2 Samuel 5 - Marahay na Bareta Biblia

Nagin Hade si David sa Israel asin sa Juda

¹ Dangan nagduman ki David sa Hebron an gabos na tribu nin Israel asin nagsabi, “Kadugo mo kami.

² Kaidto, maski kan si Saul iyo pa an samong hade, ika an namayo kan banwaan nin Israel sa mga gera, asin nanuga saimo an Kagurangnan na ika an mangengenot kan saiyang banwaan asin magigin pamayo ninda.”

³ Kaya nagduman ki Hadeng David sa Hebron an gabos na kamagurangan nin Israel. Nakipagtipan siya sainda sa atubangan nin Kagurangnan, asin linahidan ninda si David bilang hade nin Israel.

⁴ Treyntang taon an edad ni David kan siya nagin hade, asin naghade siya sa laog nin kwarentang taon.

⁵ Pinaghadean niya an Juda duman sa Hebron sa laog nin pito may kabangang taon, dangan pinaghadean niya an bilog na Israel asin Juda duman sa Jerusalem sa laog nin treynta y tres na taon.

⁶ Dangan naglakaw si David asin an saiyang mga tawohan tanganing salakayon an Jerusalem. An mga Jebuseo, na nag-eerok duman, naghona na dai masasakop ni David an saindang syudad, kaya nagsabi sinda ki David, “Dai ka nanggad makakalaog digdi; pwedeng olangon an saimong paglaog maski kan mga buta asin kan mga pilay.” (

⁷ Alagad nasakop ni David an bantayan nin Sion, asin nabantog ini sa ngaran na “Syudad ni David.”)

⁸ Kan aldaw na idto, nagsabi si David sa saiyang mga tawohan, “An siisay man na boot gumadan kan mga Jebuseo, na ikinakaongis ko, kaipuhan mag-agi sa kanal kan tubig asin salakayon an mga pilay saka mga buta duman.” (Ini an dahelan kun tadaw ta sinabing, “Dai makakalaog sa harong nin Kagurangnan an mga buta asin an mga pilay.”)

⁹ Duman na nag-erok si David sa bantayan asin nginaranan niya ining “Syudad ni David.” Pinadakula niya an syudad magpoon sa lugar na tinambakan nin daga sa sirangan na parte kan bulod.

¹⁰ Orog na nagkosog si David, huli ta kaiba niya an Kagurangnan, an Dios nin mga hukbo.

¹¹ Nagpadara nin mga sugo ki David si Hiram na hade nin Tiro; nagpadara siya nin mga kahoy na sedro, siring man mga karpintero asin mga kantero na nagtugdok kan palasyo ni David.

¹² Kaya nasabotan ni David na ibinugtak na siya nin Kagurangnan bilang hade nin Israel, asin pinapauswag nin Kagurangnan an saiyang kahadean para sa banwaan nin Israel.

¹³ Pakabalyo ni David sa Jerusalem hale sa Hebron, nagkaigwa pa siya nin dakul na kasaroan asin agom; dakul an nagin aki niyang lalaki saka babae.

¹⁴ Iyo ini an ngaran kan mga aki niyang nagkamurundag sa Jerusalem: Sammua, Sobab, Natan, Solomon,

¹⁵ Ibar, Elisua, Nefeg, Jafia,

¹⁶ Elisama, Eliada, asin Elifelet.

Kapangganahan laban sa mga Filisteo

¹⁷ Kan maaraman kan mga Filisteo na si David iyo an linahidan bilang hade nin Israel, nagluwas an gabos na Filisteo tanganing dakopon si David. Alagad naaraman ini ni David kaya nagduman siya sa sarong bantayan.

¹⁸ Nag-abot an mga Filisteo asin naglakop sinda sa Kapantayan nin Refaim.

¹⁹ Hinapot ni David an Kagurangnan, “Boot mong salakayon ko an mga Filisteo? Papangganahon mo daw ako?” Nagsimbag an Kagurangnan ki David, “Salakayon mo! Papangganahon taka!”

²⁰ Kaya nagduman si David sa Baal-perazim asin dinaog niya duman an mga Filisteo. Nagsabi si David, “Sa atubang ko, linagbas nin Kagurangnan an sakong mga kaiwal arog sa sarong baha.” Kaya an lugar na idto nginaranan Baal-perazim.

²¹ Kan magdurulag an mga Filisteo, nagkawaralat an saindang mga dios-dios; an mga ini kinurua ni David asin kan saiyang mga tawohan.

²² Dai nahaloy, nagbalik an mga Filisteo asin naglakop giraray sinda sa Kapantayan nin Refaim.

²³ Naghapot giraray si David sa Kagurangnan, na nagsabi saiya, “Dai mo sinda pagsalakayon hale digdi; maglibot ka asin salakayon mo sinda sa likodan ninda, harani sa mga kahoy na balsamo.

²⁴ Kun madangog mo na an pagmamartsa sa alitoktok kan mga kahoy na balsamo, magsalakay ka, huli ta ako an mangengenot saindo sa pagdaog kan hukbo kan mga Filisteo.”

²⁵ Ginibo ni David an ipinagboot saiya nin Kagurangnan, asin napadulag niya an mga Filisteo magpoon sa Geba sagkod sa Gezer.