2 Samuel 4 - Marahay na Bareta Biblia

Ginadan si Isboset

¹ Kan madangog ni Isboset na aking lalaki ni Saul na ginadan si Abner sa Hebron, natakot siya asin nanluya an boot kan bilog na banwaan nin Israel.

² Si Isboset igwa nin duwang opisyal, na lider nin mga grupong parasalakay—si Baana asin si Recab, mga aking lalaki ni Rimmon, na taga Beerot sa tribu ni Benjamin. (An Beerot ibinibilang na kabtang kan Benjamin.

³ An mga dating nag-eerok duman nagdurulag pasiring sa Gittaim, asin duman na nag-erok sagkod ngunyan.)

⁴ Si Jonatan na aking lalaki ni Saul igwa nin aking lalaki na an ngaran Mefiboset. Limang taon pa sana an edad niya kan magadan si Saul asin si Jonatan. Kan an bareta manongod kan saindang pagkagadan mag-abot hale sa syudad nin Jezreel, an aki kinua tolos kan paraataman asin nagdulag; sa kasibotan, nabutasan niya an aki na ikinapilay kaini.

⁵ Naglakaw si Recab asin si Baana pasiring sa harong ni Isboset. Nakaabot sinda duman kan mag-oodto na; nagpapahingalo kan panahon na idto si Isboset.

⁶ Nangatorog an babaeng nagbabantay sa pintoan mantang naghihimalid kan trigo, kaya nakalaog sa harong si Recab asin si Baana.

⁷ Nagduman sinda sa kwarto ni Isboset mantang nagtotorog siya sa saiyang higdaan, asin ginadan ninda siya. Pinugotan ninda siya dangan dara an payo, nagbaklay sinda sa bilog na banggi sa Kapantayan nin Jordan.

⁸ Dinara ninda an payo ki Hadeng David duman sa Hebron. Nagsabi sinda, “Uya an payo ni Isboset, an aki kan saimong kaiwal na si Saul na boot gumadan saimo. Itinugot nin Kagurangnan na makabalos ngunyan na aldaw an sakong hade ki Saul asin sa saiyang kapagarakian.”

⁹ Nagsimbag si David sainda, “Isinusumpa ko sa ngaran kan buhay na Kagurangnan, na nagligtas sako sa gabos na pag-alaman,

¹⁰ na dinakop ko asin ginadan duman sa Ziklag an nagdara sako kan bareta na gadan na si Saul. Naghona siyang marahay an bareta na dara niya; alagad an tandan na itinao ko saiya—kagadanan.

¹¹ Gurano pa daw karaot an sakong gigibohon sa mga maraot na tawo na guminadan nin sarong matanos, na nagkakatorog sa sadiri niyang harong? Bako daw na hahagadon ko sa saindo an saiyang dugo asin paparaon ko kamo sa ibabaw nin daga?”

¹² Pinagbotan ni David an saiyang mga tawohan asin ginadan ninda si Recab saka si Baana. Pinutol ninda an mga kamot saka mga bitis kan duwa, dangan binitay sa harani kan sapa sa Hebron. Alagad kinua ninda an payo ni Isboset asin ilinubong sa lulubngan ni Abner duman sa Hebron.