Deuteronomio 6 - Marahay na Bareta Biblia

An Nangongorog na Togon

¹ “Iyo ini an gabos na togon na ipinagboot nin Kagurangnan, na saindong Dios, na itukdo ko saindo. Otobon nindo ini duman sa daga na saindong lalaogon asin sasadirihon.

² Sa bilog nindong pagkabuhay, kamo sagkod an saindong kapagarakian dapat na matakot sa Kagurangnan na saindong Dios, asin magkuyog kan gabos niyang togon na itinatao ko saindo, tanganing maghalawig an saindong buhay.

³ Kaya dangoga nindo ini, mga Israelita, asin kuyogon nindo, tanganing mapakarahay kamo asin magdakul duman sa dagang matubang saka mayaman sa gabos na bagay, siring sa ipinanuga nin Kagurangnan, na Dios kan saindong mga ginikanan.

⁴ “Dangoga, O Israel! An Kagurangnan—asin an Kagurangnan sana—iyo an satuyang Dios.

⁵ Kamotan nindo an Kagurangnan na saindong Dios sa bilog nindong puso, sa bilog nindong kalag, asin sa bilog nindong kosog.

⁶ Dai nanggad nindo paglingawan an mga pagboot na ini na itinatao ko saindo ngunyan.

⁷ Itukdo nindo ini sa saindong mga aki. Ulit-uliton nindo sainda kun kamo nagtutukaw sa harong, kun naglalakaw sa dalan, kun nagpapahingalo saka kun kamo nagtatrabaho.

⁸ Igakod nindo iyan sa saindong kamot asin ibugkos nindo sa saindong angog bilang tanda.

⁹ Isurat nindo sa mga hamba kan pintoan nin saindong mga harong sagkod sa saindong mga trangkahan.

Patanid sa Dai Pagsunod

¹⁰ “Siring sa ipinanuga nin Kagurangnan na saindong Dios sa saindong mga ginikanan, ki Abraham, ki Isaac sagkod ki Jacob, tatawan niya kamo nin daga na igwa nin mga darakula asin magagayon na mga syudad na bakong kamo an nagtugdok,

¹¹ nin mga harong na pano nin mga bagay na marahay na dai man nindo ilinaog, asin nin mga bubon na dai man nindo kinalot, nin mga ubas saka mga oliba na dai man nindo itinanom. Kun darahon na kamo nin Kagurangnan sa dagang iyan, asin kun igwa na kamo kan gabos na boot nindong kakanon,

¹² magmaan kamo ta tibaad malingaw kamo sa Kagurangnan na nagligtas saindo sa Egipto, saen kamo nagin mga oripon.

¹³ Matakot kamo sa Kagurangnan na saindong Dios; maglingkod kamo saiya asin magsumpa kamo sa saiya sanang ngaran.

¹⁴ Dai kamo magsamba sa ibang dios, sa arin man na dios kan mga banwaan sa palibot nindo.

¹⁵ Kun magsamba kamo sa mga dios-dios, malaad saindo an kaanggotan nin Kagurangnan asin tutunawon niya kamo, huli ta an Kagurangnan na nasa kaibahan nindo, sarong maimon na Dios.

¹⁶ “Dai nindo pagbaloon an Kagurangnan na saindong Dios, arog kan ginibo nindo saiya duman sa Massa.

¹⁷ Kuyogon nanggad nindo an gabos na togon na itinao niya saindo.

¹⁸ Gibohon nindo an matanos asin an marahay sa atubang nin Kagurangnan tanganing mapakarahay kamo dangan masadirihan nindo an mayaman na daga na ipinanuga nin Kagurangnan sa saindong mga ginikanan,

¹⁹ huli sa pagpahale kan saindong mga kaiwal, siring sa saiyang ipinanuga.

²⁰ “Kun umabot an aldaw na maghapot saindo an saindong mga aki kun tano ta pinagbotan kamo nin Kagurangnan na kuyogon nindo an mga togon saka mga pagboot na ini,

²¹ sabihan nindo sindang, ‘Mga oripon kami kaidto kan hade nin Egipto, alagad ilinigtas kami nin Kagurangnan huli kan saiyang mapangyaring kamot.

²² Nahiling mi an mga ngangalasan asin makangirhat na mga bagay na ginibo niya sa mga Egipcio, sa hade sagkod sa gabos na opisyal niya.

²³ Hinale niya kami duman tanganing darahon digdi asin tawan kan dagang ini na ipinanuga niya na itatao sa satong mga ginikanan.

²⁴ Dangan pinagbootan kami nin Kagurangnan na satuyang Dios na kuyogon an mga togon na ini asin na matakot kami saiya. Kun gibohon mi ini, aatamanon niya asin papauswagon an satuyang nasyon.

²⁵ Para samuya, sarong katanosan an pagkuyog sa gabos na togon na ipinagboot samo nin Kagurangnan na samuyang Dios.’