Deuteronomio 4 - Marahay na Bareta Biblia

Sinadol ni Moises an Israel na Magin Makinuyog-kuyog

¹ Dangan sinabihan ni Moises an mga tawo, “Kuyogon nindo an gabos na togon asin pagboot na itinutukdo ko, tanganing mabuhay kamo asin masadirihan nindo an daga na itinatao saindo nin Kagurangnan, an Dios kan saindong mga ginikanan.

² Dai nindo pagdagdagan o pag-inaan an mga ipinagboot ko saindo. Kuyogon nindo an mga pagboot nin Kagurangnan na saindong Dios na itinao ko saindo.

³ Nahiling nindo an ginibo nin Kagurangnan sa Bukid nin Peor. Ginadan niya an gabos na nagsamba ki Baal duman,

⁴ alagad kamong nagdanay na maimbod sa saiya, buhay pa sagkod ngunyan.

⁵ “Itinukdo ko saindo an gabos na togon asin pagboot, siring sa itinaram sako nin Kagurangnan. Kuyogon nindo iyan duman sa daga na lalaogon nindo asin sasadirihon.

⁶ Maimbod na otobon nindo iyan, asin iyan an magpapahiling sa ibang nasyon kan saindong kadonongan. Kun madangog ninda an mga togon na ini, masabi sinda, ‘Totoong madonong asin may pakasabot an banwaan na ini!’

⁷ “Arin na mapangyaring nasyon an igwa nin dios na harani saiya, arog sa Kagurangnan na satong Dios, na harani nin marahay sa sato, kun minaapod kita saiya?

⁸ Arin na mapangyaring nasyon an igwa nin mga matanos na togon asin pagboot arog kan itinao ko saindo ngunyan na aldaw?

⁹ Magmaan kamo. Dai nanggad nindo paglingawan, sa bilog nindong pagkabuhay, an mga bagay na saindong nahiling. Iosip nindo sa saindong mga aki asin mga makoapo,

¹⁰ an manongod sa aldaw na nagtindog kamo sa atubang nin Kagurangnan na saindong Dios duman sa Bukid nin Sinai, kan siya magtaram sako, ‘Tipona sa atubang ko an gabos na tawo. Boot kong dangogon ninda an sakuyang itataram, tanganing makanood sindang matakot sako sa bilog nindang pagkabuhay, asin tanganing itukdo man ninda an siring sa saindang mga aki.’

¹¹ “Sabihan nindo an saindong mga aki kun paano kamo nagdolok asin nagtindog sa pamitisan kan bukid, na nagkakalayo sagkod sa kalangitan saka natatahoban nin kadikloman sagkod sa panganoron.

¹² Sabihan nindo sinda kun paano nagtaram an Kagurangnan sa saindo hale sa kalayo; nadangog nindo an saiyang tingog alagad dai nindo siya nahiling sa ano man na porma.

¹³ Ipinahayag niya saindo an saiyang tipan, na ipinagboot niyang otobon nindo, an Sampolong Togon na isinurat niya sa duwang tablang gapo.

¹⁴ Pinagbotan ako nin Kagurangnan na itukdo ko saindo an gabos niyang togon asin pagboot, tanganing otobon nindo sa daga na saindong masasadirihan.

Patanid Manongod sa Pagsamba sa mga Dios-dios

¹⁵ “Kan magtaram saindo an Kagurangnan hale sa kalayo duman sa Bukid nin Sinai, mayo kamong nahiling na ano man na porma. Kaya magmaan kamo

¹⁶ ta tibaad magkasala kamo sa paggibo para saindo nin ladawan, maski sa anong porma, lalaki man o babae,

¹⁷ hayop man o gamgam,

¹⁸ nagkakamang man na hayop sa daga o sira sa katubigan.

¹⁹ Magmaan kamo ta tibaad sambahon nindo asin paglingkodan an nahihiling nindo sa langit—an aldaw, an bulan, saka an mga bitoon. Itinao nin Kagurangnan na saindong Dios an mga ini sa ibang mga banwaan tanganing saindang pagsambahon.

²⁰ Alagad kamo an banwaan na ilinigtas niya sa Egipto, an nagkakalayong horno, tanganing gibohon niyang sadiring banwaan, na iyo kamo ngunyan.

²¹ Huli saindo, naanggot sako an Kagurangnan na saindong Dios, asin nagsumpa na dai ako makakabalyo sa Salog nin Jordan asin dai ako makakalaog sa marahay na daga na itinatao saindo nin Kagurangnan bilang pamana.

²² Dai ako makakabalyo sa Jordan, huli ta digdi ako magagadan sa dagang ini. Alagad makakabalyo kamo asin masasadirihan nindo an marahay na daga.

²³ Dai nanggad nindo paglingawan an tipan saindo nin Kagurangnan na saindong Dios. Otobon nindo an saiyang pagboot asin dai kamo maggibo nin ano man na ladawan na ipinapangalad niya,

²⁴ huli ta an Kagurangnan na saindong Dios arog sa kalayong nakakatutong, sarong maimon na Dios.

²⁵ “Maski nahaloy na kamo sa dagang idto, asin nagkaigwa na nin mga aki saka makoapo, dai nanggad kamo magkasala huli sa paggibo para saindo nin ano man na ladawan. Sarong karatan iyan sa atubang nin Kagurangnan asin makakapaanggot iyan saiya.

