Daniel 2 - Marahay na Bareta Biblia

An Pangatorogan ni Nebukadnezzar

¹ Sa ikaduwang taon kan paghahade ni Nebukadnezzar, nagkaigwa siya nin pangatorogan. Napurisaw siyang marahay kaya dai siya nangangatorog,

² Kaya ipinaapod niya an mga parahula, mga salamangkero asin mga madonong tanganing ipaliwanag ninda saiya an pangatorogan. Kan mag-atubang sinda sa hade,

³ sinabihan niya sinda, “Napupurisaw ako dapit sa sakong pangatorogan. Boot kong maaraman kun ano an kahulogan kaiyan.”

⁴ Nagsimbag sinda sa hade sa lengwaheng Arameo, “Mabuhay logod sagkod pa man an Mahal na Hade! Sabihan samo an saimong pangatorogan, asin ipapaliwanag mi iyan saimo.”

⁵ Nagsimbag sainda an hade, “Nagdesisyon na ako na kaipuhan kamo an mag-osip sako kan pangatorogan ko dangan sabihan nindo ako kun ano an kahulogan kaiyan. Kun dai nindo magibo iyan, ipapapedaso ko kamo asin ipapagaba ko an saindong harong.

⁶ Alagad kun masabi nindo an sakong pangatorogan dangan an kahulogan kaiyan, tatawan ko kamo nin mga regalo asin dakulang onra. Ngunyan, sabihan nindo sako kun ano an sakong pangatorogan asin an kahulogan kaiyan.”

⁷ Nagsimbag giraray sinda sa hade, “Isabi man logod samo kan Mahal na Hade an saiyang pangatorogan, asin ipapaliwanag mi iyan.”

⁸ Pakadangog kaini kan hade, nagtaram ini sa makosog na tingog, “Tama an nasa isip ko! Boot sana nindong tawan pa kamo nin panahon, huli ta nahiling nindong nagdesisyon na ako

⁹ na tawan kamo gabos kan parehong padusa kun dai nindo masabi sa sako an sakong pangatorogan. Nagkaoroyon kamong padagos nindo akong dadayaon huli ta naglalaom kamong magliliwat ako nin isip sa paglihis nin oras. Sabihan nindo sako an pangatorogan, dangan maaaraman kong pwede man nindong masabi sako an kahulogan kaiyan.”

¹⁰ Nagsimbag an mga parahatol, “Mayo nin siisay man sa ibabaw nin daga na pwedeng magsabi sa Mahal na Hade kan boot niyang maaraman. Mayo nin hade, maski na an pinakadakula asin pinakamapangyari, na naghagad nin siring na bagay sa saiyang mga parahula, salamangkero, asin mga madonong.

¹¹ An hinahagad kan Mahal na Hade sarong bagay na masakit, asin mayo nin siisay man na makakagibo kaiyan para saimo pwera an mga dios, asin dai sinda nag-eerok sa kaibahan nin mga tawo.”

¹² Pagkadangog kaini kan hade, naanggot siyang marahay dangan ipinagboot na gadanon an gabos na parahatol sa Babilon.

¹³ Kaya ipinaluwas an pagboot na gadanon sinda gabos, kaiba si Daniel asin an saiyang mga katood.

Ipinahiling nin Dios ki Daniel an Kahulogan kan Pangatorogan

¹⁴ Dangan nagduman si Daniel ki Ariok, an pamayo kan mga bantay kan hade, na iyo an pinagbotan na gumadan kan mga madonong sa Babilonia. Sa mga piling tataramon

¹⁵ hinapot niya si Ariok kun tano ta nagpaluwas nin makuring pagboot an hade. Kaya sinabihan ni Ariok si Daniel kan pangyayari.

¹⁶ Nagduman tolos si Daniel sa hade asin nakimaherak na tawan siya nin panahon tanganing ikasabi niya sa hade an kahulogan kan pangatorogan.

¹⁷ Pakatapos, nagpuli si Daniel asin inosipan kan nangyari an saiyang mga katood na si Hananias, Misael, asin Azarias.

