Amos 9 - Marahay na Bareta Biblia

An mga Padusa nin Kagurangnan

¹ Nahiling ko an Kagurangnan na nagtitindog sa kataed kan altar. Nagboot siya, “Badoli nin makosog an poro kan mga harigi kan templo sagkod na mayugyog an pundasyon. Pasaa an mga iyan dangan pabayae na mahulog sa mga payo kan mga tawo. An mga matadang buhay, gagadanon ko sa gera. Mayo nin makakadulag; mayo nin makakaligtas.

² Maski maggibo sinda nin kalot pasiring sa kinaban kan mga gadan, madadakop ko pa sinda. Maski magsakat sinda sa langit, dadarahon ko sinda sa ibaba.

³ Maski magtago sinda sa alitoktok kan Bukid nin Carmelo, hahanapon ko sinda asin dadakopon. Maski tagoan ninda ako sa irarom kan dagat, susugoon ko an impakto na yaon diyan tanganing kagaton sinda.

⁴ Maski bihagon sinda kan saindang mga kaiwal, pagbobotan ko an mga ini tanganing gadanon sinda. Desidido na ako na gadanon sinda, bakong tabangan.”

⁵ An kinaban dinudutaan nin Kagurangnan, an Dios nin mga hukbo, asin tinatakigan iyan; an gabos na nag-eerok diyan nagmomondo. An bilog na daga minaitaas asin minaibaba arog sa Salog nin Nilo.

⁶ Pinapatindog nin Kagurangnan an saiyang harong sa kalangitan, asin ibinubugtak niya an panganoron sa itaas kan kinaban. Inaapod niya an katubigan kan dagat dangan inuula iyan sa daga. Kagurangnan an saiyang ngaran!

⁷ An Kagurangnan nagtataram, “Banwaan nin Israel, an pagromdom ko sa Etiopia siring kan pagromdom ko saimo. Kinua ko an mga Filisteo hale sa Creta asin an mga Siro hale sa Kir, siring na kinua ko kamo sa Egipto.

⁸ Ako, an Kagurangnan Dios, nagmamasid sa makasalan na kahadean na ini nin Israel, asin paparaon ko iyan sa ibabaw kan daga. Alagad dai ko pupuhoon an kapagarakian ni Jacob.

⁹ “Ako an magboboot asin an magsasaligsig kan banwaan nin Israel arog kan pagsaligsig sa trigo. Sasaligsigon ko sinda sa tahaw kan mga nasyon tanganing mahale an gabos na mayo nin halaga.

¹⁰ An gabos na parakasala sa sakong banwaan magagadan sa gera—sinda gabos na nagsasabing, ‘Dai itutugot nin Dios na makarani sa sato an kapahamakan.’”

An Maabot na Pagpakarahay kan Israel

¹¹ An Kagurangnan nagtataram, “Maabot an panahon na papakarahayon ko an kahadean ni David, na nakakaagid sa sarong harong na nagaba. Hihirahayon ko an mga kudal kaiyan asin papatindogon ko giraray iyan arog kan dating kamugtakan kaiyan.

¹² Kaya masasakop kan banwaan nin Israel an natatadang daga nin Edom asin an gabos na nasyon na sadiri ko kaidto,” an sinasabi nin Kagurangnan, an magibo kan bagay na ini.

¹³ An Kagurangnan nagtataram, “Maabot an panahon na mas marikas an pagtalubo kan trigo ki sa pag-ani kaiyan, asin an pagtalubo kan ubas ki sa paggibo nin arak. An kabukidan magtatagdo nin mahamis na arak, asin magbubulos nin arak an kabubuldan.

¹⁴ Ibabalik ko an sakong banwaan sa saindang daga. Hihirahayon ninda an nagkararaot nindang syudad asin mag-eerok sinda duman; matanom sinda nin mga ubas asin iinomon ninda an arak; matanom sinda sa mga tatamnan patin makakan kan bunga kaiyan.

¹⁵ Itatanom ko an sakong banwaan sa daga na itinao ko sainda, asin dai na nanggad sinda gagaboton.” An Kagurangnan na saindong Dios an nagtaram.