Daniel 12 - Marahay na Bareta Biblia

An Pag-abot kan Kataposan

¹ Nagtaram an anghel na nakagubing nin lino, “Sa panahon na iyan matunga an dakulang anghel, si Miguel, an anghel na nagsusurog kan saimong banwaan. Dangan magkakaigwa nin kasakitan, na dai pa lamang nangyari magpoon kan magkaigwa nin mga nasyon. Pag-abot kan panahon na iyan, an gabos na tawong an ngaran nasusurat sa libro nin Dios maliligtas.

² Mabubuhay giraray an kadaklan sa mga gadan na; an nagkapira mabubuhay sagkod pa man, mantang an iba magtitios nin daing kataposan na kasosopgan.

³ An mga madonong na lider magliliwanag siring sa panganoron, asin an mga nagtukdo sa mga tawo na maggibo kan tama magliliwanag sagkod lamang siring sa mga bitoon.”

⁴ Tinaraman niya ako, “Ngunyan, Daniel, serahan mo an libro dangan bugtakan mo nin selyo sagkod na mag-abot an kataposan nin kinaban. Mantang dai pa iyan nangyayari, dakul na tawo an magsasayang nin panahon sa pagsabot kan nangyayari.”

⁵ Dangan nahiling ko an duwang lalaki na nagtitindog sa pangpang kan salog, an saro nasa sarong ibong mantang an saro nasa saro man na ibong.

⁶ Hinapot kan saro an anghel na nagtitindog sa may parteng itaas, “Sagkod nuarin matatapos an makangangalas na mga bagay na ini?”

⁷ Initaas kan anghel an duwa niyang kamot dangan nagsumpa sa ngaran kan Daing Kataposan na Dios. Nadangog ko an saiyang sinabi, “Tolong taon may kabanga pa. Pakatapos kan pagpasakit sa banwaan nin Dios, dangan mangyayari an gabos na ini.”

⁸ Nadangog ko an saiyang sinabi alagad dai ko nasabotan, kaya naghapot ako, “Kagurangnan, paano matatapos an gabos na ini?”

⁹ Nagsimbag siya, “Magpuli ka na, Daniel, huli ta kaipuhan magin hilom an mga tataramon na ini sagkod na dumatong an kataposan.

¹⁰ Dakul na tawo an malilinigan, alagad dai makakasabot an mga maraot kundi magpapadagos sa pagigin maraot; an mga madonong sana an makakasabot.

¹¹ “Magpoon sa pagpaontok kan aroaldaw na sakripisyo, na an boot sabihon pagpoon kan Mangirhat na Katakotan, maagi an mil dos syentos nubentang aldaw!

¹² Paladan an mga tawong magdadanay na maimbod sagkod na matapos an mil tres syentos treynta y singkong aldaw!

¹³ “Ika, Daniel, magin maimbod ka sagkod sa kataposan. Magagadan ka, alagad mabangon ka tanganing akoon an balos sa kataposan kan panahon.”