Daniel 6 - Marahay na Bareta Biblia

Si Daniel sa Kalot na Pano nin Leon

¹ Pinagmarahay ni Dario na magbugtak nin syento beynteng mga gobernador sa bilog niyang imperyo.

² Laen pa kaini, pinili niya si Daniel saka an duwa pa tanganing pamahalaan an mga gobernador asin hilingon an ikakarahay kan hade.

³ Dai nahaloy, ipinahiling ni Daniel na mas kaya niya an trabaho ki sa ibang parapamahala o sa mga gobernador. Huli ta napalaen siya sa gabos, inisip kan hade na ibugtak siyang parapamahala kan bilog na imperyo.

⁴ Huli kaini pinagparahingowa kan ibang mga parapamahala saka kan mga gobernador na makakua nin ikakasumbong laban ki Daniel dapit sa saiyang pagpalakaw kan imperyo, alagad mayo sindang nakukua, huli ta maimbod si Daniel asin dai naggigibo nin sala o nandadaya.

⁵ Nag-orolay an mga ini, “Mayo kitang makukuang dahelan tanganing ikasumbong ta si Daniel pwera kun iyan dapit sa saiyang relihiyon.”

⁶ Kaya nagduman sinda sa hade asin nagsabi, “Hadeng Dario, mabuhay ka logod sagkod lamang!

⁷ Kami gabos na nagpapadalagan kan saimong imperyo—mga parapamahala, mga gobernador, mga bise-gobernador, asin iba pang mga opisyal—nagkasararo na an Mahal na Hade magpaluwas nin pagboot dangan ipaotob iyan. Magboot ka na sa laog nin treyntang aldaw dai itinutugot sa kiisay man na maghagad nin anoman sa arin man na dios o tawo kundi sa saimo sana. An siisay man na maglapas kan pagboot na ini ihuhulog sa kalot na pano nin mga leon.

⁸ Kaya magpaluwas ka kaining pagboot, Mahal na Hade, asin pirmahan mo, tanganing dai maliwat, sosog sa togon kan mga taga Media asin mga taga Persia.”

⁹ Kaya pinirmahan ni Hadeng Dario an pagboot.

¹⁰ Kan maaraman ni Daniel na pinirmahan na an pagboot, nagpuli siya sa saiyang harong. Sa sarong kwarto sa itaas kan saiyang harong, igwa nin mga bintana na nakaatubang sa Jerusalem. Duman, sosog sa dati niyang ginigibo, nagluhod siya sa may mga bukas na bintana asin namibi sa Dios tolong beses sa sarong aldaw.

¹¹ Kan mahiling kan mga kaiwal ni Daniel na namimibi ini sa Dios,

¹² nagduman sinda gabos sa hade tanganing isumbong si Daniel. Nagsabi sinda, “Mahal na Hade, bakong nagpirma ka nin sarong pagboot na sa laog nin treyntang aldaw an siisay man na maghagad nin anoman sa arin man na dios o tawo ihuhulog sa kalot na pano nin leon?” Nagsimbag an hade, “Iyo, sarong pagboot, sarong togon kan mga taga Media asin mga taga Persia, na dai pwedeng liwaton.”

¹³ Dangan nagsabi sinda sa hade, “Si Daniel, an saro kan mga nabihag hale sa Juda, dai minagalang saimo, mahal na hade, asin dai nagkukuyog kan pagboot na saimong pinaluwas. Tolong beses siyang namimibi sa sarong aldaw.”

¹⁴ Kan madangog ini kan hade, napurisaw siya asin ginibo an gabos na paagi tanganing iligtas si Daniel; dai siya nag-ontok sagkod na magsolnop an aldaw.

¹⁵ Dangan nagbalik an mga lalaki sa hade asin nagsabi, “Mahal na Hade, naaaraman mo na sosog sa mga togon kan mga taga Media saka mga taga Persia, dai pwedeng liwaton an arin man na pagboot na pinaluwas kan hade.”

¹⁶ Kaya nagboot an hade na dakopon si Daniel asin ihulog sa kalot na pano nin leon. Sinabihan kan hade si Daniel, “Iligtas ka logod kan saimong Dios, na maimbod mong pinaglilingkodan.”

¹⁷ Sarong gapo an ibinugtak sa ngimot kan kalot, dangan sinelyohan idto kan hade kan sadiri niyang selyo asin kan selyo kan iginagalang na mga lalaki sa palasyo, tanganing mayo nin siisay man na magligtas ki Daniel.

¹⁸ Pakatapos, nagpuli sa saiyang palasyo an hade asin dai ini nakatorog sa bilog na mag-aga; dai man siya nagkakan o nag-ogma.

¹⁹ Dangan, sa pag-alagaag kan aldaw, nagbangon an hade asin hidaling nagduman sa kalot.

²⁰ Pag-abot niya duman, may kahandalan na nag-apod siya, “Daniel, sorogoon kan buhay na Dios! Ikinaligtas ka sa mga leon kan saimong Dios na maimbod mong pinaglilingkodan?”

²¹ Nasimbag si Daniel, “Mabuhay logod sagkod pa man an Mahal na Hade!

²² Ipinadara nin Dios an saiyang anghel tanganing tikomon an ngoso kan mga leon, kaya dai ako nakagat. Ginibo ini nin Dios huli ta aram niyang mayo akong kasalan saiya asin sa saimo, Mahal na Hade.”

²³ Naogma nin marahay an hade asin nagboot na hawason si Daniel sa kalot. Kaya hinawas ninda si Daniel asin nahiling nindang dai man lamang siya nalugadan, huli ta nagsarig siya sa Dios.

²⁴ Dangan nagboot an hade na dakopon an mga lalaking nagsumbong ki Daniel, asin ihinulog sinda kaiba an saindang mga agom saka kaakian sa kalot na pano nin mga leon. Dai pa ngani sinda nagduduta sa salog kan kalot, pinag-aragawan na sinda kan mga leon asin binarari an saindang mga tolang.

²⁵ Dangan nagsurat si Hadeng Dario sa mga banwaan sa gabos na nasyon, rasa, asin lengwahe sa daga: “An katoninongan mapasaindo!

²⁶ Nagboboot ako na saen man sa sakong imperyo, kaipuhan katakotan asin galangan kan gabos an Dios ni Daniel. “Siya an buhay na Dios, asin maghahade siya sagkod lamang. Dai nanggad mararaot an saiyang kahadean, asin dai nanggad magkakaigwa nin kataposan an saiyang kapangyarihan.

²⁷ Nagliligtas siya, naggigibo nin mga ngangalasan asin mga milagro sa langit saka sa daga. Ilinigtas niya si Daniel sa kapangyarihan kan mga leon.”

²⁸ Nag-uswag si Daniel sa panahon kan paghahade ni Dario asin kan paghahade ni Ciro na taga Persia.