Deuteronomio 9 - Marahay na Bareta Biblia

An Kasumbikalan kan mga Tawo

¹ “Paghinanyog kamo, banwaan nin Israel! Ngunyan na aldaw babalyohon nindo an Salog nin Jordan asin sasakopon an daga na pagsadiri kan mga nasyon na mas dakula asin mapangyari ki sa saindo. Darakula an saindang mga syudad na napapalibotan nin mga kudal na nakakaabot na sa langit.

² Haralangkaw saka makokosog an mga tawo duman; mga higante sinda asin nadangog na nindo na mayong makakadaog sainda.

³ Alagad ngunyan na aldaw mahihiling nindo na mangengenot saindo an Kagurangnan na saindong Dios siring sa sarong nakakatutong na kalayo. Sa pagdangadang nindo, dadaogon niya sinda tanganing madali nindo sindang mapahale asin magadan siring sa ipinanuga niya.

⁴ “Pakapahalea sainda nin Kagurangnan na saindong Dios para saindo, dai kamo magsabi na itinao niya saindo an dagang iyan huli ta maninigo kamong mag-ako kaiyan. An totoo, papahaleon nin Kagurangnan an mga nasyon na iyan sa pagdangadang nindo huli ta mga maraot sinda.

⁵ Itatao niya saindo an daga ninda bakong huli ta mga marahay kamo asin tama an ginigibo nindo. Papahaleon sinda nin Kagurangnan huli ta mga maraot sinda asin huli ta boot niyang otobon an saiyang panuga sa saindong mga ginikanan, ki Abraham, ki Isaac saka ki Jacob.

⁶ Kaya pakasaboton nindo na itatao saindo nin Kagurangnan an marahay na dagang iyan bakong huli ta maninigo kamo; ata ngani, saro kamong banwaan na matagas an payo.

⁷ “Giromdoma nindo kun paano nindo pinaanggot an Kagurangnan na saindong Dios duman sa kalangtadan. Tinumangan nindo siya poon na maghale kamo sa Egipto sagkod na makaabot digdi.

⁸ Pinaanggot nindo siya maski duman sa Bukid nin Sinai. Sa kaanggotan, andam na kuta siyang tunawon kamo.

⁹ Nagtukad ako sa bukid tanganing akoon an mga tablang gapo na nasusuratan kan tipan nin Kagurangnan sa saindo. Kwarentang aldaw asin banggi ako duman, na dai nagkakan o nag-inom nin ano man.

¹⁰ Dangan itinao sako nin Kagurangnan an duwang tablang gapo na sinuratan niya kan mga itinaram niya saindo hale sa kalayo kan aldaw na magtiripon kamo duman sa may bukid.

¹¹ Pakatapos kan kwarentang aldaw asin banggi, itinao sako nin Kagurangnan an duwang tablang gapo na sinuratan niya kan tipan.

¹² “Dangan nagtaram sako an Kagurangnan, ‘Humilig ka tolos hale sa bukid na ini, huli ta an saimong banwaan, na ilinuwas mo sa Egipto, nagin maraot asin nagkasala. Tinalikodan na ninda an ipinagboot kong gibohon ninda asin naggibo sinda nin metal na dios-dios para sainda.’

¹³ “Nagtaram pa sako an Kagurangnan, ‘Aram kong talagang matagas an payo kan banwaan na ini.

¹⁴ Hare ako pagpugola. Tutunawon ko sinda tanganing mayo nang makagiromdom sainda. Dangan ika an gigibohon kong ama nin sarong nasyon na mas dakula asin mapangyari ki sa sainda.’

¹⁵ “Kaya nagbalik ako asin naghilig hale sa nagkakalayong bukid dara an duwang tablang gapo na nasusuratan kan tipan.

¹⁶ Nahiling kong linapas na tolos nindo an pagboot na itinao saindo nin Kagurangnan na saindong Dios. Nagkasala kamo saiya huli sa paggibo nindo nin metal na baka.

¹⁷ Kaya ipinusak ko sa atubang nindo an duwang tablang gapo asin nagkabaraak idto.

¹⁸ Dangan nagdapa giraray ako sa atubang nin Kagurangnan sa laog nin kwarentang aldaw asin banggi; dai ako nagkakan o nag-inom nin ano man. Ginibo ko iyan huli ta nagkasala kamo sa Kagurangnan asin pinaanggot nindo siya.

¹⁹ Natakot ako sa labi-labing kaanggotan saindo nin Kagurangnan, huli ta andam na siyang tunawon kamo; alagad dinangog giraray ako nin Kagurangnan.

²⁰ Anggot man siya nin makuri ki Aaron mala ta gagadanon na kuta siya, alagad ipinamibi ko man siya.

²¹ Kinua ko an makasalan na bagay na iyan, an metal na baka na ginibo nindo, isinugba ko sa kalayo asin pinasa, giniling ko siring sa alpog, dangan ipinaanod an alpog duman sa sapa na nagbubulos sa bukid.

²² “Pinaanggot man nindo an Kagurangnan na saindong Dios kan yaon kamo duman sa Tabera, sa Massa, asin duman sa Kibrot-hattaava.

²³ Dangan kan sugoon niya kamo hale sa Kades-barnea na magduman asin sakopon an daga na itinatao niya saindo, nagtumang kamo saiya; dai kamo nagtubod o nagkuyog.

²⁴ Magpoon na mamidbid ko kamo, nagin matumang na kamo sa Kagurangnan.

²⁵ “Kaya nagdapa ako sa atubang nin Kagurangnan sa laog kan kwarentang aldaw asin bangging idto, huli ta boot nanggad niyang tunawon kamo.

²⁶ Namibi ako, ‘O Kagurangnan Dios, hare pagtunawa an saimong sadiring banwaan na ilinigtas mo asin ilinuwas hale sa Egipto huli kan saimong dakulang kosog asin kapangyarihan.

²⁷ Giromdoma an saimong mga sorogoon na si Abraham, si Isaac saka si Jacob; pabayaan mo an katagasan nin payo kan mga tawong iyan, an saindang karatan asin kasalan;

²⁸ huli ta tibaad magsabi an mga Egipcio na dai mo kayang darahon an sadiri mong banwaan sa dagang ipinanuga mo sainda. Masabi sinda na ilinuwas mo an saimong banwaan asin dinara sa kalangtadan tanganing gadanon huli ta anggot ka sainda.

²⁹ Iyo baga ini an banwaan na saimong pinili bilang sadiri asin ilinuwas sa Egipto huli kan saimong dakulang kapangyarihan asin kosog.’