Deuteronomio 1 - Marahay na Bareta Biblia

Ipinagiromdom ni Moises an Panuga nin Kagurangnan

¹ Iyo ini an mga ipinahayag ni Moises sa banwaan nin Israel kan yaon sinda duman sa kalangtadan, sa sirangan kan Salog nin Jordan. Nasa kapantayan sinda kan Jordan, harani sa Suf, sa pagultanan kan banwa nin Paran asin kan mga banwa nin Tofel, Laban, Hazerot, asin Dizahab. (

² An distansya hale sa Bukid nin Sinai sagkod sa Kades-barnea mababaklay sa laog nin onseng aldaw kun mag-agi sa kabubuldan nin Edom.)

³ Sa enot na aldaw kan ikaonseng bulan kan ikakwarentang taon pakahale ninda sa Egipto, sinabihan ni Moises an mga Israelita kan gabos na ipinagboot saiya nin Kagurangnan na itaram sainda,

⁴ pakatapos na daogon nin Kagurangnan si Sihon na hade kan mga Amoreo na nag-erok sa Hesbon, saka si Og na hade nin Basan na nag-erok sa Astarot asin Edrei.

⁵ Mantang nasa ibong sinda kan Jordan, sa daga nin Moab, ipinaliwanag sainda ni Moises an mga togon asin katukdoan nin Dios. Nagsabi siya,

⁶ “Kan kita nasa Bukid nin Sinai, nagtaram satuya an Kagurangnan na satong Dios, ‘Haloy na kamo sa bukid na ini.

⁷ Maghale na kamo asin magpasiring sa mabulod na daga kan mga Amoreo asin sa gabos na rehiyon sa palibot—sa Kapantayan nin Jordan, sa kabubuldan asin mga kababan, sa habagat na parte kan daga nin Canaan, asin sa baybayon kan Mediteraneo. Magduman kamo sa daga nin Canaan, sa Lebanon, sagkod sa dakulang Salog nin Eufrates.

⁸ Ini gabos inandam ko para saindo; dumanon nindo asin sakopon an daga na ipinanuga ko na itatao sa saindong mga ginikanan, ki Abraham, ki Isaac, asin ki Jacob sagkod sa saindang kapagarakian.’”

Nagbugtak si Moises nin mga Hukom

⁹ Nagsabi si Moises sa mga tawo, “Sinabihan ko kamo kaidto, ‘Kun ako sana, dai ko kaya an pamahala saindo.

¹⁰ Ginibo nin Kagurangnan na saindong Dios na magdakul kamo siring sa mga bitoon sa langit.

¹¹ Padakulon pa logod kamo nin sangribong beses nin Kagurangnan, an Dios kan saindong mga ginikanan, asin bendisyonan kamo siring sa saiyang panuga!

¹² Alagad solo sana ako, kaya paano kong madadara an gabat nindo asin kan saindong mga kaso?

¹³ Pumili kamo nin mga lalaking madonong, may pakasabot asin may kakayahan sa lambang tribu, dangan ibubugtak ko sinda bilang mga pamayo nindo.’

¹⁴ Nag-oroyon kamo na iyo ini an tamang gibohon.

¹⁵ Kaya linaen ko an pinili nindong mga madonong asin may kakayahan na mga lalaki sa saindong tribu, dangan ibinugtak ko sindang pamayo nindo. An iba namayo sa sangribong tawo, an iba sa sanggatos, an iba sa singkwenta asin an iba sa sampolo. Nagbugtak man ako nin ibang mga opisyal sa mga tribu.

¹⁶ “Sinabihan ko sinda kaidto, ‘Dangogon nindo an mga kasong idinodolok saindo kan mga tawo, asin hukoman nindo nin matanos an kaso kan kapwa nindo Israelita o kan mga dayuhan na nakikihimanwa saindo.

¹⁷ Dai kamo magpaorog sa kiisay man; hukoman nindo nin matanos an gabos, maski siisay siya. Dai kamo matakot sa kiisay man, huli ta hale sa Dios an paghukom na itatao nindo. Kun an kaso dipisil para saindo, darahon nindo sako, asin ako an madesisyon kaiyan.’

¹⁸ Itinukdo ko man saindo kaidto an gabos na gigibohon nindo.

Sinugo an mga Espiya

¹⁹ “Sinunod ta an pagboot nin Kagurangnan na satong Dios. Naghale kita sa Bukid nin Sinai asin naglakaw sa mahiwas asin makatakot na desyerto pasiring sa mabulod na daga kan mga Amoreo. Kan nakaabot kita sa Kades-barnea,

²⁰ sinabihan ko kamo, ‘Uya na kamo sa mabulod na daga kan mga Amoreo, an daga na itinatao sato nin Kagurangnan na satuyang Dios.

²¹ Hilinga nindo an daga; lakaw kamo asin sakopon nindo siring sa ipinagboot niya. Dai kamo magduwa-duwa o matakot.’

