Deuteronomio 23 - Marahay na Bareta Biblia

An mga Dai Pwedeng Ibilang sa Banwaan nin Kagurangnan

¹ “An lalaking kapon o pinutolan nin kinabuhay dai pwedeng ibilang sa banwaan nin Kagurangnan.

² “An aki sa luwas, asin an saiyang kapagarakian sagkod sa ikasampolong henerasyon, dai pwedeng ibilang sa banwaan nin Kagurangnan.

³ “An mga Ammonita o mga Moabita, saka an saindang kapagarakian sagkod sa ikasampolong henerasyon, dai pwedeng ibilang sa banwaan nin Kagurangnan.

⁴ Nagsayuma sindang tawan kamo nin pagkakan asin inomon kan nagbabaklay kamo hale sa Egipto; tinandanan ninda si Balaam, na aki ni Beor na gikan sa Petor kan Mesopotamia, tanganing maldisyonon kamo.

⁵ Alagad dai si Balaam dinangog nin Kagurangnan na saindong Dios, asin an saiyang maldisyon ginibo nin Kagurangnan na magin bendisyon huli ta namotan niya kamo.

⁶ Sa bilog nindong pagkabuhay, dai nanggad nindo pagtabangan o pagpauswagon an mga banwaan na iyan.

⁷ “Dai kamo mauyam sa mga Edomita, huli ta mga kadugo nindo sinda. Dai kamo mauyam sa mga Egipcio, huli ta nag-erok kamo kaidto sa saindang daga.

⁸ Pwedeng ibilang sa banwaan nin Dios an saindang kapagarakian magpoon sa ikatolong henerasyon.

An Paglinig kan Kampo

⁹ “Kun kamo nasa kampo sa panahon nin gera, likayan nindo an paggibo nin ano man na maraot.

¹⁰ Kun an saro saindo magin maati huli ta linuwasan siya kan sadiring banhi pagkabanggi, kaipuhan magluwas siya sa kampo asin duman ngona siya.

¹¹ Makarigos siya pagkahapon, asin pagsolnop kan aldaw pwede na siyang magbalik.

¹² “Magkaigwa kamo nin kasilyasan sa luwas kan kampo.

¹³ Sa saindong mga kagamitan, kaipuhan magkaigwa kamo nin taldok na gagamiton nindo sa pagkalot asin sa pagtambon kan saindong odo kun kamo magkasilyas.

¹⁴ Linigan nindo an saindong kampo huli ta kaiba nindo diyan an Kagurangnan na saindong Dios sa pagligtas saindo asin sa pagtao saindo nin kapangganahan laban sa saindong mga kaiwal. Dai kamo maggibo nin ano man na kadustaan tanganing dai kamo bayaan nin Kagurangnan.

Iba pang mga Pagboot

¹⁵ “Kun magdulag sa saiyang amo an sarong oripon, asin magdolok saindo sa paghagad nin tabang, dai nindo siya pagpabalikon sa saiyang amo.

¹⁶ Pwede siyang mag-erok sa arin man kan saindong mga banwa na pilion niya, asin dai nindo siya pag-apihon.

¹⁷ “Mayo nin Israelita, lalaki man o babae, na maggibo nin karigsokan sa Templo bilang bayadan na maraot na lalaki o babae.

¹⁸ An kwartang kabayadan kan siring na karigsokan dai dapat pagdarahon sa templo nin Dios bilang pag-otob nin sarong panuga; ikinakaongis nin Kagurangnan an siring na mga tawo.

¹⁹ “Kun magpautang kamo nin kwarta, pagkakan o ano man na bagay sa kapwa nindo Israelita, dai nindo pagpatuboan.

²⁰ Pwede nindong patuboan an utang nin dayuhan, alagad bako an utang kan kapwa nindo Israelita. Kuyogon nindo an pagboot na ini asin bebendisyonan kamo nin Kagurangnan na saindong Dios sa gabos nindong gigibohon duman sa daga na masasadirihan nindo.

²¹ “Kun manuga kamo sa Kagurangnan na saindong Dios, kaipuhan otobon nindo iyan. Sisingilon kamo nin Kagurangnan asin magkakasala kamo kun dai nindo otobon iyan.

²² Bakong kasalan an dai manuga sa Kagurangnan,

²³ alagad kun manuga kamo saiya, kaipuhan otobon nindo.

²⁴ “Kun magduman kamo sa ubasan nin saindong kapwa, pwede kamong magkakan kan ubas na kaya nindong kakanon, alagad dai na kamo magdara.

²⁵ Kun magduman kamo sa trigohan kan saindong kapwa, pwede nindong kakanon an trigong mabulnot nindo alagad dai kamo maggamit nin asyab.