Awit nin mga Awit 3 - Marahay na Bareta Biblia

¹ Barubanggi, sa sakong higdaan, napapangatorogan ko an sakong namomotan; hinanap ko siya, alagad dai ko nakua.

² Linibot ko an bilog na syudad, an mga tinampo asin an mga plasa kaiyan. Hinanap ko an sakong namomotan. Hinanap ko siya, alagad dai ko nakua.

³ Nahiling ako kan mga bantay na naglilibot sa syudad. Hinapot ko sinda, “Nanumpongan na nindo an sakong namomotan?”

⁴ Pakabayae ko sainda, nakua ko siya. Kinapotan ko siya asin dai ko binutasan sagkod na madara ko siya sa harong nin sakong ina, sa kwarto na sakong namundagan.

⁵ Manuga kamo sako, mga babae nin Jerusalem; magsumpa kamo huli sa marikas na mga usa na dai nindo oontokon an samong pagkamoot.

An Ikatolong Awit An Babae

⁶ Ano ining nagdadangadang hale sa kalangtadan na arog sa sarong hariging aso, na namamarong nin insenso asin mira, an insensong ipinapabakal kan mga negosyante?

⁷ Maabot si Solomon, lunad sa saiyang trono; sesentang soldados an nagbabantay saiya, an pinakamakosog na mga lalaki nin Israel.

⁸ Gabos sinda igwa nin espada asin matitibay sa pakigera. An lambang saro sainda igwa nin espada sa habayan, nagbabantay laban sa bangging pagsalakay.

⁹ Pinapasan ninda si Hadeng Solomon na nasa saiyang trono na gibo sa mga kahoy nin Lebanon.

¹⁰ An mga harigi kaiyan napapatos nin plata; na nababawan nin telang binurdahan nin bulawan. An mga kutson kaiyan napapatos nin telang purpura, na may pagkamoot na hinabol kan kababaehan nin Jerusalem.

¹¹ Mga babae nin Sion, madya asin hilinga nindo si Hadeng Solomon. Sulot niya an korona na ibinugtak kan saiyang ina sa aldaw na siya kinasal, sa aldaw nin saiyang kaogmahan.