Deuteronomio 31 - Marahay na Bareta Biblia

Nagin Kasalihid ni Moises si Josue

¹ Nagpadagos sa pagpaliwanag si Moises sa banwaan nin Israel.

² Nagsabi siya, “Syento beynteng taon na an sakuyang edad asin dai ko na kaya an magin lider nindo. Laen pa kaiyan, nagtaram sako an Kagurangnan na dai ako magbalyo sa Jordan.

³ An Kagurangnan na saindong Dios mismo an mangengenot saindo asin matunaw kan mga nasyon na nag-eerok duman tanganing masadirihan nindo an saindang daga. Sosog sa itinaram nin Kagurangnan, si Josue an magigin lider nindo.

⁴ Gagadanon nin Kagurangnan an mga tawo duman dangan raraoton an saindang daga, siring kan ginibo niya ki Sihon saka ki Og, na mga hade kan mga Amoreo.

⁵ Itatao sinda nin Kagurangnan saindo, asin gibohon nanggad nindo sainda an gabos na sinabi ko saindo.

⁶ Magmaisog kamo saka pakosogon nindo an saindong boot. Dai kamo matakot sainda; huli ta iibahan kamo nin Kagurangnan na saindong Dios; dai niya kamo papabayaan.”

⁷ Dangan inapod ni Moises si Josue asin sinabihan sa atubang kan bilog na banwaan nin Israel, “Magmaisog ka saka pakosoga an saimong boot; ika an mangengenot sa mga tawong ini sa pagsakop kan daga na ipinanuga nin Kagurangnan sa saindang mga ginikanan.

⁸ An Kagurangnan mismo an mangengenot asin maiba saimo. Dai ka niya papabayaan, kaya dai ka matakot o manluya an saimong boot.”

Babasahon an Togon sa Lambang Ikapitong Taon

⁹ Kaya isinurat ni Moises an katogonan na ini nin Dios asin itinao sa mga pading Levita, na namamahala kan Kaban nin Tipan nin Kagurangnan, asin sa mga lider kan Israel.

¹⁰ Pinagbotan niya sinda, “Sa kataposan kan lambang ikapitong taon, pag-abot kan taon nin pagpatawad kan gabos na pagkakautang, basahon nindo an katogonan na ini sa makosog na tingog, sa Pyesta nin mga Harong-harong.

¹¹ Basahon nindo ini sa atubang kan bilog na Israel, sa panahon na magtiripon sinda sa pagsamba sa Kagurangnan na saindong Dios duman sa lugar na pagsasambahan.

¹² Tiponon nindo an gabos na lalaki, babae, aki sagkod an mga dayuhan na nag-eerok sa saindong mga banwa, tanganing madangog ini kan gabos asin makanood sinda na matakot sa Kagurangnan na saindong Dios, asin maimbod na magkuyog kan saiyang mga katukdoan.

¹³ Sa paaging ini, an saindong mga kapagarakian na dai pa nakadangog kan Togon nin Kagurangnan na saindong Dios, makakadangog man asin makakanood na matakot saiya, sagkod na nabubuhay pa sinda sa ibong kan Jordan, sa daga na saindong sasadirihon.”

Huring mga Katukdoan nin Kagurangnan ki Moises

¹⁴ Dangan tinaraman nin Kagurangnan si Moises, “Madali ka nang magadan. Apodon mo si Josue asin darahon mo siya sa Tabernakulo tanganing sakuyang sugoon.” Naglaog sa Tabernakulo si Moises saka si Josue,

¹⁵ asin nagpahiling sainda an Kagurangnan sa sarong hariging panganoron na nagtitindog sa may pintoan kan Tabernakulo.

¹⁶ Dangan nagtaram an Kagurangnan ki Moises, “Madali ka nang magadan; pagkagadan mo, masamba an banwaan na ini sa mga dios-dios sa dagang lalaogon ninda. Tatalikodan ninda ako asin lalapason an tipan na ginibo ko sainda.

¹⁷ Sa aldaw na iyan maaanggot ako sainda; papabayaan ko sinda asin magagadan sinda. Dakul na karatan saka kahaditan an maabot sainda, asin masasabotan ninda na an gabos na iyan nangyayari sainda huli ta ako, an saindang Dios, mayo na sa kaibahan ninda.

¹⁸ Dai ako matabang sainda huli ta naggibo sinda nin maraot dangan sinamba ninda an mga dios-dios.

¹⁹ “Ngunyan isurat mo an awit na ini, dangan itukdo mo sa banwaan nin Israel, tanganing iyo ini an magsaksi para sako laban sainda.

²⁰ Dadarahon ko sinda sa dagang mayaman sa gabos na bagay, siring sa sakong ipinanuga sa saindang mga ginikanan. Makukua ninda duman an gabos na pagkakan na saindang kaipuhan, asin toninong sindang mabubuhay. Alagad masamba sinda saka malingkod sa mga dios-dios. Matalikod sinda sako asin lalapason ninda an sakong tipan;

²¹ kaya dakul na karatan saka kahaditan an maabot sainda. Alagad aawiton man giraray an awit na ini, asin ini an magsasaksi laban sainda (huli ta padagos ining magigiromdoman kan saindang mga kapagarakian). Maski ngunyan, bago ko sinda darahon sa daga na sakong ipinanuga na itatao sainda, aram ko na an iniisip ninda.”

²² Kan aldaw man sanang iyan, isinurat ni Moises an awit dangan itinukdo iyan sa banwaan nin Israel.

²³ Dangan sinugo nin Kagurangnan si Josue, na aki ni Nun, asin tinaraman, “Magmaisog ka asin pakosoga an saimong boot. Papangenotan mo an banwaan nin Israel pasiring sa daga na ipinanuga ko sainda, asin iibahan taka.”

²⁴ Isinurat ni Moises an mga Togon nin Dios sa sarong libro; nag-ingat siya na dai malingawan an ano man.

²⁵ Pakatapos, sinabihan niya an mga pading Levita na namamahala kan Kaban nin Tipan nin Kagurangnan,

²⁶ “Kuahon nindo an librong ini nin katogonan asin ibugtak nindo sa kataed kan Kaban nin Tipan nin Kagurangnan na saindong Dios, tanganing danay na magsaksi laban sa saiyang banwaan.

²⁷ Aram ko kun gurano kasombikal asin katagas an payo kan banwaan na ini. Nagsombikal sinda tumang sa Kagurangnan mantang nabubuhay pa ako; orog na masombikal sinda saiya kun gadan na ako.

²⁸ Tiponon nindo sa atubang ko an gabos na lider asin opisyal kan mga tribu, tanganing ikapahayag ko sainda an mga bagay na ini. Aapodon ko an langit sagkod an daga tanganing magsaksi para sako laban sainda.

²⁹ Aram kong pagkagadan ko, magigin maraot an banwaan na ini, asin isisikwal ninda an itinukdo ko sainda. Sa maabot na aldaw, maraot an mangyayari sainda, huli ta papaanggoton ninda an Kagurangnan huli sa paggibo kan mga bagay na ipinapangalad niya.”

An Awit ni Moises

³⁰ Mantang nagdadangog an bilog na banwaan nin Israel, inawit ni Moises an awit na ini.