2 Samuel 3 - Marahay na Bareta Biblia

¹ Nagpadagos sa haloy na panahon an paglaban kan hukbo ni Saul asin kan hukbo ni David. Nagkosog an hukbo ni David, mantang nagluya an ki Saul.

An mga Aking Lalaki ni David

^2-5 Iyo ini an mga aking lalaki ni David na namundag duman sa Hebron: Si Ammon, an matua, na an ina iyo si Ahinoam na taga Jezreel; Si Kileab, an ikaduwa, na an ina iyo si Abigail na balo ni Nabal kan Carmelo; Si Absalom, an ikatolo, na an ina iyo si Maaca na aki ni Talmai na hade kan Gesur; Si Adonias, an ikaapat, na an ina iyo si Haggit; Si Sefatias, an ikalima, na an ina iyo si Abital; Si Itream, an ikaanom, na an ina iyo si Egla. Gabos sinda nagkamurundag sa Hebron.

Nag-apil si Abner ki David

⁶ Mantang naglalaban an hukbo ni David saka an hukbo ni Saul, orog na nagin mapangyari si Abner sa mga parasunod ni Saul.

⁷ Igwa kaidto si Saul nin kasaroan na an ngaran Rizpa, na aking babae ni Aias. Sarong aldaw, hinapot si Abner ni Isboset na aking lalaki ni Saul, “Tano ta dinorogan mo si Rizpa, an kasaroan kan sakong ama?”

⁸ Naanggot nin makuri si Abner, “Sa paghona mo papasaluiban ko si Saul? Ano ako, naglilingkod sa Juda? Poon pa sa kapinonan, ako nagin maimbod sa saimong ama na si Saul, sa saiyang mga tugang, asin sa saiyang mga katood. Ilinigtas taka sa mga kamot ni David, alagad ngunyan tinatawan mo ako nin sala huli sa sarong babae!

^9-10 Nanuga an Kagurangnan ki David na hahaleon niya an kahadean ki Saul asin sa saiyang kapagarakian dangan gigibohon niyang hade si David sa Israel saka sa Juda, magpoon sa sarong poro kan daga sagkod sa ibong na poro. Ngunyan, gadanon logod ako nin Dios kun dai ko papangyarihon iyan!”

¹¹ Natakot nin marahay ki Abner si Isboset kaya dai siya nakasimbag.

¹² Dangan nagpadara nin mga sugo si Abner ki David, na kan panahon na iyan idtoon sa Hebron, tanganing magsabing, “Siisay an mamamayo kaining daga? Makipagtipan ka sako, asin tatabangan taka na masakop mo an bilog na Israel.”

¹³ “Marahay!” an simbag ni David. “Makikipagtipan ako saimo sa sarong kondisyon: kaipuhan darahon mo sako an aking babae ni Saul na si Mical pag-atubang mo sako.”

¹⁴ Nagpadara man nin sugo si David ki Isboset tanganing magsabing, “Balikan sako an agom kong si Mical. Nagbayad akong sanggatos na kublit kan mga kinabuhay kan lalaking mga Filisteo tanganing maagom ko siya.”

¹⁵ Kaya kinua ni Isboset si Mical sa saiyang agom na si Paltiel na aking lalaki ni Lais.

¹⁶ Nagsunod si Paltiel sa saiyang agom sagkod sa banwa nin Bahurim; naghihibi siya mantang naglalakaw. Alagad sinabihan siya ni Abner, “Magpuli ka na,” kaya nagpuli siya.

¹⁷ Nagduman si Abner sa mga lider nin Israel dangan sinabihan sinda, “Haloy na nindong mawot na magin hade nindo si David.

¹⁸ Uya na an saindong oportunidad. Giromdoma nindo na nagtaram an Kagurangnan, ‘Gagamiton ko an sorogoon kong si David tanganing iligtas an sakong banwaan na Israel sa mga Filisteo asin sa iba pa nindang mga kaiwal.’”

¹⁹ Nakiolay man si Abner sa mga Benjaminita dangan nagduman siya sa Hebron tanganing sabihan si David kan napagkaoroyonan na gibohon kan mga Benjaminita saka kan mga Israelita.

²⁰ Kan mag-atubang si Abner ki David sa Hebron, kaiba an beynteng kalalakihan, nagbangkete si David para sainda.

