Deuteronomio 22 - Marahay na Bareta Biblia

¹ “Kun mahiling nindo na nakabutas an baka o karnero kan saindong kapwa Israelita, dai kamo magpabaya; dakopon nindo an hayop asin ipuli saiya.

² Alagad kun harayo an erokan kan kagsadiri o kun dai nindo siya midbid, darahon nindo an hayop saindo. Kun mag-abot an kagsadiri na naghahanap kan hayop, ibalik nindo iyan saiya.

³ Siring man an gibohon nindo kun makakua kamo nin asno, gubing o ano man na nawara kan kapwa nindo Israelita.

⁴ “Kun mapalugmok an sarong asno o baka kan kapwa nindo Israelita, dai kamo magpabaya; tabangan nindo siyang mapatindog giraray an hayop.

⁵ “An mga babae dai dapat maggubing kan sa lalaki; an mga lalaki dai dapat maggubing kan sa babae; ikinakaongis nin Kagurangnan na saindong Dios an mga tawo na minagibo kaiyan.

⁶ “Kun sa kahoy o sa daga makanumpong kamo nin salagan nin gamgam, saen pinaglulukoban kan ina an mga siwo o an mga sugok niya, dai nindo pagkuahon an ina.

⁷ Pwede nindong kuahon an mga siwo alagad butasan nindo an ina, tanganing maghalawig asin mag-uswag an saindong buhay.

⁸ “Kun magtugdok kamo nin bagong harong, bugtakan nindo nin barandilya an palibot kan atop, tanganing dai kamo pagbasolon kun igwa nin mahulog saka magadan duman.

⁹ “Dai kamo magtanom nin ibang banhi sa saindong ubasan; kun gibohon nindo iyan, ipapangalad saindo an pagkakan kan ubas o kan bunga kan iba nindong itinanom.

¹⁰ “Dai nindo ipag-aradong sabay an baka asin an asno.

¹¹ “Dai kamo magsulot nin gubing na gibo sa pinagsalak na telang lana saka lino.

¹² “Palaylayan nindo nin kordon an apat na kanto kan saindong alikboy.

Mga Pagboot manongod sa Kabinian

¹³ “Halimbawa nag-agom an sarong lalaki, asin pakatapos na dorogan niya an saiyang agom, hinaboan niya.

¹⁴ Dangan pinakaraot niya an babae asin ipinamareta na bako na siyang birhen kan maagom niya.

¹⁵ “Kun mangyari ini, dadarahon kan mga magurang kan babae sa mga lider kan banwa an may dugo pang tamong na mapatunay na birhen pa an saindang aki kan agomon.

¹⁶ Masabi sainda an ama kan babae, ‘Ipinaagom ko sa lalaking ini an sakuyang aki, asin ngunyan hinaboan na niya.

¹⁷ Pinakaraot niya an sakuyang aki asin ipinamareta na bako na siyang birhen kan agomon niya. Alagad uya an magpapatunay na birhen pa an sakong aki.’ Sa atubang kan mga lider kan banwa, bibikladon ninda an nadugoan na tamong.

¹⁸ Dangan kukuahon kan mga lider kan banwa an agom na lalaki asin hahampakon ninda.

¹⁹ Mumultahan pa ninda siya nin sanggatos na pedaso nin plata, na itatao sa ama kan babae, huli ta pinakaraot niya an sarong babae nin Israel. An babae padagos na magigin saiyang agom asin dai niya pwedeng suhayan sa bilog niyang pagkabuhay.

²⁰ “Alagad kun totoo an sumbong laban sa babae asin mayo nin ebidensya na siya birhen,

²¹ dadarahon ninda an babae sa may pintoan kan harong kan saiyang ama. Duman gagapoon siya kan mga lalaki kan banwa sagkod na siya magadan. Nakaginibo siya nin karatan sa satong banwaan; nagpadorog siya bago nagpaagom, kan nag-eerok pa siya sa harong kan saiyang ama. Sa siring na paagi, mahahale saindo an karatan na ini.

²² “Kun madakop an sarong lalaki na nakikidorog sa agom nin iba, gagadanon sindang duwa. Sa siring na paagi, mahahale saindo an karatan na ini.

²³ “Kun madakop sa laog kan banwa an sarong lalaki na nakikidorog sa babae na katrato nin iba,

²⁴ darahon nindo sindang duwa sa luwas kan banwa asin duman gapoon nindo sagkod na magadan. Gagadanon an babae huli ta dai siya nagkurahaw sa paghagad nin tabang maski yaon man sana siya sa laog kan banwa. Gagadanon man an lalaki huli ta dinorogan niya an sarong babae na katrato nin iba. Sa siring na paagi, mahahale saindo an karatan na ini.

²⁵ “Kun sa luwas kan banwa lupigan nin sarong lalaki an babae na katrato nin iba, an lalaki sana an gagadanon.

²⁶ Dai papadusahan an babae huli ta dai man siya nakaginibo nin kasalan na maninigong silotan nin kagadanan. Arog ini kan kaso nin sarong lalaki na tuyong nanggadan kan saiyang kapwa.

²⁷ Linupigan an babae sa luwas kan banwa; maski siya nagkurahaw sa paghagad nin tabang, mayo nin makakatabang saiya duman.

²⁸ “Kun nadakop an sarong lalaki na linupigan an sarong birhen na mayo pang katrato,

²⁹ kaipuhan bayadan niya nin singkwentang pedasong plata an ama kan babae, asin magigin agom niya an babae huli ta pinirit niyang magdorog saiya. Dai niya pwedeng suhayan an babae sa bilog niyang pagkabuhay.

³⁰ “Dai dapat sopogon nin siisay man na lalaki an saiyang ama, sa pagdorog niya sa arin man kan mga agom kan saiyang ama.