¹⁸ Sinabihan niya sindang mamibi sa Dios nin langit dapit sa misteryong ini, tanganing dai sinda magadan kaiba kan mga parahatol sa Babilon.

¹⁹ Kan banggi man sanang idto, an misteryo ipinahayag ki Daniel sa sarong bisyon, asin inomaw niya an Dios nin langit:

²⁰ “Pag-omawon an ngaran nin Dios sagkod lamang! Sadiri nin Dios an kadonongan saka an kakosogan!

²¹ Siya an nagliliwat kan mga panahon; siya an nagbubugtak asin siya man an naghahale kan mga hade; siya an nagtatao nin kadonongan asin pakasabot.

²² Siya an nagpapahayag kan mga bagay na hararom asin hilom; siya an nakakaaram kun ano an nasa kadikloman, asin napapalibotan siya nin liwanag.

²³ Inoomaw taka asin ginagalangan, Dios nin sakuyang mga ginikanan. Ika an nagtao sako nin kosog asin kadonongan; sinimbag mo an sakong pamibi asin ipinahiling samo an isasabi sa hade.”

Sinabi ni Daniel sa Hade an Pangatorogan asin Saiyang Ipinaliwanag

²⁴ Kaya nagduman si Daniel ki Ariok, na pinagbotan kan hade tanganing gadanon an mga parahatol kaini. Sinabihan niya si Ariok, “Dai mo sinda paggadanon. Darahon mo ako sa hade, asin ipapaliwanag ko saiya kun ano an kahulogan kan saiyang pangatorogan.”

²⁵ Dinara tolos ni Ariok si Daniel sa atubang ni Hadeng Nebukadnezzar asin sinabihan ini, “Nakakua ako nin saro sa mga nabihag na Judio na makakapahayag kan kahulogan kan saimong pangatorogan.”

²⁶ Sinabihan kan hade si Daniel (na inaapod man Beltesazzar), “Masasabi mo daw sako kun ano an sakong pangatorogan asin kun ano an kahulogan kaiyan?”

²⁷ Nagsimbag si Daniel, “Mahal na Hade, mayo nin madonong, salamangkero, parahula, o astrologo na makakapagsabi saimo kaiyan.

²⁸ Alagad igwa nin sarong Dios sa langit na nagpapahayag kan mga misteryo. Ipinaaram niya sa saimo an mangyayari sa maabot na panahon. Ngunyan sasabihon ko saimo an pangatorogan, an bisyon na nahiling mo mantang nagkakatorog ka.

²⁹ “Mantang nagkakatorog ka Mahal na Hade, nangatorogan ka dapit sa maabot na panahon; an Dios, na nagpapahayag kan mga misteryo, iyo an nagpahiling saimo kun ano an mangyayari.

³⁰ Ipinahayag man an misteryong ini sako bakong huli ta orog akong madonong ki sa kiisay man, kundi tanganing maaraman mo an kahulogan kan saimong pangatorogan asin masabotan mo an mga kaisipan na nag-abot saimo.

³¹ “Mahal na Hade, nahiling mo sa saimong bisyon an sarong higanteng estatwa na nakatindog sa atubang mo, maliwanag saka nagkikinang, asin makangirhat paghilingon.

³² An payo kaiyan gibo sa pinong bulawan; an daghan saka an mga takyag gibo sa plata; an tulak saka habayan gibo sa bronse,

³³ an mga tabay gibo sa lansang, asin an mga bitis gibo sa pinaghalong lansang saka laboy.

³⁴ Mantang hinihiling mo an estatwa, may sarong dakulang gapo na nagpoon pagligid hale sa ampas, maski mayong siisay man na nagdotdot kaiyan. Tinamaan kaiyan an mga bitis na gibo sa pinaghalong lansang saka laboy, asin nagkaparasa an mga ini.

