Deuteronomio 13 - Marahay na Bareta Biblia

¹ “Kun an sarong propeta o an sarong parapaliwanag nin mga pangatorogan manuga saindo nin sarong tanda o ngangalasan,

² tanganing madara kamo sa pagsamba asin paglingkod sa mga dios-dios na dai pa nindo sinamba kaidto, magkatotoo man an saiyang sinabi,

³ dai kamo magtubod saiya. Ginagamit siya nin Kagurangnan na saindong Dios sa pagbalo saindo tanganing mahiling niya kun talagang namomotan nindo siya sa bilog nindong puso.

⁴ Magsunod kamo sa Kagurangnan na saindong Dios asin matakot kamo saiya; kuyogon nindo siya asin otobon an saiyang mga pagboot; sambahon nindo siya asin magmaimbod kamo sa saiya.

⁵ Alagad gadanon nindo an propeta o an parapaliwanag nin mga pangatorogan na idto, huli ta tinutukdoan niya kamo na magtumang sa Kagurangnan, na nagligtas saindo sa Egipto, saen kamo nagin mga oripon. Maraot an tawong iyan huli ta dinadagka niya kamong magtalikod sa pamumuhay na ipinagboot nin Kagurangnan. Kaipuhan gadanon siya tanganing mahale an karatan na iyan sa tahaw nindo.

⁶ “Kun an saindong tugang o an aki nindong lalaki o babae, o an namomotan nindong agom o an saindong nangongorog na katood, hilom na magdagka saindo na magsamba sa ibang mga dios na dai pa nindo sinamba asin kan saindong mga ginikanan,

⁷ mga dios-dios kan mga tawo sa palibot nindo, harani man o harayo, magpoon sa sarong poro sagkod sa ibong na poro kan daga;

⁸ dai kamo magdangog saka magtubod saiya. Dai kamo maherak saiya; dai nindo siya pagtagoon o buhayon.

⁹ Gadanon nindo siya! Pangenotan nindo an paggapo saiya, dangan pabayaan nindong gapoon siya kan gabos.

¹⁰ Gapoon nindo siya sagkod na magadan, huli ta irinarayo niya kamo sa Kagurangnan na saindong Dios na nagligtas saindo sa Egipto, saen kamo nagin mga oripon.

¹¹ Dangan madadangog kan gabos na tawo sa Israel an nangyari; matatakot sinda kaya mayo na nin magibo kan siring na karatan.

¹² “Kun sa saro kan mga banwaan na itinao saindo nin Kagurangnan na saindong Dios na pag-erokan nindo, madangog nindo

¹³ na nagkapirang maraot na tawo an nagdagka sa mga nag-eerok sa banwa na magsamba sa mga dios-dios na dai pa lamang nindo sinamba kaidto,

¹⁴ magsiyasat kamo nin marahay. Kun totoo na nangyari an siring na karatan,

¹⁵ gadanon nindo an gabos na tawo sa banwa na iyan, asin an gabos nindang hayop. Rumpagon nindo an bilog na banwa.

¹⁶ Darahon nindo asin tambakon sa plasa an gabos na pagsadiri kan mga tawo na nag-eerok duman, dangan suloon nindo an banwa na iyan asin an gabos na yaon duman bilang sarong tinutong na atang sa Kagurangnan na saindong Dios. Papabayaan na rumpag an banwa asin dai na papatindogon giraray sagkod lamang.

¹⁷ Dai kamo magtago nin ano man na pinagkondenar na raoton, tanganing dai maanggot kundi maherak saindo an Kagurangnan. Maheherak siya saindo asin papadakulon niya kamo siring sa panuga niya sa saindong mga ginikanan,

¹⁸ kun kuyogon nindo an saiyang mga togon na ipinagboot ko saindo ngunyan na aldaw, asin gibohon nindo an matanos sa atubang nin Kagurangnan na saindong Dios.