Deuteronomio 7 - Marahay na Bareta Biblia

An Banwaan na Sadiri nin Kagurangnan

¹ “Dadarahon kamo nin Kagurangnan na saindong Dios duman sa dagang sasakopon nindo, asin papahaleon niya duman an dakul na banwaan. Sa pagdangadang nindo, aalawon niya an pitong nasyon na orog na dakula asin mapangyari ki sa saindo: an mga Heteo, Gergeseo, Amoreo, Cananeo, Perezeo, Heveo, asin Jebuseo.

² Kun itao na sinda nin Kagurangnan sa saindong kamot asin madaog na nindo sinda, kaipuhan gadanon nindo sinda gabos. Dai kamo makipagtipan sainda, asin dai kamo maherak sainda.

³ Dai nindo pag-agomon an siisay man sainda asin dai kamo magtugot na agomon ninda an saindong mga aki,

⁴ huli ta dadagkahon ninda an saindong mga aki na talikodan an Kagurangnan tanganing magsamba sa saindang mga dios-dios. Kun mangyari iyan, maaanggot saindo an Kagurangnan asin gagadanon niya kamo tolos.

⁵ Kaya gabaon nindo an saindang mga altar, rumpagon an saindang mga hariging gapo, palodon an saindang mga simbolo kan saindang diosa na si Asera asin suloon nindo an gabos nindang ladawan.

⁶ Gibohon nindo iyan huli ta sadiri kamo nin Kagurangnan na saindong Dios. Hale sa gabos na banwaan sa kinaban, pinili niya kamo na magin saiyang sadiring banwaan.

⁷ “Namotan asin pinili kamo nin Kagurangnan bakong huli ta mas dakul kamo ki sa ibang banwaan kundi kamo pa ngani an pinakadikit sa gabos.

⁸ Alagad namotan kamo nin Kagurangnan asin boot niyang otobon an panuga niya sa saindong mga ginikanan. Ini an dahelan kun tano ta huli kan saiyang mapangyaring kamot, ilinigtas niya kamo asin binalukat sa kaoripnan sa kamot kan hade nin Egipto.

⁹ Giromdoma na an Kagurangnan na saindong Dios iyo sana an Dios asin maimbod siya. Ootobon niya an saiyang tipan asin ipapahiling niya an saiyang danay na pagkamoot sa ribo-ribong henerasyon kan mga namomoot saiya saka nag-ootob kan saiyang mga togon,

¹⁰ alagad dai siya nagduduwa-duwa sa pagpadusa sa mga naaanggot saiya.

¹¹ Kaya kuyogon nindo an gabos na togon asin pagboot na itinao ko saindo ngunyan.

Mga Bendisyon kan Pagkuyog

¹² “Kun dangogon nindo asin kuyogon an mga togon na ini, ootobon nin Kagurangnan na saindong Dios an saiyang tipan asin ipapahiling niya saindo an saiyang danay na pagkamoot na ipinanuga niya sa saindong mga ginikanan.

¹³ Mamomotan niya kamo asin bebendisyonan, tanganing magdakul an saindong kaakian; bebendisyonan niya an saindong kaomahan, tanganing magkaigwa kamo nin ani, arak saka lana nin oliba; papadakulon niya an saindong mga baka sagkod mga karnero. Iwawaras niya saindo an mga bendisyon na ini duman sa dagang ipinanuga niya sa saindong mga ginikanan na itatao sa saindo.

¹⁴ Kamo an magigin paladan sa gabos na banwaan; mayo nin magigin baog sa saindo, tawo man o hayop.

¹⁵ Irarayo kamo nin Kagurangnan sa anoman na kahelangan asin dai niya kamo papadarahan kan mga helang na nasaksihan nindo duman sa Egipto, alagad ipapadara niya iyan sa saindong mga kaiwal.

¹⁶ Gadanon nindo an gabos na banwaan na itatao sa saindong kamot kan Kagurangnan na saindong Dios. Dai kamo maherak sainda asin dai kamo magsamba sa saindang mga dios-dios. Iyan an magigin siod para saindo.

¹⁷ “Dai kamo mag-isip na mas dakul ki sa saindo an mga banwaan na iyan kaya dai nindo sinda mapapahale.

¹⁸ Dai kamo matakot sa sainda; giromdomon nindo an ginibo nin Kagurangnan na saindong Dios sa hade asin sa bilog na Egipto.

¹⁹ Nahiling nindo an mga makangirhat na peste, mga tanda saka mga ngangalasan; an dakulang kapangyarihan asin kosog na ginamit nin Kagurangnan na saindong Dios sa pagligtas saindo. Arog man kaiyan an saiyang gigibohon sa mga banwaan na natatakotan nindo.

²⁰ Papadarahan pa niya sinda nin makuring takot, asin gagadanon niya idtong mga makakadulag asin makakatago.

²¹ Kaya dai kamo matakot sainda. Kaiba nindo an Kagurangnan na saindong Dios; dakula siya asin dapat katakotan.

²² Sa pagdangadang nindo, dikit-dikit na papahaleon nin Kagurangnan an mga nasyon na iyan. Dai nindo pwedeng gadanon tolos sinda gabos, huli ta tibaad magdakul an mga lalaw na hayop asin dai nindo sinda makayang labanan.

²³ Itatao saindo nin Kagurangnan an saindong mga kaiwal asin tatawan niya sinda nin makuring takot sagkod na sinda magadan.

²⁴ An saindang mga hade itatao nin Kagurangnan sa saindong mga kamot. Gagadanon nindo sinda asin malilingawan na sinda. Mayo nin siisay man na makakapugol saindo; gagadanon nindo sinda gabos.

²⁵ Suloon nindo an saindang mga dios-dios. Dai nindo pagmawoton asin pagsadirihon an mga plata o bulawan na yaon sa mga ladawan na iyan, huli ta iyan an makakasiod sa saindo; ikinakaanggot nin Kagurangnan an pagsamba sa mga dios-dios.

²⁶ Dai nindo pagdarahon sa saindong harong an arin man sa mga dios-dios na iyan, tanganing dai kamo mamaldisyon arog kan mga iyan. Kaongisan nindo an mga ladawan na iyan huli ta minaldisyon sinda nin Kagurangnan.