2 Samuel 8 - Marahay na Bareta Biblia

Mga Kapangganahan ni David

¹ Pakatapos kaini, sinalakay giraray ni David an mga Filisteo. Dinaog niya sinda, asin tinapos niya an saindang pagsakop sa daga.

² Dinaog man niya an mga Moabita; pinahigda niya an mga ini sa daga asin ginadan an duwa sa lambang tolo sa sainda. Kaya an mga Moabita nagin mga sorogoon ni David asin nagbayad sinda saiya nin buhis.

³ Dangan dinaog ni David si Hadadezer na aking lalaki ni Rehob, asin hade nin Zoba. Pasiring kaidto si Hadadezer sa teritoryo sa may Salog nin Eufrates huli ta boot niya giraray na masakop an teritoryong idto.

⁴ Binihag ni David an mil syete syentos sa mga nakakabayong soldados ni Hadadezer asin beynte mil kan saiyang mga soldados. Pinirilayan niya an mga kabayo, alagad nagtada siya para sa sanggatos na karwahe.

⁵ Kan nag-abot an mga Siro na taga Damasco tanganing tabangan si Hadeng Hadadezer, sinalakay sinda ni David asin ginadan niya an beynte y dos mil na mga soldados.

⁶ Dangan nagpatindog si David nin mga kampo nin mga soldados sa Damasco; nagin sorogoon niya an mga Siro asin nagbuhis sinda saiya. Pinapanggana nin Kagurangnan si David saen man siya magduman.

⁷ Sinamsam ni David an bulawan na mga kalasag na dara kan mga opisyal ni Hadadezer, dangan dinara sa Jerusalem.

⁸ Nagkua man siya nin dakul na bronse hale sa Beta asin Berotai, mga syudad na sakop ni Hadadezer.

⁹ Kan madangog ni Toi na hade kan Hamat na dinaog ni David an bilog na hukbo ni Hadadezer,

¹⁰ sinugo niya si Joram na saiyang aking lalaki sa pagtaong galang asin sa pag-omaw ki David, huli ta dinaog kaini si Hadadezer, na dakul na beses nang nakalaban ni Toi. Dinara ni Joram ki David an mga regalong gibo sa bulawan, plata saka bronse.

¹¹ An mga regalong ini idinusay ni Hadeng David sa Kagurangnan, kaiba an mga plata asin bulawan na sinamsam niya sa mga nasyon na saiyang nadaog—

¹² an Edom, Moab, Ammon, Filistia, asin Amalek—patin an nasamsam ki Hadadezer na aking lalaki ni Rehob na hade nin Zoba.

¹³ Orog na nagin bantog si David pagbalik niya hale sa panggadan nin dyes y otso mil na mga Edomita sa Kapantayan nin Asin.

¹⁴ Nagpatindog siya nin mga kampo nin mga soldados sa Edom, asin nagin sorogoon niya an mga tawo duman. Pinapanggana nin Kagurangnan si David saen man siya magduman.

¹⁵ Naghade si David sa bilog na Israel; tinawan niya nin hustisya asin katanosan an saiyang banwaan.

¹⁶ Si Joab, na aking lalaki ni Zeruias, iyo an pamayo kan hukbo; si Jehosafat, na aking lalaki ni Ahilud, iyo an kansilyer;

¹⁷ si Zadok, na aking lalaki ni Ahitub, asin si Ahimelec, na aking lalaki ni Abiatar, iyo an mga padi; si Seraias, iyo an sekretaryo;

¹⁸ si Benaias, na aking lalaki ni Johoiada, iyo an namahala kan mga parabantay ni David, asin an mga aking lalaki ni David iyo an mga padi.