Awit nin mga Awit 1 - Marahay na Bareta Biblia

¹ Iyo ini an pinakamagayon sa mga awit ni Solomon.

An Enot na Awit An Babae

² Kinakarigos mo ako kan saimong mga hadok; orog pa sa arak an saimong pagkamoot.

³ Igwa ka nin hamot na nalalaen nanggad; an saimong ngaran nagpapagiromdom kaiyan. Kaya namomotan ka kan mga babae.

⁴ Ibahan ako, asin madulag kita; ika an sakong magigin hade asin daraha ako sa saimong kwarto. Magigin maogma kitang duwa, mainom nin dakul, asin mag-oogma sa satong pagkamoot. Kaya bakong makangangalas na namomotan ka kan gabos na babae!

⁵ Mga babae nin Jerusalem, maitom ako alagad magayon, maitom siring sa mga tolda sa desyerto nin Kedar, alagad magayon arog sa mga kurtina sa palasyo ni Solomon.

⁶ Dai nindo ako pagmenoson huli ta ako maitom, huli ta pinaitom ako kan saldang nin aldaw. Naanggot sako an sakong mga tugang na lalaki asin pinatrabaho ako sa ubasan. Mayo na ako nin panahon para sa sadiri ko.

⁷ Sabihi ako, sakong namomotan, saen na pasabsaban mo dadarahon an saimong mga hayop? Saen mo sinda papahingaloon sa kainitan nin aldaw? Tadaw ta kaipuhan hanapon taka sa kaibahan kan ibang pastor sa tahaw kan mga hayop?

An Lalaki

⁸ Kun dai mo aram an lugar, pinakamagayon sa mga babae, lakaw asin sunoda an gira kan mga hayop; maghanap ka nin masasabsaban para sa saimong mga kanding harani sa mga tolda kan mga pastor.

⁹ Nadadagka mo an mga lalaki siring na nadadagka kan babaeng kabayo an mga lalaking kabayo kan mga karwahe ni Faraon.

¹⁰ Magayon an saimong buhok sa ibabaw kan saimong pisngi, asin minalaylay sa saimong liog arog sa mga samno.

¹¹ Alagad gigibohan mi ika nin kulintas na bulawan, na natatampokan nin plata.

An Babae

¹² Mantang naghihigda an sakong hade sa saiyang higdaan, napano kan sakong pahamot an palibot.

¹³ Parong nin mira an sakong namomotan, mantang naghihigda siya sa sakong daghan.

¹⁴ Siring sa mga burak sa kaomahan an sakong namomotan, na namumurak sa mga ubasan sa Engedi.

An Lalaki

¹⁵ Magayon ka nin marahay, sakong namomotan; sa pagkamoot, an saimong mga mata nagkikinang!

An Babae

¹⁶ Gwapo ka nin marahay, sakong namomotan; ika an sakong kaogmahan! An berdeng mga doot iyo an satong magigin higdaan;

¹⁷ an mga sedro iyo an magigin kahabaan kan satong harong, asin an mga sipres an magigin kisame kaiyan.