Deuteronomio 18 - Marahay na Bareta Biblia

An Kahirasan kan mga Padi

¹ “An mga pading Levita, an bilog na tribu ni Levi, dai tatawan nin kahirasan sa daga nin Israel; mabubuhay sinda sa mga dolot asin sa iba pang sakripisyo na itinatao sa Kagurangnan.

² Mayo sindang masasadirihan na daga, bakong arog sa ibang mga tribu; an kahirasan ninda iyo an Kagurangnan, siring sa saiyang panuga sainda.

³ “Sa lambang baka o karnero na iaatang, itatao sa kapadian an abaga, an panga asin an tulak.

⁴ Mapapasainda an mga enot na kahirasan kan ani, arak, saka lana nin oliba; mapapasainda man an enot na ginunting na barahibo nin karnero.

⁵ Sa gabos na tribu, pinili nin Kagurangnan an tribu ni Levi tanganing maglingkod sa saiya bilang mga padi sagkod pa man.

⁶ “An siisay man na Levita hale sa arin man na banwa sa Israel, kun boot niya, pwedeng magduman sa lugar na pagsasambahan,

⁷ asin duman pwedeng maglingkod siya bilang padi nin Kagurangnan na saiyang Dios, siring kan ibang Levita na naglilingkod duman.

⁸ Arog kan ibang padi, mag-aako siya nin parehong kahirasan nin pagkakan, asin pwede niyang sarayon an ano man na padara kan saiyang pamilya.

Patanid laban sa mga Paganong Kaugalean

⁹ “Kun makaabot na kamo sa daga na itinatao saindo nin Kagurangnan na saindong Dios, hare kamo pagsunod sa mga makauuyam na kaugalean kan mga nasyon na yaon duman.

¹⁰ Dai nindo pagtutongon sa altar an saindong mga aki bilang atang; dai nindo pagtugotan an siisay man na Israelita na maghula, maghimalad, magtood-tood o mangkulam,

¹¹ maggamit nin anting-anting, mag-espiritista o magsalamangka.

¹² Ikinakaongis nin Kagurangnan an mga tawong naggigibo kaiyan, kaya ngani papahaleon niya an mga nasyon na idto sa pagdangadang nindo.

¹³ Magmaimbod kamo sa Kagurangnan na saindong Dios.”

An Panuga na Masugo nin Propeta

¹⁴ Dangan nagsabi si Moises, “Sa daga na lalaogan nindo, an mga tawo nagsusunod sa mga hulit kan mga paratood-tood saka mga parahula; alagad ipinapangalad nin Kagurangnan na saindong Dios an paggibo nindo kaiyan.

¹⁵ Masugo siya nin sarong propeta na arog sako hale sa saindong banwa, asin kukuyogon nindo siya.

¹⁶ “Kan nagtiripon kamo sa Bukid nin Sinai, nakimaherak kamo na dai na magdangog kan tingog nin Kagurangnan, asin habo na nindong mahiling an naglalaad na kalayo, huli ta tibaad magadan kamo.

¹⁷ Kaya nagtaram sako an Kagurangnan, ‘Tama an sinabi ninda.

¹⁸ Papadarahan ko sinda nin sarong propeta na arog saimo hale sa saindang banwaan; tataraman ko siya kun ano an saiyang sasabihon, asin ipapahayag niya sa mga tawo an gabos kong ipinagboboot.

¹⁹ Mataram siya sa ngaran ko, asin papadusahan ko an siisay man na dai magkuyog saiya.

²⁰ Alagad kun igwa nin sarong propeta na mangahas magpahayag nin mensahe sa ngaran ko, na dai ko man ipinagboot na gibohon, magagadan siya huli kaiyan. Siring man, magagadan an siisay man na propeta na magtaram sa ngaran nin ibang dios.’

²¹ “Siguro saindong iisipon kun paano nindo maaaraman na an mensahe kan propeta bakong hale sa Kagurangnan.

²² Kun an sarong propeta magtaram sa ngaran nin Kagurangnan, dangan dai magkatotoo an saiyang sinabi, kun siring, bako iyan mensahe nin Kagurangnan. Nagtaram an propetang iyan sa saiyang sadiring kapangyarihan, asin dai kamo dapat na matakot saiya.