Esdras 10 - Marahay na Bareta Biblia

An Plano na Mapaontok an Pakipag-agoman sa mga taga ibang Nasyon

¹ Mantang namimibi saka nagkukumpisal si Esdras na naghihibi asin nakaduko sa atubang kan Templo, sarong dakulang grupo nin mga Israelita—mga lalaki, babae, asin mga aki—an nagtiripon sa palibot niya, naghihibi nin makuri.

² Dangan nagsabi ki Esdras si Secanias na aking lalaki ni Jehiel kan kamaganakan ni Elam, “Nagkasala kami sa samuyang Dios huli ta nag-agom kami nin mga dayuhan na babae, alagad minsan siring, igwa pa nin paglaom para sa Israel.

³ Ngunyan kaipuhan na manuga kita sa satuyang Dios na papalayason nyato an mga babaeng ini asin an saindang mga aki. Gigibohon mi an pagboot mo asin kan gabos na nag-oomaw sa Dios. Gigibohon mi an hinahagad kan Katogonan nin Dios.

⁴ Katongdan mo an maghiro. Kaibahan mo kami, kaya magmakosog ka asin giboha iyan.”

⁵ Kaya pinasumpa ni Esdras an mga lider kan mga padi saka mga Levita, asin kan bilog na banwaan na gibohon an sinabi ni Secanias.

⁶ Dangan naghale si Esdras sa atubangan kan Templo asin nagduman sa harong ni Jehohanan na aking lalaki ni Eliasib, asin duman nagpaaga. Dai siya nagkakan o nag-inom nin anoman; nagmondo siya huli ta dai nagin maimbod an mga itinapok.

⁷ Sarong mensahe an ipinalibot sa bilog na Juda asin Jerusalem tanganing an gabos na nagbalik hale sa pagkatapokan magtiripon sa Jerusalem

⁸ sa pagboot kan mga lider kan banwaan. An siisay man na dai magduman sa laog nin tolong aldaw, eembargohan kan gabos niyang pagsadiri asin dai na ibibilang na kaayon sa komunidad.

⁹ Sa laog nin tolong aldaw, kan ikabeynteng aldaw kan ikasiyam na bulan, an gabos na lalaki na nag-eerok sa teritoryo nin Juda asin Benjamin nagduruman sa Jerusalem asin nagtiripon sa plasa kan Templo. Makosog kaidto an uran, asin huli kan panahon saka kan importansya kan pagtiripon, tinarakigan an gabos.

¹⁰ Nagtindog an padi na si Esdras dangan nagtaram sainda, “Dai kamo nagin maimbod huli kan pag-agom nindo sa mga dayuhan na babae; pinadakula nindo an kasalan nin Israel.

¹¹ Kaya ikumpisal nindo an saindong mga kasalan sa Kagurangnan, an Dios kan saindong mga ginikanan, asin kuyogon nindo an saiyang kabotan. Humarayo kamo sa mga dayuhan na nag-eerok sa satuyang daga asin suhayan nindo an saindong mga dayuhan na agom.”

¹² An bilog na katiriponan nagsimbag sa makosog na tingog, “Totoo iyan; gigibohon mi an sinabi mo.

¹³ Alagad dakula an katiriponan na ini asin makosog an uran; dai kami makakatagal sa mayong lindong na lugar na ini. An trabahong ini dai magigibo sa laog sana nin saro o duwang aldaw huli ta dakul sa samo an nagkasala sa bagay na ini.

¹⁴ Kaya an mga opisyal na sana nyamo an mamahala kaini. Dangan an siisay man na igwa nin dayuhan na agom kaipuhan na magdigdi sa talaan na panahon, kaiba an mga lider asin an mga hukom kan saiyang syudad. Sa paaging ini, mahahale sato an kaanggotan nin Dios huli sa bagay na satong naginibo.”

¹⁵ Mayo nin nagsalungat sa kaisipan na ini kundi si Jonatan na aking lalaki ni Asahel saka si Jazeias na aking lalaki ni Tikva, na inoyonan man ni Mesullam saka ni Sabbetai, na sarong Levita.

