Daniel 4 - Marahay na Bareta Biblia

An Ikaduwang Pangatorogan ni Nebukadnezzar

¹ Ini an mensaheng ipinadara ni Hadeng Nebukadnezzar sa mga banwaan, kan gabos na nasyon, rasa, asin lengwahe sa bilog na daga: “An katoninongan mapasaindo!

² Pinagmarahay kong ipaaram an mga tanda saka ngangalasan na ipinahiling sako kan Kahorohalangkaweng Dios.

³ “Dakula nin marahay an mga ngangalasan na ipinahiling niya sato! Mapangyari nanggad an mga milagro na saiyang ginigibo. Sarong daing tapos na kahadean an saiyang kahadean; maghahade siya sagkod pa man.

⁴ “Namumuhay akong matiwasay sa sakong palasyo; nagkakamit nin dakulang kaginhawahan.

⁵ Alagad nagkaigwa ako nin sarong makatakot na pangatorogan asin nahiling ko an makangirhat na mga bisyon mantang nagkakatorog ako.

⁶ Kaya nagboot akong iatubang sako an gabos na parahatol kan hade sa Babilon tanganing ipaaram sako an kahulogan kan pangatorogan.

⁷ Dangan nag-atubang sako an gabos na parahula, salamangkero, madonong, asin astrologo. Inosip ko sainda an sakong pangatorogan alagad dai ninda iyan ikinapaliwanag.

⁸ Dangan inatubang man sako si Daniel. (Inaapod man siyang Beltesazzar, na isinunod sa ngaran kan sakong dios.) Yaon saiya an espiritu kan banal na mga dios, kaya sinabi ko saiya an sakong pangatorogan. Sinabihan ko siya:

⁹ Beltesazzar, pamayo kan mga parahula, naaaraman kong yaon saimo an espiritu kan banal na mga dios, asin nasasabotan mo an gabos na misteryo. Iyo ini an sakong pangatorogan. Sabihan sako an kahulogan kaiyan.

¹⁰ “Mantang nagkakatorog ako, nagkaigwa ako nin sarong bisyon nin sarong dakulang kahoy na nasa tahaw kan daga.

¹¹ Nagtalubo an kahoy asin nagin pusog, sagkod na nakaabot iyan sa langit asin pwedeng mahiling kan gabos sa bilog na kinaban.

¹² Magayon an mga dahon kan kahoy asin dakul nin marahay an bunga—pwedeng pagkakan kan bilog na daga. Nagpahingalo sa limpoy kaiyan an mga lalaw na hayop, naggibo nin mga salagan sa mga sanga kaiyan an mga gamgam, asin nagkakan kan bunga kaiyan an manlaen-laen na linalang.

¹³ “Mantang iniisip ko an dapit sa bisyon, nahiling kong naghihilig hale sa langit an sarong anghel, andam asin nagbabantay.

¹⁴ Nagpahayag siya sa makosog na tingog, ‘Paloda an kahoy asin purutola an mga sanga kaiyan; rapgosa nindo an mga dahon dangan warakan an mga bunga kaiyan. Pahalea nindo an mga hayop sa irarom kaiyan asin an mga gamgam sa mga sanga.

¹⁵ Alagad tadaan an pungo sa daga na may gakod na lansang saka bronse sa palibot. Bayaan nindo an pungo sa kaibahan kan mga doot sa oma. “‘Pabayaan nindong madumog kan ambon an lalaking ini asin paeroka siya sa kaibahan kan mga hayop saka mga tinanom.

¹⁶ Sa laog nin pitong taon, an saiyang isip magigin siring sa sarong hayop, embes na sa tawo.

¹⁷ Iyo ini an desisyon kan andam na nagbabantay na mga anghel. Kaya paaraman nindo sa gabos na banwaan saen man na lugar na an Kahorohalangkaweng Dios igwa nin kapangyarihan sa mga kahadean nin tawo asin siya an pwedeng magtao kan mga iyan sa saiyang mapili—maski sa mga pinakasadit na tawo.’

¹⁸ “Iyo iyan an nagin pangatorogan ko,” an sabi ni Hadeng Nebukadnezzar. “Ngunyan, Beltesazzar, sabihan sako an kahulogan kaiyan. Mayong saro man sa sakong mga parahatol na nakapagsabi sako, alagad masasabi mo iyan, huli ta yaon saimo an espiritu kan banal na mga dios.”

Ipinaliwanag ni Daniel an Pangatorogan

¹⁹ Dangan si Daniel, na inaapod man Beltesazzar, natikbahan nin marahay kaya dai siya nakapagtaram. Nagsabi an hade saiya, “Beltesazzar, dai mo ipaghandal an pangatorogan o an kahulogan kaiyan.” Nagsimbag si Beltesazzar, “Mahal na Hade, mawot kong an pangatorogan saka an kahulogan kaiyan ipinanongod sa saimong mga kaiwal asin bakong sa saimo.

