordero, mga karnero para sa tinutong na atang para sa Dios nin langit, o trigo, asin, arak saka lana nin oliba itao nanggad nindo sainda aroaldaw

¹⁰ tanganing makapagdolot sinda nin maninigong atang sa Dios nin langit asin ikapamibi ninda ako saka an sakong mga aki.

¹¹ Ipinagboboot ko man na an siisay man na magsalungat sa pagboot na ini, sarong kahabaan na kahoy an tatangkason hale sa saiyang harong, papanasan an sarong poro kan kahoy na iyan dangan itutusok sa saiyang hawak. An saiyang harong gigibohon na sarong tambakan nin ati.

¹² An Dios na nagpili sa Jerusalem bilang lugar na pagsasambahan saiya iyo logod an magbagsak sa siisay man na hade o nasyon na magsalungat sa pagboot na ini asin maghingowang raoton an Templo duman. Ako, si Dario, an nagboot. Kaipuhan na kuyogon nanggad an sakong pagboot.”

Kinonsagra an Templo

¹³ Dangan siring sa itinaram ni Emperador Dario, an gabos na ipinagboot kan emperador kinuyog ni Tatenai na gobernador kan probinsya sa ibong kan Salog nin Eufrates, ni Setar-bozenai, asin kan mga kairiba ninda.

¹⁴ Ipinadagos kan mga kamagurangan kan mga Judio an pagtugdok kan Templo; an saindang boot pinakosog kan mga propeta na si Hageo saka si Zacarias na aking lalaki ni Iddo. Hinaman ninda an Templo sosog sa ipinagboot kan Dios nin Israel, asin ni Ciro, ni Dario, saka ni Artajerjes, na mga emperador nin Persia.

¹⁵ Natapos ninda an Templo kan ikatolong aldaw kan bulan nin Adar, kan ikaanom na taon kan pamamayo ni Emperador Dario.

¹⁶ Dangan an Templo maogmang kinonsagra kan banwaan nin Israel—kan mga padi, mga Levita, asin kan gabos na nagbalik hale sa pagkatapokan.

¹⁷ Para sa pagkonsagra kan Templo, nagdolot sinda nin sanggatos na toro, duwang gatos na karnero, apat na gatos na kordero asin doseng kanding bilang dolot para sa kasalan, sarong kanding para sa lambang tribu nin Israel.

¹⁸ Pinili saka pinaggrupo-grupo man ninda an mga padi saka mga Levita na malingkod sa Templo sa Jerusalem, sosog sa katukdoan na nasusurat sa libro ni Moises.

An Paskwa

¹⁹ Kan ikakatorseng aldaw kan enot na bulan kan sunod na taon, an Paskwa pinagselebrar kan mga tawo na nagbalik hale sa pagkatapokan.

²⁰ Nagpabanal kan saindang sadiri an mga padi saka an mga Levita; naglinig sinda gabos. Binuno kan mga Levita an korderong Pangpaskwa para sa gabos na tawo na nagbalik hale sa pagkatapokan, siring man para sa mga padi saka mga Levita.

²¹ An mga sakripisyo kinakan kan gabos na nagbalik hale sa pagkatapokan asin kan lambang saro na nag-iba sainda saka nagbaya kan mga paganong gawe kan ibang banwaan, mga tawo na nag-eerok na ngunyan sa daga asin nagsasamba sa Kagurangnan, an Dios nin Israel.

²² Sa laog nin pitong aldaw, maogmang pinagselebrar ninda an Pyesta kan Tinapay na Mayo nin Lebadura. Maogma sinda huli ta ginibo nin Kagurangnan na mawilihan sinda kan emperador nin Asiria, tanganing tabangan sinda sa pagtugdok giraray kan Templo kan Dios nin Israel.