¹⁶ An plano inoyonan kan gabos na nagbalik hale sa pagkatapokan, kaya an padi na si Esdras nagpili nin mga lalaki hale sa mga namamayo kan mga kamaganakan asin kinua an saindang mga ngaran. Kan enot na aldaw kan ikasampolong bulan, pinonan ninda an pagsiyasat,

¹⁷ asin sa laog nin tolong bulan, naaraman ninda kun siisay sa mga lalaki an igwa nin mga dayuhan na agom.

An mga Lalaking Igwa nin mga Dayuhan na Agom

¹⁸ Ini an lista kan mga lalaki na igwa nin mga dayuhan na agom: Sa mga padi: Sa kamaganakan ni Josue asin kan saiyang mga tugang, an mga aking lalaki ni Johozadak: si Maaseias, si Eliezer, si Jarib, asin si Gedalias.

¹⁹ Nanuga sinda na susuhayan an saindang mga agom asin nagdolot sinda nin sarong lalaking karnero bilang sakripisyo para sa saindang mga kasalan.

²⁰ Sa kamaganakan ni Immer: si Hanani saka si Zebadias.

²¹ Sa kamaganakan ni Harim: si Maaseias, si Elias, Semaias, Jehiel, saka si Uzzias.

²² Sa kamaganakan ni Pasur: si Elioenai, Maaseias, Ismael, Netanel, Jozabad, saka si Elasa.

²³ Sa mga Levita: Si Jozabad, Simei, Kelaias (inapod man Kelita), Petahias, Juda, asin si Eliezer.

²⁴ Sa mga Parakanta: Si Eliasib Sa mga bantay sa Templo: Si Sallum, si Telem, saka si Uri

²⁵ Iba pang mga Israelita: Sa kamaganakan ni Paros: si Ramias, Izzias, Malkias, Mijamin, Eleazar, Hasabias, saka si Benaias

²⁶ Sa kamaganakan ni Elam: Si Mattanias, Zacarias, Jehiel, Abdi, Jeremot, saka si Elias

²⁷ Sa kamaganakan ni Zattu: Si Elioenai, Eliasib, Mattanias, Jeremot, Zabad, saka si Aziza.

²⁸ Sa kamaganakan ni Bebai: Si Jehohanan, Hananias, Zabbai, asin si Atlai

²⁹ Sa kamaganakan ni Bani: Si Mesullam, Malluk, Adaias, Jasub, Seal, saka si Jeremot

³⁰ Sa kamaganakan ni Pahat-moab: Si Adna, Kelal, Benaias, Maaseias, Mattanias, Bezalel, Binnui saka si Manases

³¹ Sa kamaganakan ni Harim: Si Eliezer, Issijas, Malkias, Semaias, Simeon,

³² Benjamin, Malluk, saka si Semarias

³³ Sa kamaganakan ni Hasum: Si Mattenai, Mattatta, Zabad, Elifelet, Jeremai, Manases, asin si Simei

³⁴ Sa kamaganakan ni Bani: Si Maadai, Amram, Uel,

³⁵ Benaias, Bedeias, Keluhi,

³⁶ Vanias, Meremot, Eliasib,

³⁷ Matanias, Mattenai, asin si Jaasu

³⁸ Sa kamaganakan ni Binnui: Si Simei,

³⁹ Selemias, Natan, Adaias,

⁴⁰ Maknadebai, Sasai, Sharai,

⁴¹ Azarel, Selemias, Semarias,

⁴² Sallum, Amarias, asin si Jose

⁴³ Sa kamaganakan ni Nebo: Si Jeiel, Mattitias, Zabad, Zebina, Jaddai, Joel, asin si Benaias

⁴⁴ An mga lalaking ini gabos igwa nin mga dayuhan na agom. Sinuhayan ninda an mga ini asin pinahale kaiba an saindang mga aki.