Amos 8 - Marahay na Bareta Biblia

Sarong Bisyon nin Sarong Basket na Pano nin Prutas

¹ Nagkaigwa pa ako nin sarong bisyon hale sa Kagurangnan Dios. Sa bisyon na iyan nahiling ko an sarong basket na pano nin prutas.

² Hinapot ako nin Kagurangnan, “Amos, ano an nahihiling mo?” Nagsimbag ako, “Sarong basket nin prutas.” Tinaraman ako nin Kagurangnan, “Nag-abot na an kataposan kan sakong banwaan na Israel. Dai ko na babagohon an sakong isip dapit sa pagpadusa sa sainda.

³ Sa aldaw na iyan, an mga awit sa laog kan palasyo magigin agrangay nin kamondoan. Magkakaigwa nin mga bangkay sa gabos na lugar; itatapok sinda sa luwas na mayo sana nin ribok.”

An Kataposan nin Israel

⁴ Dangoga nindo ini, kamo na nagtitimaktimak sa mga daing sukat asin nagpapasakit sa mga dukha kan daga.

⁵ Nagsasaboot kamo, “Dai mi na mahahalat na matapos pa an mga banal na aldaw tanganing ipabakal an samong trigo. Nuarin kaya matatapos an Sabbath tanganing makatinda na kami? Dangan, lalangkawan mi an presyo kan samong paninda, magamit kami nin may dayang sukol saka dadayaon mi sa timbang an mga parabakal.

⁶ Ipapabakal mi sa halangkaw na presyo an mayo nang halagang trigo. Mahanap kami nin sarong dukha na dai kayang magbayad kan saiyang utang, maski kan halaga nin sarong pades nin sandalyas, dangan babakalon mi siya bilang sarong oripon.”

⁷ An Kagurangnan, an Dios nin Israel, nagsumpa, “Dai ko nanggad malilingawan an mga maraot nindang gibo.

⁸ Kaya magkakaigwa nin linog, asin mahahadit an gabos sa daga. Matatanyog an bilog na daga; maitaas asin maibaba iyan siring sa Salog nin Nilo.

⁹ Maabot an panahon na pasusulnopon ko an aldaw sa kaodtohan asin papadiklomon ko an kinaban maski aldaw. Ako, an Kagurangnan Dios, an nagtaram.

¹⁰ An saindong mga pyesta magigin mga aldaw nin kamondoan, asin an saindong magayagayang mga awit magigin mga panambitan. Gigibohon kong mapiritan kamong mag-aris kan saindong payo saka maggubing nin sako. Magigin arog kamo sa mga magurang na nagmomondo huli sa pagkagadan kan solo nindang aking lalaki. Magigin mapait sagkod sa kataposan an aldaw na iyan.

¹¹ “Maabot an panahon na mapadara ako nin makuring gutom sa daga. Magugutom an mga tawo, alagad bakong para sa kakanon; mapapaha sinda, alagad bakong para sa tubig. Magugutom asin mapapaha sinda para sa mensaheng hale sa Kagurangnan. Ako, an Kagurangnan Dios, an nagtaram.

¹² Malakaw an mga tawo magpoon sa may Gadan na Dagat sagkod sa Mediteraneo dangan malibot magpoon sa amihan pasiring sa sirangan. Hahanapon ninda sa gabos na lugar an mensahe nin Kagurangnan, alagad dai ninda iyan makukua.

¹³ Sa aldaw na iyan, maski an makokosog na hoben na mga lalaki saka babae, madidismayo huli sa paha.

¹⁴ An mga tawong nagsusumpa huli sa ngaran kan mga dios-dios nin Samaria, na nagsasabing, ‘Huli sa ngaran kan dios nin Dan,’ o, ‘Huli sa ngaran kan dios nin Beer-sheba’—matutumba asin dai na makakabangon giraray.”