Awit nin mga Awit 2 - Marahay na Bareta Biblia

¹ Saro sana akong burak nin Sharon, sarong lirio kan mga kapantayan.

An Lalaki

² Siring sa sarong lirio sa tahaw kan katonokan, an sakong namomotan sa tahaw kan kababaehan.

An Babae

³ Siring sa kahoy na mansanas sa tahaw kan kakahoyan sa kadlagan, an sakong namomotan sa tahaw kan ibang kalalakihan. Boot kong danay na magtukaw sa lindong kaiyan, asin mahamis sa sakong pagnamit an bunga kaiyan.

⁴ Dinara niya ako sa lugar na pagbabangketehan asin initaas niya an bandera nin pagkamoot sa ibabaw ko.

⁵ Balikan an sakong kosog huli sa mga pasas; pakosoga ako huli sa mga mansanas! Nanluluya ako huli sa sobrang pagkamoot.

⁶ An wala niyang kamot nauulonan ko, asin nakukugos ako kan saiyang too.

⁷ Manuga kamo sako, mga babae nin Jerusalem; magsumpa kamo huli sa marikas na mga usa, na dai nindo oontokon an samong pagkamoot.

An Ikaduwang Awit An Babae

⁸ Nadadangog ko an tingog kan sakong namomotan. Nagdadangadang siyang nagdadalagan sa kabukidan, binabalyo an kabubuldan pasiring sako.

⁹ Arog sa usa an sakong namomotan, siring sa sarong hoben na usa. Duman siya nagtitindog sa kataed kan lanob. Minadungaw siya sa bintana asin minasirip sa mga rehas.

¹⁰ Nagtataram sako an sakong namomotan. Madya, sakong namomotan; sakong padangat, umiba ka sako.

An Lalaki

¹¹ Nakalihis na an tig-lipot; nag-ontok na an uran;

¹² nagturunga na sa daga an mga burak. Iyo na ini an panahon nin pag-awit; nadadangog na sa kaomahan an awit kan mga salampati.

¹³ Naghihinog na an bunga kan higera; namumurak na an mga balagon, dara kan doros an saindang parong. Kaya madya, sakong namomotan; sakong padangat, umiba ka sako.

¹⁴ Nakakaagid ka sa salampating nagtatago sa gutak nin sarong gapo. Pahilingan sako an magayon mong lalawogon asin padangogan sako an nakakabihag mong tingog.

¹⁵ Dakopa an mga amid, an saradit na mga amid, bago ninda raoton an namumurak tang ubasan.

An Babae

¹⁶ Sadiri ko an sakong namomotan, asin ako sadiri niya. Pinapasabsab niya an saiyang mga hayop sa tahaw kan mga lirio

¹⁷ sagkod na maghoyop an doros na makaaga asin mawara an mga anino. Magbalik ka, sakong namomotan, siring sa usa sa kabukidan nin Beter.