²⁶ Saksi ko an langit asin an daga laban saindo ngunyan na aldaw, na kun suhayon nindo ako, mapapara kamo sa daga. Dai maghahalawig an saindong buhay sa ibong kan Jordan, sa daga na saindong sasakopon. Magagadan kamo gabos.

²⁷ Iwawarak kamo nin Kagurangnan sa ibang mga nasyon saen nagkapira sana sa saindo an matatadang buhay.

²⁸ Sa mga nasyon na iyan, malingkod kamo sa mga dios-dios na kahoy saka gapo, mga gibo nin tawo, mga dios-dios na dai nakakahiling, dai nakakadangog, dai nakakakakan o nakakaparong.

²⁹ Hihidawon nindo duman an Kagurangnan na saindong Dios, asin kun hahanapon nindo siya sa bilog nindong puso, makukua nindo siya.

³⁰ Kun kamo nasa kasakitan, asin kun nangyayari na saindo an mga bagay na iyan, magbalik kamo sa Kagurangnan asin magsunod sa saiyang tingog.

³¹ An Kagurangnan sarong Dios na maheherakon. Dai niya kamo papabayaan o gagadanon; dai niya lilingawan an tipan na sinumpaan niya sa saindong mga ginikanan.

³² “Siyasaton nindo an nakaaging panahon, bago kamo namundag, poon kan lalangon nin Dios an tawo sa ibabaw nin daga; siyasaton nindo an bilog na kinaban. Nangyari na daw o nadangog na daw an dakulang ngangalasan na arog kaini?

³³ Igwa daw nin banwaan na arog saindo na nakadangog sa sarong dios na nagtaram hale sa kalayo, asin padagos na nabuhay?

³⁴ Igwa daw nin dios na nangahas na magduman asin magkua nin sarong banwaan hale sa ibang nasyon dangan gibohon na saiyang sadiri, arog kan ginibo saindo nin Kagurangnan na saindong Dios duman sa Egipto? Sa atubang nindo, ginamit niya an saiyang kosog asin kapangyarihan huli sa mga helang saka gera, sa mga tanda sagkod ngangalasan patin sa mga mangirhat na bagay.

³⁵ Ipinahiling ini nin Kagurangnan saindo tanganing patotoohan saindo na siya sana an Dios asin mayo nang iba.

³⁶ Tinugotan niya kamong makadangog kan saiyang tingog hale sa langit tanganing matukdoan kamo. Nahiling nindo digdi sa daga an saiyang banal na kalayo, dangan nadangog nindo siyang nagtaram hale sa kalayo.

³⁷ Pinili niya kamo huli ta namotan niya an saindong mga ginikanan; huli kan saiyang dakulang kapangyarihan, ilinuwas niya kamo hale sa Egipto.

³⁸ Sa pagdangadang nindo, pinahale niya an mga nasyon na mas makosog asin mapangyari ki sa saindo, tanganing palaogon niya kamo dangan paerokon sa saindang daga, na nasasadirihan nindo ngunyan.

³⁹ Kaya giromdoma nindo ngunyan asin dai nanggad nindo paglingawan na an Kagurangnan iyo an Dios sa langit asin sa daga; mayo na nin ibang dios.

⁴⁰ Kuyogon nindo an saiyang mga togon asin pagboot na itinatao ko saindo ngunyan na aldaw, tanganing mapakarahay kamo sagkod an saindong mga aki, asin maghalawig an saindong buhay sa daga na sagkod lamang itinatao saindo nin Kagurangnan na saindong Dios.”

Mga Syudad na Pailihan sa Sirangan kan Jordan

⁴¹ Dangan naglaen si Moises nin tolong syudad sa sirangan kan Jordan

⁴² tanganing magin pailihan kan siisay man na tawo na dai tuyong nakagadan nin kapwa, na bako man niya kaiwal. Dai na siya pwedeng gadanon kun makadulag siya pasiring sa saro kan mga syudad na ini.

⁴³ Linaen niya para sa tribu ni Ruben an syudad nin Bezer na nasa kapatagan kan bukid sa desyerto, an Ramot na nasa teritoryo kan Gilead para sa tribu ni Gad, asin an Golan na nasa teritoryo kan Basan para sa tribu ni Manases.

Introduksyon sa Pagtao kan mga Togon nin Dios

⁴⁴ Iyo ini an mga togon na itinao ni Moises sa mga Israelita,

⁴⁵ mga togon asin pagboot na ipinahayag niya sainda pakahale ninda sa Egipto,

⁴⁶ kan yaon sinda duman sa sirangan kan Jordan, sa kapantayan na kahampang kan Bet-peor, sa daga ni Sihon na hade kan mga Amoreo na nag-erok sa Hesbon. Si Hadeng Sihon nadaog na ni Moises asin kan mga Israelita,

⁴⁷ dangan nasakop na ninda an saiyang daga saka an daga ni Hadeng Og nin Basan, an saro pang hadeng Amoreo na nag-erok sa sirangan kan Jordan.

⁴⁸ An dagang ini minapoon sa Aroer na nasa tampi kan Salog nin Arnon, sagkod sa Bukid nin Sirion, na iyo an bukid nin Hermon,

⁴⁹ kaiba an bilog na rehiyon sa sirangan na parte kan Salog nin Jordan, sagkod sa Gadan na Dagat sa parteng habagat asin sagkod sa pamitisan kan Bukid nin Pisga sa parteng sirangan.