Deuteronomio 25 - Marahay na Bareta Biblia

¹ “Halimbawa nag-iwal an duwang lalaki asin nag-atubang sinda sa hukoman, dangan ibinaba kan hukom an desisyon na pagpatalingkas kan mayong sala asin pagkondenar kan nagkasala.

² Kun an nagkasala maninigong hampakon, papadapaon siya kan hukom dangan ipapahampak; an bilang kan hampak sosog sa gabat kan saiyang kasalan.

³ Pwede siyang hampakon nin kwarentang beses alagad dai na magsobra diyan; huli ta kun magsobra diyan, masosopogan na siya sa publiko.

⁴ “Dai nindo pagbusalan an baka kun ginagamit nindo sa pagginik.

Katongdan sa Gadan na Tugang na Lalaki

⁵ “Kun nag-eerok sa sarong harong an magtugang na lalaki, asin magadan an saro na mayo nin aking lalaki, an saiyang balo dai pwedeng magpaagom sa kiisay man sa luwas kan pamilya. Katongdan kan tugang kan nagadan an pag-agom sa balo kan saiyang tugang. Siya an maotob kan katongdan na nabayaan kan saiyang tugang.

⁶ An matua nindang lalaki mimidbidon na aki kan nagadan na tugang, tanganing an ngaran kaini dai mapara sa Israel.

⁷ Alagad kun an tugang kan nagadan magsayuma sa pag-agom kan balo, maduman an balo sa mga lider kan banwaan asin masabi, ‘Habong papagdanayon sa Israel kan sakong bayaw an ngaran kan saiyang tugang. Habo niyang gibohon sa sako an saiyang katongdan sa nagadan niyang tugang.’

⁸ Dangan an lalaki aapodon kan mga lider kan banwaan asin kakaolayon. Kun padagos siyang magsayuma sa pag-agom kan balo,

⁹ sa atubang kan mga lider kan banwaan, tatangkason kan balo an saro kan mga sandalyas kan lalaki, lulutaban siya sa lalawogon asin sasabihan, ‘Iyo ini an dapat gibohon sa lalaking habong magtao nin aki sa saiyang tugang.’

¹⁰ Sa bilog na Israel, an pamilya niya mamimidbid sa ngaran na, ‘an pamilya kan lalaki na tinangkasan nin sandalyas.’

Iba pang mga Pagboot

¹¹ “Kun mag-iwal an duwang lalaki asin magsurog an agom kan saro, dangan kinapotan kan babae an kinabuhay kan kaiwal kan saiyang agom,

¹² puputolan nin kamot an babaeng iyan; dai kamo maherak saiya.

¹³ “Dai kamo maggamit nin duwang klaseng pagabat sa saindong timbangan; sarong magabat asin sarong magian.

¹⁴ Dai kamo maggamit nin duwang klaseng takadan; sarong dakula asin sarong sadit.

¹⁵ Maggamit kamo nin tama asin mayong daya na mga timbangan saka takadan, tanganing maghalawig an saindong buhay duman sa daga na itatao saindo nin Kagurangnan na saindong Dios.

¹⁶ Ikinakaongis nin Kagurangnan an mga tawong madaya.

An Pagboot na Gadanon an mga Amalekita

¹⁷ “Giromdoma nindo an ginibo saindo kan mga Amalekita kan nagbabaklay kamo hale sa Egipto.

¹⁸ Mayo sindang pagkatakot sa Dios, kaya sinalakay ninda kamo sa likodan kan kamo nanluluya asin pagal na, dangan ginadan ninda an gabos na kairiba nindong nasa hurihan.

¹⁹ Kaya kun ligtas na kamo sa gabos nindong kaiwal na nag-eerok sa palibot nindo, asin itinao na saindo nin Kagurangnan na saindong Dios an dagang pamana, gadanon nindo an gabos na Amalekita tanganing mayo nang makagiromdom sainda. Dai nanggad kamo malingaw!