Daniel 10 - Marahay na Bareta Biblia

An Bisyon ni Daniel sa Tampi kan Salog nin Tigris

¹ Kan ikatolong taon kan paghahade ni Ciro sa Persia, sarong mensahe an ipinahayag ki Daniel na inaapod man Beltesazzar. Totoo an mensahe alagad masakit na masabotan. Ipinaliwanag idto saiya sa paagi nin sarong bisyon.

² Kan panahon na iyan, nagmomondo ako sa laog nin tolong semana.

³ Dai ako nagkakan nin anoman na masustansyang kakanon o anoman na karne, dai ako nag-inom nin arak, o nagsukray kan sakong buhok sagkod na nakalihis an tolong semana.

⁴ Kan ikabeynte y kwatrong aldaw kan enot na bulan kan taon, nagtitindog ako sa tampi kan dakulang Salog nin Tigris.

⁵ Nagtingkalag ako asin nahiling ko an sarong tawo na nakasulot nin gubing na lino saka may bulawan na habay.

⁶ An saiyang hawak nagkikinang siring sa sarong mahalagang bato. An saiyang lalawogon maliwanag siring sa kikilat, asin an saiyang mga mata naglalaad siring sa kalayo. An saiyang mga takyag saka mga tabay nagliliwanag siring sa pinakinang na bronse; nakakaagid sa ribok nin kadakul na tawo an saiyang tingog.

⁷ Ako sana an nakahiling kan bisyon. An mga lalaking kaiba ko mayong nahiling na anoman, alagad nagkatarakot sinda asin nagdaralagan patin nagtarago.

⁸ Kaya ako sana an nawalat asin nakahiling kan bisyon. Nawaraan ako nin kosog, asin naliwat nin marahay an sakong lalawogon kaya mayo nin siisay man na pwedeng makamidbid sako.

⁹ Kan madangog ko an saiyang tingog, mayong pakaising natumba akong padapa sa daga.

¹⁰ Dangan sarong kamot an nagpugol sako asin nagtabang na makatindog ako; padagos an sakong pagtakig.

¹¹ Nagsabi sako an anghel, “Daniel, namomotan ka nin Dios. Tumindog ka asin hinanyoga an sakong sasabihon. Ako an sinugo saimo.” Pakataram niya kaini, nagtatakig akong nagtindog.

¹² Dangan nagsabi an anghel, “Daniel, dai ka matakot. Dinangog nin Dios an saimong mga pamibi poon pa kan enot na aldaw na nagpakumbaba ka tanganing makakua nin pakasabot. Napadigdi ako bilang kasimbagan sa saimong pamibi.

¹³ Kinalaban ako sa laog nin beynte y unong aldaw kan anghel na nagsusurog kan kahadean nin Persia. Alagad tinabangan ako ni Miguel, saro kan mga pamayong anghel, huli ta nagsosolo ako duman sa Persia.

¹⁴ Napadigdi ako tanganing pasaboton ka kun ano an mangyayari sa saimong banwaan sa maabot na panahon. Saro ining bisyon dapit sa maabot na panahon.”

¹⁵ Pakataram kaini kan anghel, nagduko ako asin dai ako nakataram.

¹⁶ Dangan an sakong ngabil dinutaan kan anghel, na nakakaagid sa sarong lalaki, asin nakataram ako. Sinabihan ko siya, “Kagurangnan, pinapanluya ako kan bisyon na ini kaya dai ko napapaontok an sakong pagtakig.

¹⁷ Nakakaagid ako sa sarong oripon na nagtitindog sa atubang nin saiyang kagurangnan. Paano ako makikiolay saimo? Mayo na ako nin kosog saka hinangos.”

¹⁸ Pinugol niya giraray ako, asin namatean kong nagkosog ako.

¹⁹ Nagsabi siya, “Lalaking namomotan nin marahay, dai ka matakot, mapasaimo an katoninongan; magmakosog ka asin magmaisog.” Pakasabi niya kaini, namatean kong orog akong nagkosog asin nagsabi ako, “Kagurangnan, tarami ako kan sasabihon mo huli ta napakosog mo na ako.”

^20-21 Nagsabi siya, “Aram mo kun tano ta nagdigdi ako saimo? Napadigdi ako tanganing ipahayag saimo an nasusurat sa Libro nin Katotoohan. Ngunyan, kaipuhan na magbalik ako asin labanan an anghel na nagsusurog sa Persia. Pakatapos kaiyan, matunga an anghel na nagsusurog sa Grecia. Mayo nin siisay man na makakatabang sako kundi si Miguel, an anghel na nagsusurog sa Israel.