Deuteronomio 20 - Marahay na Bareta Biblia

Manongod sa Gera

¹ “Kun magluwas kamo sa pakigera sa saindong mga kaiwal, asin mahiling nindo na mas dakul ki sa saindo an saindang mga kabayo, karwahe asin hukbo, dai kamo matakot sa sainda; kaibahan nindo an Kagurangnan na saindong Dios na nagluwas saindo hale sa Egipto.

² Bago kamo makilaban, sarong padi an mapaenotan asin masabi sa hukbo,

³ ‘Pagdangog, Israel. Makikigera kamo ngunyan na aldaw. Magmaisog kamo; dai kamo magtakig o matakot sa saindong mga kaiwal.

⁴ Iibahan kamo nin Kagurangnan na saindong Dios asin tatawan niya kamo nin kapangganahan.’

⁵ “Dangan masabi sa hukbo an mga opisyal, ‘Igwa digdi sa saindong nagtugdok nin harong asin dai pa nag-erok duman? Kun igwa, magpuli na siya; tibaad magadan siya sa gera asin iba an mag-erok sa saiyang harong.

⁶ Igwa digdi sa saindong nagtanom nin ubas asin dai pa nagkinabang kan bunga kaiyan? Kun igwa, magpuli na siya; tibaad magadan siya sa gera asin iba an magkinabang kan bunga.

⁷ Igwa digdi sa saindong nakatalaan na mag-agom? Kun igwa, magpuli na siya; tibaad magadan siya sa gera asin iba an makaagom sa katrato niya.’

⁸ “Masabi pa sa hukbo an mga opisyal, ‘Igwa digdi sa saindong takot asin maluya an boot? Kun igwa, magpuli na siya; tibaad mapaluya pa niya an boot kan iba.’

⁹ Pakasabi sa hukbo kan mga opisyal, dangan pa sana mapili kan mga lider na mangengenot sa lambang grupo.

¹⁰ “Bago nindo salakayon an sarong syudad, alokon ngona nindo na magsuko an mga tawo duman.

¹¹ Kun bukasan ninda an mga trangkahan dangan magsuko, sinda gabos magigin mga oripon nindo asin obligado sindang magtrabaho para saindo.

¹² Alagad kun habong magsuko an mga nag-eerok sa syudad asin magdesisyon na lumaban sa saindo, palibotan nindo an syudad.

¹³ Dangan kun tugotan na kamo nin Kagurangnan na saindong Dios na sakopon an syudad, gadanon nindo an gabos na lalaki duman.

¹⁴ Alagad pwede nindong kuahon para saindo an mga babae, mga aki, mga hayop sagkod an gabos na yaon sa syudad. Pwede nindong gamiton an gabos na pagrogaring kan saindong mga kaiwal; iyan gabos itinao saindo nin Kagurangnan.

¹⁵ Siring kaiyan an gibohon nindo sa mga syudad na harayo sa dagang eerokan nindo.

¹⁶ “Alagad sa mga syudad sa dagang itatao saindo nin Kagurangnan na saindong Dios, gadanon nindo an lambang saro.

¹⁷ Gadanon nindo an gabos na tawo: an mga Heteo, Amoreo, Cananeo, Perezeo, Heveo, saka an mga Jebuseo, siring sa ipinagboot saindo nin Kagurangnan.

¹⁸ Gadanon nindo sinda tanganing dai kamo matukdoan na magkasala sa Kagurangnan huli sa paggibo kan mga makauuyam na bagay na ginigibo ninda sa pagsamba sa saindang mga dios-dios.

¹⁹ “Kun sinasakop nindo an sarong syudad, dai nindo pagpalodon an ano man na kahoy na namumunga, maski mahaloy nin marahay an saindong pagsakop. Kakanon nindo an mga bunga, alagad dai nindo pagpalodon an mga kahoy; bako iyan an saindong mga kaiwal.

²⁰ Pwede nindong palodon an mga kahoy na dai kinakakan an bunga tanganing magamit nindo sa pagsalakay kan syudad, sagkod na masakop nindo iyan.