2 Samuel 6 - Marahay na Bareta Biblia

Dinara an Kaban nin Tipan sa Jerusalem

¹ Tinipon giraray ni David an pinakamarahay na mga soldados sa Israel, na an bilang nag-abot sa treynta mil.

² Pinangenotan niya sinda pasiring sa Baala sa Juda, tanganing kuahon duman an Kaban nin Tipan nin Dios, na inapod sa ngaran kan Makakamhan na Kagurangnan, na nagtutukaw sa trono sa ibabaw kan mga kerubin.

³ An Kaban nin Tipan kinua ninda sa harong ni Abinadab duman sa bulod, asin ilinunad ninda sa sarong bagong kariton. An mga aking lalaki ni Abinadab na si Uzza asin Ahio iyo an nag-aantabay kan kariton;

⁴ si Ahio an naglalakaw sa enotan.

⁵ Si David asin an gabos na Israelita nagsasayaw saka nag-aawit sa bilog nindang kosog tanganing omawon an Kagurangnan. Nagtugtog sinda nin mga arpa, tamborin, lira, bombo, saka gimbal.

⁶ Pag-abot ninda sa ginikan ni Nacon, napalupog an mga baka, kaya kinapotan ni Uzza an Kaban nin Tipan.

⁷ Naanggot an Kagurangnan Dios ki Uzza kaya ginadan niya ini duman. Nagadan si Uzza sa kataed kan Kaban nin Tipan,

⁸ kaya sagkod ngunyan an lugar na idto inaapod Perez Uzza. Naanggot si David huli ta pinadusahan nin Kagurangnan si Uzza.

⁹ Dangan natakot si David sa Kagurangnan asin nagsabi, “Paano ko na madadara ngunyan an Kaban nin Tipan?”

¹⁰ Kaya dai na dinara ni David sa Jerusalem an Kaban nin Tipan; iwinalat niya ini sa harong ni Obed Edom, na taga Gat.

¹¹ Nagdanay duman an Kaban nin Tipan sa laog nin tolong bulan, asin benendisyonan nin Kagurangnan an pamilya ni Obed Edom.

¹² Naaraman ni Hadeng David na huli kan Kaban nin Tipan, benendisyonan nin Kagurangnan an pamilya ni Obed Edom asin an gabos na pagsadiri niya; kaya nagduman si David sa harong ni Obed Edom asin kinua an Kaban nin Tipan dangan dinara sa Jerusalem; nagkaigwa sinda nin dakulang selebrasyon.

¹³ Pakalakaw nin anom na lakad kan mga nagdadara kan Kaban nin Tipan, pinaontok sinda ni David, dangan nagdolot siya sa Kagurangnan nin sarong torong baka asin sarong pinatabang ogbon nin baka.

¹⁴ Nagsayaw si David sa atubangan nin Kagurangnan sa bilog niyang kosog; nakasulot siya nin efod na lino.

¹⁵ Sa siring na paagi, an Kaban nin Tipan dinara sa Jerusalem ni David asin kan bilog na Israel na nagkukurahaw sa kaogmahan asin nagpapatanog kan mga trompeta.

¹⁶ Mantang dinadara palaog sa syudad an Kaban nin Tipan, nagdungaw sa bintana si Mical na aking babae ni Saul asin nahiling niya si Hadeng David na nagsasayaw saka naglulukso sa atubangan nin Kagurangnan; nauyam si Mical ki Hadeng David.

¹⁷ An Kaban nin Tipan nin Kagurangnan dinara ninda asin ibinugtak sa sadiri kaining lugar sa laog kan tolda na pinatindog ni David. Pakatapos, nagdolot si David nin mga tinutong na atang asin dolot para sa katoninongan sa Kagurangnan.

¹⁸ Pakadolot ni David kan mga sakripisyo, benendisyonan niya an mga tawo sa ngaran nin Kagurangnan nin mga hukbo,

¹⁹ asin tinawan niya an lambang lalaki saka babae nin sarong pedasong tinapay, sarong pedasong karne saka mga pasas. Dangan an lambang saro nagpuli sa saiyang harong.

²⁰ Kan magpuli si David tanganing masakaibahan kan saiyang pamilya, sinabat siya ni Mical asin sinabihan, “Nagdakula an dangog kan hade nin Israel ngunyan na aldaw huli ta naghuba siya na garo lolong sa atubangan kan mga babaeng oripon kan saiyang mga opisyal!”

²¹ Nagsimbag si David, “Nagsayaw ako tanganing sambahon an Kagurangnan, na nagpili sako embes kan saimong ama asin kan saiyang pamilya bilang hade kan bilog na Israel. Masayaw pa ako tanganing sambahon an Kagurangnan,

²² asin orog kong ibababa an sakong pagkatawo. Pwede mong isipon na mayo akong halaga, alagad oomawon ako kan mga daragang idto!”

²³ Dai nagkaigwa nin aki si Mical na aking babae ni Saul sagkod na nagadan siya.