Daniel 7 - Marahay na Bareta Biblia

IPINAHAYAG NI DANIEL AN SAIYANG MGA BISYON ( 7:1–12:13 ) An Bisyon ni Daniel kan Apat na Hayop

¹ Kan enot na taon kan paghahade ni Belsazzar nin Babilon, nagkaigwa ako nin pangatorogan asin nahiling ko an sarong bisyon sa pagkabanggi. Isinurat ko an pangatorogan, asin iyo ini an kasaysayan

² kan nahiling ko kan bangging idto: Naghuhuyop an doros hale sa apat na direksyon asin binubukag kaini an dagat.

³ Dangan may nagtungang apat na manlaen-laen na darakulang hayop.

⁴ An enot nakakaagid sa sarong leon alagad igwa ini nin mga pakpak nin agila. Mantang naghihiling ako, natangkas an mga pakpak kan hayop. Dangan initaas an hayop asin pinatindog arog sa sarong tawo. Pakatapos, tinawan ini nin isip nin tawo.

⁵ An ikaduwang hayop nakakaagid sa sarong oso na nagtitindog sa paagi kan mga bitis kaini sa hurihan. Igwa ining kagat-kagat na tolong gusok, asin sarong tingog an nagsabi sa hayop, “Lakaw asin kakana an karneng kaya mong kakanon!”

⁶ Mantang naghihiling ako, saro pang hayop an nagtunga. Nakakaagid ini sa sarong leopardo, alagad igwa ini nin apat na pakpak sa likod, na siring kan sa gamgam; igwa pa ini nin apat na payo. An lalawogon kaini naglaladawan nin awtoridad.

⁷ Mantang naghihiling pa ako, nagtunga an ikaapat na hayop. Makosog ini, makatatakot, asin makangingirhat. Rinonot kaini an saiyang mga biktima sa paagi kan darakulang lansang na ngipon, dangan tinimaktimakan. Napapalaen ini sa mga hayop na nagkaerenot; igwa ini nin sampolong sungay.

⁸ Mantang minamaanan ko an mga sungay, nahiling kong nagtunga an sarong sadit na sungay sa kaibahan kan sampolo. Binulnot kan sadit na sungay an tolo sa sampolo. An sungay na ini igwa nin mga matang arog kan sa tawo, asin sarong ngoso na nagtataram nin kapalangkawan.

An Bisyon kan Sarong Danay na Buhay

⁹ Mantang naghihiling ako, ibinugtak an mga trono sa mga lugar kaini. An sarong danay na buhay nagtukaw sa saro kan mga trono; maputi siring sa nyebe an saiyang gubing, asin nakakaagid sa telang purong lana an saiyang buhok. Nagkakalayo an saiyang trono na igwa nin mga rwedang naglalaad.

¹⁰ Hale sa saiyang trono nagbubulos an sarong salog nin kalayo. Yaon duman an ribo-ribong tawo na naglilingkod saiya, asin an milyon-milyon na nagtitindog sa saiyang atubang. Nagbukas an korte sa pagdangog kan mga kaso, asin binukasan an mga libro.

¹¹ Mantang naghihiling ako, nadadangog ko pa an paghambog saka pagpaabaw-abaw kan sadit na sungay. Mantang nagmamasid ako, ginadan an ikaapat na hayop dangan an bangkay kaini itinapok sa kalayo asin natutong.

¹² An ibang mga hayop hinalean kan saindang kapangyarihan, alagad tinugotan na mabuhay sa kadikit pang panahon.

¹³ Sa bisyon na ini sa pagkabanggi, nahiling ko an sarong garo tawo. Nagrarani siya sako, napapatos nin panganoron, asin nagduman siya sa danay na buhay, dangan ipinamidbid sa saiya.

¹⁴ Tinawan siya nin awtoridad, onra saka kapangyarihan na maghade, tanganing paglingkodan siya kan mga tawo sa gabos na nasyon, rasa asin lengwahe. Magdadanay an saiyang awtoridad, asin mayo nin kataposan an saiyang kahadean.

Ipinaliwanag an mga Bisyon

¹⁵ Natikbahan ako sa mga bisyon na sakong nahiling, asin napurisaw ako nin marahay.

¹⁶ Dinolok ko an saro kan mga nagtitindog duman asin hinagad kong ipaliwanag niya an gabos na idto. Kaya sinabihan niya ako kan kahulogan kaidto.

¹⁷ Nagsabi siya, “An apat na darakulang hayop, iyo an apat na mga imperyo na matunga sa daga.

¹⁸ Alagad an mga banal kan Kahorohalangkaweng Dios iyo an maako nin kapangyarihan na maghade, asin magigin kagsadiri kan kahadean sagkod pa man.”

¹⁹ Dangan nagkaigwa ako nin pagmawot na maaraman an katotoohan dapit sa ikaapat na hayop, na napapalaen sa ibang mga hayop—an makatatakot na hayop na nagronot kan saiyang mga biktima sa paagi kan bronseng mga kuku saka lansang na mga ngipon, bago niya sinda timaktimakan.

²⁰ Boot ko man maaraman an dapit sa nagtungang sadit na sungay na nagpatumba kan tolong sungay. Igwa ini nin mga mata saka ngoso na nagtataram nin kapaabaw-abawan. Makangirhat ini ki sa ibang mga sungay.

²¹ Mantang naghihiling ako, nakigera an sungay na ini sa mga banal nin Dios asin nasakop sinda,

²² sagkod na nagdatong an danay na buhay asin naghukom sa ikakarahay kan mga banal kan Kahorohalangkaweng Dios. Nagdatong na an panahon tanganing akoon kan mga banal nin Dios an kapangyarihan na maghade.

²³ Iyo ini an paliwanag na itinao sako: “An ikaapat na hayop iyo an ikaapat na imperyo sa daga na napapalaen sa ibang imperyo. Roronoton kaini an bilog na daga asin titimaktimakan.

²⁴ An sampolong sungay iyo an sampolong hade na mamamayo kan mga imperyong idto. Dangan madatong an sarong hade; mapapalaen siya sa mga nagkaerenot asin ibabagsak niya an tolo sainda.

²⁵ Mataram siya tumang sa Kahorohalangkaweng Dios asin aapihon niya an mga banal nin Dios. Babaloon niyang liwaton an saindang sinusunod na katogonan asin mga pyesta, patin mapapairarom sinda sa saiyang kapangyarihan sa laog nin tolo may kabangang taon.

²⁶ Dangan matukaw an langitnon na korte sa paghukom, sa paghale kan saiyang kapangyarihan, asin sa pagraot saiya sagkod lamang.

²⁷ An kapangyarihan saka kadakulaan kan gabos na kahadean sa daga itatao sa mga banal kan Kahorohalangkaweng Dios asin magigin mayong tapos an saindang kapangyarihan sa paghade, patin paglilingkodan saka kukuyogon sinda kan gabos na pamayo.”

²⁸ Iyo ini an kataposan kan kasaysayan. Natakot ako nin marahay kaya nanlongsi ako, asin hinilom ko sana an gabos.