Deuteronomio 8 - Marahay na Bareta Biblia

Sarong Marahay na Daga na Masasadirihan

¹ “Maimbod na kuyogon nindo an gabos na togon na itinao ko saindo ngunyan tanganing mabuhay asin magdakul kamo, patin masadirihan nindo an dagang ipinanuga nin Kagurangnan sa saindong mga ginikanan.

² Giromdoma nindo kun paano kamo pinangenotan nin Kagurangnan, na saindong Dios, sa pagbaklay nindo sa desyerto sa laog nin kwarentang taon. Pinasakitan niya kamo sa pagbalo saindo, tanganing aramon an nasa puso nindo, kun makuyog kamo kan saiyang mga togon o dai.

³ Ginutom niya kamo dangan pinakakan nin manna, sarong pagkakan na dai pa nanamitan nindo asin kan saindong mga magurang. Ginibo niya idto tanganing tukdoan kamo na an tawo nabubuhay bako sa tinapay sana kundi sa lambang tataramon na minagikan sa ngoso nin Kagurangnan.

⁴ Sa laog nin kwarentang taon, dai nagdaan an saindong gubing asin dai naggatok an saindong mga bitis.

⁵ Giromdoma na sinasagwe asin pinapadusahan kamo nin Kagurangnan na saindong Dios siring sa sarong ama na nagdidisiplina kan saiyang mga aki.

⁶ Kaya kuyogon nindo an saiyang mga pagboot: mamuhay kamo sosog sa saiyang mga togon asin matakot kamo saiya.

⁷ Dadarahon kamo nin Kagurangnan na saindong Dios sa sarong marahay na daga—daga na igwa nin mga salog, mga sapa asin mga burabod na minabulos sa mga kapantayan saka kabubuldan;

⁸ daga na matao nin trigo asin sebada, nin mga ubas, higera, granada, oliba sagkod dugos.

⁹ Duman dai kamo magugutom o magkukulang nin ano man. An mga gapo duman igwa nin lansang; makakamina kamo nin kobre sa kabubuldan.

¹⁰ Magkakaigwa kamo duman kan gabos na gusto nindong kakanon, asin magpapasalamat kamo sa Kagurangnan na saindong Dios huli sa marahay na daga na itinao niya saindo.

Patanid laban sa Paglingaw sa Kagurangnan

¹¹ “Dai nanggad nindo paglingawan an Kagurangnan na saindong Dios; kuyogon nanggad nindo an gabos niyang togon saka pagboot na itinatao ko saindo ngunyan na aldaw.

¹² Kun igwa na kamo kan gabos na boot nindong kakanon, asin kun makapatindog na kamo nin magayon na mga harong na eerokan,

¹³ kun magdakul na an saindong mga baka saka karnero, mga pirak asin bulawan, patin iba pang mga pagrogaring,

¹⁴ dai nanggad kamo magpalangkaw asin makalingaw sa Kagurangnan na saindong Dios, na nagluwas saindo hale sa daga nin Egipto, saen kamo nagin mga oripon.

¹⁵ Pinangenotan niya kamo sa saindong pagbaklay sa mahiwas asin makatakot na kalangtadan na may mararang mga halas asin uyang. Duman sa alang asin daing tubig na daga, pinabulos niya para saindo an tubig hale sa matagas na gapo.

¹⁶ Sa kalangtadan, pinakakan niya kamo nin manna, pagkakan na dai pa nanamitan kan saindong mga ginikanan. Pinasakitan niya kamo sa pagbalo saindo, tanganing sa kataposan, tawan niya kamo nin mga marahay na bagay.

¹⁷ Kaya dai nanggad kamo mag-isip na nagyaman kamo huli sa sadiri nindong kakayahan saka kosog.

¹⁸ Giromdoma nindo na an Kagurangnan na saindong Dios iyo an nagtao saindo nin kakayahan tanganing magyaman kamo. Ginibo niya ini huli ta sagkod ngunyan maimbod siya sa tipan na sinumpaan niya sa saindong mga ginikanan.

¹⁹ Dai kamo malingaw sa Kagurangnan na saindong Dios asin dai kamo maglingkod patin magsamba sa ibang mga dios. Kun gibohon nindo iyan, pinapatanidan ko kamo ngunyan na talagang magagadan kamo.

²⁰ Kun dai kamo magkuyog sa Kagurangnan, magagadan man kamo arog kan mga nasyon na saiyang roronoton sa pagdangadang nindo.