Deuteronomio 19 - Marahay na Bareta Biblia

An mga Syudad na Pailihan

¹ “Kun tunawon na nin Kagurangnan na saindong Dios an mga tawo, na kagsadiri kan daga na itatao niya saindo, asin kun masadirihan na nindo an saindang mga syudad saka mga harong dangan mag-erok na kamo duman,

^2-3 pagtolohon nindo an daga. An lambang kabtang dapat igwa nin sarong syudad na madaling madumanan nin siisay man. Dangan an tawo na makagadan nin saiyang kapwa, pwedeng makadulag tolos pasiring sa arin man sa mga syudad na iyan.

⁴ Kun an sarong tawo dai tuyong makagadan nin kapwa na bako man niya kaiwal, pwede siyang makadulag pasiring sa saro kan mga syudad na iyan tanganing makaligtas siya.

⁵ Halimbawa igwa nin duwang lalaking magkaibahan na nagpasiring sa kadlagan sa pagputol nin kahoy, dangan mantang nagpuputol nin kahoy an saro, natangkas an tarom kan saiyang patok asin nakatama sa saiyang kaibahan na iyo an ikinagadan kaini, an nakagadan pwedeng magduman sa saro sa tolong syudad na iyan asin siya magigin ligtas duman.

⁶ Kun saro sana an syudad, pwedeng harayo ini nin marahay, kaya pwedeng maabotan kan kadugo kan nagadan an lalaking nakagadan, asin sa saiyang kaanggotan, ini saiyang magadan minsan inosente, huli ta aksidente man sana an pakagadan niya sa lalaki na bako man niya kaiwal.

⁷ Kaya ipinagboboot ko saindo na maglaen kamo nin tolong syudad.

⁸ “Kun padakulaon na nin Kagurangnan na saindong Dios an saindong teritoryo, siring sa itinaram niya sa saindong mga ginikanan, asin itao na niya saindo an daga na saiyang ipinanuga,

⁹ magpili kamo nin tolo pang syudad. (Itatao niya saindo an dagang ini kun kuyogon nindo an gabos na ipinagboot ko saindo ngunyan, asin kun kamotan nindo an Kagurangnan na saindong Dios dangan mamuhay kamo sosog sa saiyang mga katukdoan.)

¹⁰ Gibohon nindo ini tanganing dai magadan an mga inosenteng tawo asin tanganing dai kamo makondenar sa paggadan sainda duman sa daga na itatao saindo nin Kagurangnan.

¹¹ “Alagad kun tuyong gadanon kan sarong tawo an saiyang kaiwal, dangan magdulag siya pasiring sa saro kan mga syudad na pailihan,

¹² ipapakua siya duman kan mga lider kan saiyang banwa asin itatao sa kadugo kan biktima tanganing gadanon.

¹³ Dai kamo maherak saiya. Linigan nindo an Israel kan paragadan na ini, tanganing an gabos magin marahay para saindo.

Mga Daan na Muhon

¹⁴ “Sa daga na itatao saindo nin Kagurangnan na saindong Dios, dai nindo paghiroon an mga muhon kan saindong kanatad, muhon na ibinugtak kaidto pang panahon.

Manongod sa mga Saksi

¹⁵ “Kulang an saro sanang saksi tanganing makondenar an sarong tawo para sa ano man na krimen; duwa o tolong saksi an kaipuhan sa pagpatotoo na an tawo nagkasala.

¹⁶ Kun an sarong tawo boot magpakaraot kan saiyang kapwa huli sa pagsaksi nin putik,

¹⁷ an duwa maduman sa lugar na pagsasambahan asin maatubang sa mga padi saka mga hukom na nakatalaan sa panahon na iyan.

¹⁸ An kaso sisiyasaton nin marahay kan mga hukom, dangan kun mapatotoohan na an lalaki nagsaksi nin putik laban sa kapwa niya Israelita,

¹⁹ itatao saiya an padusa na dapat kuta nang itao sa saiyang kapwa. Sa siring na paagi, mahahale an karatan na iyan sa tahaw nindo.

²⁰ Dangan an nangyari maaaraman kan gabos asin matatakot sinda, kaya mayo na nin magibo kan siring na karatan.

²¹ Dai kamo magpahiling nin pagkaherak; an padusa kaipuhan buhay sa buhay, mata sa mata, ngipon sa ngipon, kamot sa kamot, asin bitis sa bitis.