Amos 6 - Marahay na Bareta Biblia

An Pagkarumpag nin Israel

¹ Herak man saindo na namumuhay sa kaginhawahan sa Sion asin sa saindo na nakakamate nin katiwasayan sa Samaria—kamong bantog na kalalakihan kaining dakulang nasyon nin Israel, kamong dinudolok kan mga tawo tanganing magpatabang!

² Lakaw kamo asin hilinga nindo an syudad nin Calne, dangan magdagos kamo sa dakulang syudad nin Hamat saka lumugsot kamo pasiring sa Filistiong syudad nin Gat. Mas marahay daw an mga ini ki sa mga kahadean nin Juda saka Israel? Mas dakula daw an saindang teritoryo ki sa teritoryo nindo?

³ Habo nindong akoon na maabot an aldaw nin kasakitan, alagad hinihidali nindo an pag-abot kaiyan huli kan saindong mga ginigibo.

⁴ Herak man saindo na naghihigda sa magagayon na higdaan, mantang nagpapakabasog sa pagkakan kan karne nin mga kordero saka mga ogbon na baka!

⁵ Nawiwili kamong maggibo nin mga awit, arog ki David, dangan tinutugtog nindo iyan sa saindong mga arpa.

⁶ Ginalon na arak an iniinom nindo asin mamahalon na mga pahamot an ginagamit nindo, alagad dai nindo ipinagmomondo an pagkarumpag nin Israel.

⁷ Kaya, kamo an enot na itatapok asin dai na kamo makakapagbangkete saka makakapagpyesta.

⁸ Itinao na nin Kagurangnan, an Dios nin mga hukbo, an patanid na ini: “Ikinakaongis ko an kapalangkawan kan banwaan nin Israel; ikinakauyam ko an magagayon nindang mga harong. An saindang pangenot na syudad saka an gabos na yaon diyan itatao ko sa kaiwal.”

⁹ Kun igwang sampolo na matada sa sarong pamilya, magagadan sinda gabos.

¹⁰ An kadugo kan nagadan, an namamahala kan lubong, iyo an madara kan bangkay paluwas sa harong. Dangan maapod an kadugo sa kiisay man na yaon pa sa laog kan harong, “May kaiba ka pa diyan?” Masimbag an sarong tingog, “Mayo!” Dangan masabi an kadugo, “Mag-alo ka! Kaipuhan magin maingat kita na dai masambit an ngaran nin Kagurangnan.”

¹¹ Kun itao na nin Kagurangnan an pagboot, magkakaroronot an mga harong, dakula man o sadit.

¹² Pinapadalagan daw sa kagapoan an kabayo? Ipinag-aarado daw an baka sa dagat? Alagad an hustisya ginibo nindong hudong asin an tama ginibo nindong sala.

¹³ Naghahambog kamo manongod sa pagsakop nindo sa Lodebar. Nagsasabi kamong, “Kaya mi nang sakopon an Karnaim.”

¹⁴ An Kagurangnan mismo, an Dios nin mga hukbo, nagtataram, “Banwaan nin Israel, sarong dayuhan na hukbo an ipapadara ko tanganing sakopon an saindong daga. Aapihon kamo kaiyan magpoon sa Agihan nin Hamat sa amihan sagkod sa Sapa nin Araba sa habagat.”