²² “Alagad nagdolok kamo sako asin nagsabi, ‘Magpadara ngona kita nin mga espiya tanganing siyasaton an daga, asin aramon kun arin an pinakamarahay na dalan na satong aagihan, asin kun anong klase an mga syudad na satong lalaogon.’

²³ “Pinagmarahay ko an saindong kaisipan, kaya nagpili ako nin doseng lalaki, saro hale sa lambang tribu.

²⁴ Nagduman sinda sa mabulod na daga sagkod sa Kapantayan nin Escol asin siniyasat idto.

²⁵ Dinarahan ninda kita nin mga bunga na nakua ninda duman, asin inosipan kita na matubang an daga na itinatao satuya nin Kagurangnan na satong Dios.

²⁶ “Alagad sinuhay nindo an pagboot nin Kagurangnan na saindong Dios, asin habo kamong maglaog sa daga.

²⁷ Nagngorob-ngorob kamo sa saindong mga tolda asin nagsarabi, ‘Naaanggot satuya an Kagurangnan. Ilinuwas niya kita sa Egipto tanganing itao sa mga Amoreo asin gadanon ninda.

²⁸ Tano na magduman kita? Tinakot kita kan satuyang mga sinugo na nagsasabing darakula saka haralangkaw ki sa sato an mga tawo duman, asin nag-eerok sinda sa mga syudad na an kudal abot sa langit. Nakahiling sinda nin mga higante duman!’

²⁹ “Alagad sinabihan ko kamo, ‘Dai kamo matakot sainda.

³⁰ An Kagurangnan na saindong Dios an mangengenot saindo asin makikilaban para saindo, arog kan nahiling nindong ginibo niya sa Egipto

³¹ asin sa kalangtadan. Nahiling nindo kun paano niya kamo dinara sa lugar na ini, siring sa pagdara nin sarong ama sa saiyang aki.’

³² Alagad maski sinabi ko na ini saindo, dai man giraray kamo nagtubod sa Kagurangnan,

³³ maski danay na nangenot siya saindo tanganing ihanap kamo nin lugar na tutugdokan kan saindong mga tolda saka tanganing itukdo niya saindo an dalan na aagihan, sa paagi nin hariging kalayo kun banggi, saka hariging panganoron kun aldaw.

Pinadusahan nin Dios an Israel

³⁴ “Nadangog nin Kagurangnan an saindong mga reklamo asin naanggot siya, kaya nagsumpa siyang,

³⁵ ‘Mayo nin siisay man sa maraot na kapagarakian na ini an makakaabot sa matubang na dagang ipinanuga ko na itatao sa saindong mga ginikanan.

³⁶ Si Caleb na aki ni Jefunne, iyo sana an makakalaog duman. Nagmaimbod siya sako, kaya itatao ko saiya asin sa mga kapagarakian niya an daga na saiyang linakawan!’

³⁷ Huli saindo, naanggot man sako an Kagurangnan asin nagtaram, ‘Maski ika, Moises, dai makakaabot duman.

³⁸ Alagad pakosoga an boot kan saimong katabang na si Josue na aki ni Nun. Siya an mangengenot sa Israel sa pagsakop kan daga.’

³⁹ “Dangan nagtaram an Kagurangnan sa satuya gabos, ‘Makakaabot duman an saradit nindong mga aki, na dai pa nakakaaram kan maraot saka kan marahay, sinda na sinabi nindong mabibihag kan mga kaiwal. Itatao ko sainda an daga asin mag-eerok sinda duman.

⁴⁰ Alagad kamo, magbalik kamo sa direksyon kan Dagat na Pula.’

⁴¹ “Nagsimbag kamo sako, ‘Nagkasala kami sa Kagurangnan; matukad na kami asin masalakay siring sa ipinagboot samo nin Kagurangnan na satong Dios.’ Dangan nag-andam sa pakilaban an lambang saro, sa paghona na pasil an pagtukad sa mabulod na daga.

⁴² “Alagad nagtaram sako an Kagurangnan, ‘Patanidan mo sinda na dai magsalakay, huli ta dai ko sinda iibahan, asin dadaogon sinda kan saindang mga kaiwal.’

⁴³ Pinatanidan ko kamo alagad habo kamong magdangog. Sinuhay nindo an pagboot nin Kagurangnan, asin sa saindong kapaabaw-abawan nagtukad kamo sa mabulod na daga.

⁴⁴ Sinabat kamo kan mga Amoreo na nag-erok duman, asin siring sa putakti, linamag ninda kamo sagkod sa Horma dangan dinaog sa mabulod na daga nin Edom.

⁴⁵ Kaya nag-agrangay kamo sa Kagurangnan sa paghagad nin tabang, alagad dai niya kamo dinangog.

An mga Taon sa Desyerto

⁴⁶ “Kaya pakatapos kan satuyang pag-ontok sa Kades nin haloy na panahon,