²¹ Sinabihan ni Abner si David, “Maduman na ako asin titiponon ko sa sakong kagurangnan, na hade, an bilog na Israel, tanganing makipagtipan sinda saimo. Aakoon ka ninda bilang hade asin mapapasaimo an gabos na minawot mo; sasakopon mo an bilog na daga.” Kaya pinalakaw ni David si Abner asin huminaleng matoninong si Abner.

Ginadan si Abner

²² Pakahale ni Abner, nag-abot si Joab asin an ibang mga opisyal ni David hale sa sarong pagsalakay; dara ninda an kadakul na sinamsam. Alagad mayo na sa kaibahan ni David si Abner, huli ta pinalakaw na siya ni David, asin matoninong siyang naghale.

²³ Pag-abot ni Joab asin kan saiyang mga tawohan, naosipan siya na nagdalaw si Abner ki David dangan matoninong na pinahale.

²⁴ Kaya nagduman si Joab sa hade dangan nagsabi, “Ano an ginibo mo? Nagdigdi na saimo si Abner—tadaw ta tinugotan mo pang makahale?

²⁵ Napadigdi siya tanganing dayaon ka. Boot niyang maaraman an gabos mong ginigibo asin an mga lugar na pinagdudumanan mo.”

²⁶ Pakahale ni Joab sa atubangan ni David, ipinalamag niya si Abner sa saiyang mga sugo asin ibinalik siya ninda hale sa Bubon nin Sira; alagad mayong pakaaram kaini si David.

²⁷ Pag-abot ni Abner sa Hebron, isiniblag siya ni Joab sa may trangkahan, na garo boot kaolayon sa hilom, asin duman binuno siya ni Joab sa tulak. Kaya ginadan si Abner huli ta ginadan niya an tugang ni Joab na si Asahel.

²⁸ Kan madangog ni David an bareta, nagsabi siya, “Aram nin Kagurangnan na mayo akong sala asin an sakong mga nasasakopan sa pagkagadan ni Abner.

²⁹ Humugpa logod an padusa ki Joab asin sa bilog niyang pamilya! Sa lambang henerasyon nin saiyang pamilya, magkaigwa logod nin may helang na turo o daot o magkaigwa nin bakla o magadan sa ralaban o mayong kinakakan!”

³⁰ Kaya binalos ni Joab asin ni Abisai si Abner huli ta ginadan niya an saindang tugang na si Asahel sa ralaban sa Gibeon.

Ilinubong si Abner

³¹ Dangan pinagbotan ni David si Joab asin an saiyang mga tawohan na gision an saindang mga gubing, magsulot nin sako, asin magtangis para ki Abner. Sa paglubong, nagsunod si Hadeng David sa kabaong.

³² Ilinubong si Abner sa Hebron, asin makosog na nagtangis an hade sa lulubngan ni Abner; nagtangis man an gabos na tawo.

³³ Dangan inawit ni David an panambitan na ini para ki Abner: “Tadaw ta kaipuhan na magadan si Abner siring sa sarong lolong?

³⁴ An saiyang mga kamot dai nagakodan, asin an saiyang mga bitis dai nagapos; nagadan siyang siring sa sarong ginadan nin mga kriminal!” Asin nagtangis giraray an mga tawo para saiya.

³⁵ Bilog na aldaw na hiningowa kan mga tawo na magkakan si David, alagad nagsumpa siya, “Gadanon logod ako nin Dios kun magkakan ako nin anoman bago magsolnop an aldaw!”

³⁶ Tinandaan ini kan mga tawo asin nakawili ini sainda; siring na nawilihan ninda an gabos na ginibo kan hade.

³⁷ Kaya nasabotan kan gabos na nasasakopan ni David asin kan bilog na Israel na bakong kabotan kan hade an pagkagadan ni Abner na aking lalaki ni Ner.

³⁸ Sinabihan kan hade an saiyang mga opisyal, “Dai nindo naaaraman na nagadan ngunyan sa Israel an sarong prinsipe asin dakulang tawo?

³⁹ Maski ako an hade na pinili nin Dios, ako nanluluya ngunyan na aldaw. Sobra para sako an dahas kan mga aking lalaking ini ni Zeruias. Padusahan logod nin Kagurangnan an mga kriminal na ini sosog sa saindang karatan.”