²⁰ An kahoy na nahiling mo, na nagtalubo asin nagin pusog, sagkod na nakaabot iyan sa langit na pwedeng mahiling kan gabos sa bilog na kinaban;

²¹ na magayon an mga dahon, asin igwang bunga na pwedeng pagkakan kan bilog na daga; na sa lindong kaiyan nagpahingalo an mga lalaw na hayop, asin naggibong mga salagan sa mga sanga an mga gamgam.

²² Mahal na Hade, ika an kahoy, halangkaw asin pusog. Duminakula ka nin marahay kaya nakakaabot sa langit, asin sakop kan saimong kapangyarihan an bilog na kinaban.

²³ Mantang naghihiling ka, Mahal na Hade, naghilig hale sa langit an sarong anghel dangan nagsabi, ‘Paloda an kahoy asin raota nindo, alagad pabayae nindo an pungo sa daga. Gakodan nindo nin lansang saka bronse, asin pabayaan nindo iyan kaiba kan mga doot sa oma. Pabayaan nindong madumog kan ambon an tawong ini, asin paeroka nindo siya sa kaibahan kan mga hayop sa laog nin pitong taon.’

²⁴ “Iyo ini an kahulogan, Mahal na Hade, asin iyo ini an ipinapahayag kan Kahorohalangkaweng Dios na mangyayari saimo.

²⁵ Papahaleon ka sa tahaw nin mga tawo asin mag-eerok ka kaiba kan mga lalaw na hayop. Sa laog nin pitong taon, doot an saimong kakakanon siring sa sarong baka, asin madudumog ka kan ambon, huli ta magkakatorog ka sa kaomahan. Dangan aakoon mo na an Kahorohalangkaweng Dios iyo an naghahade sa gabos na kahadean nin tawo, asin na itinatao an mga iyan sa kiisay man na saiyang mapili.

²⁶ Nagboot an mga anghel na pabayaan an pungo sa daga. Nangangahulogan ini na magigin hade ka giraray sa panahon na akoon mo na an Dios an naghahade sa bilog na daga.

²⁷ Kaya, Mahal na Hade, sunoda an sakong hatol. Ontoka an saimong pagkakasala, giboha an matanos, asin magin maherakon ka sa dukha. Dangan magpapadagos an saimong kauswagan.”

²⁸ An gabos na ini nangyari ki Hadeng Nebukadnezzar.

²⁹ Pakalihis nin sarong taon, mantang naglalakaw-lakaw siya sa atop kan saiyang palasyo sa Babilon,

³⁰ nagsabi siya, “Bakong iyo ini an dakulang Babilon na pinatindog ko huli kan sakong kapangyarihan bilang sakong pangenot na syudad tanganing ipahiling an sakong kosog, kamurawayan asin kamahalan?”

³¹ Mantang nagtataram pa an hade, sarong tingog hale sa langit an nagsabi, “Hadeng Nebukadnezzar, dangoga an sakong sasabihon! Hinale na sa saimo an saimong kahadean.

³² Papahaleon ka sa tahaw nin mga tawo asin mag-eerok ka kaiba kan mga lalaw na hayop. Sa laog nin pitong taon, doot an saimong kakakanon siring sa sarong baka. Dangan aakoon mo na may kapangyarihan sa mga kahadean nin tawo an Kahorohalangkaweng Dios asin na itinatao niya an mga iyan sa saiyang mapili.”

³³ Naotob tolos ki Nebukadnezzar an tataramon. Pinahale siya sa tahaw nin mga tawo asin nagkakan nin doot siring sa sarong baka. Nadumog an hawak niya kan ambon, asin naghalaba an saiyang buhok siring sa balukag nin agila patin nagin siring sa mga kuku kan gamgam an saiyang kuku.

Inomaw ni Nebukadnezzar an Dios

³⁴ “Pakalihis nin pitong taon,” an sabi kan hade, “nagtingkalag ako sa langit, asin nagbalik sako an sakong kaisipan. Inomaw ko an Kahorohalangkaweng Dios asin nagtao ako nin paggalang saka kamurawayan sa saiya, na nabubuhay sagkod lamang. “Maghahade siya sagkod lamang, asin magdadanay an saiyang kahadean sa gabos na panahon.

³⁵ An mga tawo sa daga hinihiling niya na mayo nin halaga; an mga anghel sa langit saka an mga tawo sa daga nasa irarom kan saiyang kabotan. Mayo nin makakasalungat kan saiyang kabotan o makakahapot saiya nin, ‘Ano an ginigibo mo?’

³⁶ “Kan magbalik an sakong kaisipan, ibinalik man sako an sakong onra, kamahalan asin an kamurawayan kan sakong kahadean. Inako giraray ako kan sakong mga opisyal saka mga prinsipe, asin ibinalik ninda sako an kahadean, na may onrang orog pa ki sa dati.

³⁷ “Ngunyan, ako, si Nebukadnezzar, nag-oomaw, naggagalang, asin nagpapamuraway sa Hade nin Langit. Tama saka matanos an gabos niyang ginigibo, asin pwede niyang ibaba an siisay man na nagpapalangkaw.”