Amos 1 - Marahay na Bareta Biblia

¹ Iyo ini an mga tataramon ni Amos, an pastor hale sa banwa nin Tekoa. Duwang taon bago an paglinog, kan si Uzzias iyo pa an hade nin Juda asin si Jeroboam na aking lalaki ni Jehoas iyo man an hade nin Israel, ipinahayag nin Dios ki Amos an mga bagay na ini manongod sa Israel.

² Nagsabi si Amos, “Nagtataram sa makosog na tingog an Kagurangnan hale sa Bukid nin Sion; nagdadaguldol an saiyang tingog hale sa Jerusalem. Naaalang an mga pasabsaban, asin naluluyos an mga doot sa Bukid nin Carmelo.”

An Paghukom nin Dios sa mga Kataed na Nasyon nin Israel Siria

³ Nagtataram an Kagurangnan, “Paulit-ulit na nagkasala an mga taga Damasco, asin huli kaiyan, papadusahan ko sinda. An mga taga Gilead pinasakitan ninda nin makuri.

⁴ Kaya papadarahan ko nin kalayo an palasyo na pinatindog ni Hadeng Hazael asin susuloon ko an mga bantayan ni Hadeng Ben-hadad.

⁵ Roronoton ko an mga trangkahan nin Damasco asin hahaleon ko an mga nag-eerok sa Kapantayan nin Aven, saka an pamayo nin Bet-eden. Dadarahon bilang mga bilanggo an mga taga Siria pasiring sa Kir.”

Filistia

⁶ Nagtataram an Kagurangnan, “Paulit-ulit na nagkasala an mga taga Gaza, asin huli kaiyan, papadusahan ko sinda. Dinara ninda an sarong bilog na nasyon dangan ipinabakal bilang mga oripon sa mga taga Edom.

⁷ Kaya papadarahan ko nin kalayo an mga kudal kan syudad nin Gaza asin susuloon ko an mga bantayan kaiyan.

⁸ Hahaleon ko an mga pamayo kan mga syudad nin Asdod saka Askelon. Papadusahan ko an syudad nin Ekron, asin magagadan an natadang mga Filisteo.”

Tiro

⁹ Nagtataram an Kagurangnan, “Paulit-ulit na nagkasala an mga taga Tiro, asin huli kaiyan, papadusahan ko sinda. Dinara nindang bihag an sarong bilog na nasyon sa daga nin Edom. Dai ninda inotob an tipan nin pakikipagkatood na saindang ginibo.

¹⁰ Kaya papadarahan ko nin kalayo an mga kudal kan syudad nin Tiro asin susuloon ko an mga bantayan kaiyan.”

Edom

¹¹ Nagtataram an Kagurangnan, “Paulit-ulit na nagkasala an mga taga Edom, asin huli kaiyan, papadusahan ko sinda. Linamag ninda an saindang mga tugang, an mga Israelita, asin dai ninda naherakan. Daing kasagkoran an saindang kaanggotan, asin pinadanay ninda iyan.

¹² Kaya papadarahan ko nin kalayo an syudad nin Teman asin susuloon ko an mga bantayan nin Bozra.”

Ammon

¹³ Nagtataram an Kagurangnan, “Paulit-ulit na nagkasala an mga taga Ammon, asin huli kaiyan, papadusahan ko sinda. Sa saindang pakigera tanganing mapadakula an saindang teritoryo, linaslas ninda an tulak kan mga babaeng bados sa Gilead,

¹⁴ kaya papadarahan ko nin kalayo an mga kudal kan syudad nin Rabba asin susuloon ko an mga bantayan kaiyan. Dangan magkakaigwa nin kinurahaw sa aldaw nin gera, asin an ralaban magigin mangirhat siring sa sarong bagyo.

¹⁵ An saindang hade saka an mga opisyal niya ipapatapok.”