Deuteronomio 21 - Marahay na Bareta Biblia

Manongod sa mga Dai Midbid na Paragadan

¹ “Kun may makua kamong tawong gadan sa daga na itatao saindo nin Kagurangnan na saindong Dios, asin dai nindo aram kun siisay an guminadan saiya,

² maduman an mga lider asin an mga hukom dangan saindang susukolon an distansya magpoon sa lugar na namumugtakan kan bangkay sagkod sa mga haraning banwa.

³ Dangan an mga lider kan banwa na pinakaharani sa lugar na nakuahan kan bangkay mapili nin sarong torilyong baka na dai pa ginamit sa pagtrabaho.

⁴ Dadarahon ninda an baka sa sarong lugar na dai pa inarado o tinanoman, harani sa sarong burabod na dai naghuhubas an tubig, asin duman ninda babarion an liog kan hayop.

⁵ Maduman man an mga pading Levita huli ta sinda an mahukom kan lambang kaso manongod sa kadahasan. Pinili sinda nin Kagurangnan na saindong Dios tanganing maglingkod saiya asin magbendisyon sa ngaran niya.

⁶ Dangan an gabos na lider kan banwa na pinakaharani sa lugar na nakuahan kan bangkay mahanaw kan saindang mga kamot sa ibabaw kan baka

⁷ asin masabi, ‘Bako kami an naggadan kan tawong iyan asin dai mi aram kun siisay an naggibo kaiyan.

⁸ Kagurangnan, patawada an Israel na saimong banwaan na ilinigtas mo sa Egipto. Patawada kami asin hare kami pagpasimbaga sa pagkagadan nin sarong tawo na mayong sala.’

⁹ Huli sa paggibo nindo kan matanos sa atubang nin Kagurangnan, dai kamo maninimbag para sa sarong krimen.

Manongod sa mga Babaeng Nabihag sa Gera

¹⁰ “Kun itao saindo nin Kagurangnan, na saindong Dios, an kapangganahan sa gera asin nakabihag kamo

¹¹ dangan nakahiling kamo nin sarong magayon na babae na nagustohan nindo saka boot nindong agomon,

¹² dadarahon nindo siya sa saindong harong. Duman aarisan niya an saiyang payo, puputolan an saiyang mga kuku

¹³ asin riribayan an saiyang gubing. Mag-eerok siya sa saindong harong asin magmomondo para sa saiyang mga magurang sa laog nin sarong bulan. Pakatapos, pwede na nindo siyang agomon.

¹⁴ Kun habo kamo saiya, talingkasan nindo siya. Huli ta pinirit nindo siya na dorogan kamo, dai nindo siya pwedeng ipabakal o gibohon na oripon.

Manongod sa Mamanahon kan Matua

¹⁵ “Halimbawa an sarong lalaki igwa nin duwang agom, asin padangat niya an saro sainda. Dangan nagkaaki siya sa duwa, alagad an matuang lalaki bakong aki kan padangat niyang agom.

¹⁶ Kun hirason na niya sa saiyang mga aki an saiyang pagsadiri, dai niya dapat pagpaorogon an aki kan padangat niyang agom huli sa pagtao saiya kan kahirasan na para sa matua niyang aki.

¹⁷ Doble an dapat na itao niyang kahirasan sa saiyang matua, minsan aki siya kan bako niyang padangat na agom. Kaipuhan midbidon niya an saiyang matua asin itao saiya an kahirasan na para saiya.

Manongod sa Sutil na Aki

¹⁸ “Halimbawa an sarong tawo igwa nin aking lalaki na sutil asin matumang, sarong aki na dai nagkukuyog sa saiyang mga magurang maski pinapadusahan na ninda siya.

¹⁹ An aki dadarahon kan mga magurang sa mga lider kan banwa na pinag-eerokan ninda.

²⁰ Masabi sinda sa mga lider, ‘Sutil saka matumang an aki ming ini asin habong magkuyog samo; paslo siya sagkod paraburat.’

²¹ Dangan gagapoon siya kan mga lalaki kan syudad sagkod na siya magadan; sa siring na paagi mahahale sa tahaw nindo an karatan na ini. Madadangog ini kan bilog na Israel asin matatakot sinda.

Manlaen-laen na Pagboot

²² “Kun an sarong tawo ginadan huli ta siya sarong kriminal, asin an saiyang bangkay binitay sa kahoy,

²³ dai iyan dapat pagpaagahan. Kaipuhan ilubong an bangkay sa aldaw man sanang iyan, huli ta an bangkay na nabibitay sa kahoy nagdadara sa daga kan maldisyon nin Dios. Ilubong nindo an bangkay tanganing dai madigtaan an daga na itatao saindo nin Kagurangnan na saindong Dios.