³⁵ Naronot tolos an lansang, laboy, bronse, plata saka bulawan asin nagin siring sa alpog sa ginikan kun tig-init. Ipinalid iyan kan doros, asin mayo nin natada kaiyan. Alagad an gapong tuminama sa estatwa nagin sarong dakulang bukid na nakapano sa bilog na daga.

³⁶ “Iyo iyan an pangatorogan. Ngunyan, sasabihon ko sa saimo Mahal na Hade an kahulogan kaiyan.

³⁷ Mahal na Hade, ika an pinakadakula sa gabos na hade. An Dios nin langit an naggibo saimong magin emperador, asin tinawan ka niya nin kapangyarihan, kosog saka dangog.

³⁸ Siya an naggibo saimong pamayo kan gabos na kabtang kan daga na pinag-eerokan kan mga tawo, hayop, saka gamgam. Ika an payong bulawan.

³⁹ An masunod saimo iyo an sarong imperyo na bakong arog kadakula kan saimong imperyo, pakatapos kaiyan iyo an ikatolo, sarong bronseng imperyo na maghahade sa bilog na daga.

⁴⁰ Dangan magkakaigwa pa nin ikaapat na imperyo, na arog kakosog sa lansang, na minapasa sa anoman na bagay. Siring na pinapasa kan lansang an gabos na bagay, papasaon asin roronoton man kaiyan an gabos na nagkaerenot na imperyo.

⁴¹ Nahiling mo man na an mga bitis saka mga guramoy kan estatwa gibo sa pinaghalong laboy saka lansang. Nangangahulogan iyan na an imperyo sarong nabangang imperyo. Alagad magkakaigwa iyan kan kapusogan kan lansang, siring sa nahiling mong lansang na may salak na laboy.

⁴² Siring na an mga guramoy kan mga bitis gibo sa pinaghalong lansang saka laboy, an sarong kabtang kan imperyo magigin makosog asin an sarong kabtang magigin maluya.

⁴³ Nahiling mo man na an lansang may salak na laboy. Ini nangangahulogan na hihingowahon kan mga pamayo kan imperyong idto na pagsaroon an saindang mga pamilya sa paagi nin pag-inaragoman, alagad dai ninda magigibo iyan, siring na an lansang dai minahalo sa laboy.

⁴⁴ Sa panahon kan mga pamayong idto, matugdok an Dios nin langit nin sarong kahadean na daing kataposan. Dai nanggad iyan masasakop, alagad pupuhoon kaiyan an gabos na imperyo, asin magdadanay iyan sagkod lamang.

⁴⁵ Nahiling mo kun paanong nagpoon magligid an sarong gapo hale sa ampas maski mayo nin siisay man na nagduta kaiyan, asin kun paano tinamaan kaiyan an estatwa na gibo sa lansang, bronse, laboy, plata, saka bulawan. Mahal na Hade, sinasabihan ka kan dakulang Dios kun ano an mangyayari sa maabot na panahon. Sinasabihan taka kan bilog mong pangatorogan, asin itinao ko saimo an totoong kahulogan kaiyan.”

Binalosan kan Hade si Daniel

⁴⁶ Dangan nagluhod sa daga si Hadeng Nebukadnezzar asin nagboot na mag-atang nin mga sakripisyo saka mga dolot ki Daniel.

⁴⁷ Nagsabi an hade, “Totoo mananggad na an saimong Dios iyo an pinakadakula sa gabos na dios, an Kagurangnan kan mga hade, asin an nagpapahayag kan mga misteryo. Aram ko ini huli ta ikinapaliwanag mo an misteryong ini.”

⁴⁸ Dangan tinawan niya si Daniel nin halangkaw na katongdan saka kadakul na regalo, asin ibinugtak niya ining pamayo kan bilog na probinsya nin Babilon saka pamayo kan gabos na parahatol kan hade.

⁴⁹ Sa pakiolay ni Daniel, si Sadrak, Mesak, asin Abednego ginibo kan hade na mamahala kan palakaw kan probinsya nin Babilon; alagad nagdanay si Daniel sa palasyo.