2 Samuel 24 - Marahay na Bareta Biblia

Nagsenso si David

¹ Naanggot giraray an Kagurangnan sa Israel asin hiniro niya si David na iyo an magdara nin kasakitan sa sainda. Tinaraman nin Kagurangnan si David, “Lakaw asin sensohon mo an mga tawo nin Israel saka Juda.”

² Sinabihan ni David si Joab, an pamayo kan saiyang hukbo: “Lakaw asin sensohon mo an gabos na tribu nin Israel, poon sa Dan sagkod sa Beer-sheba, tanganing maaraman ko an bilang kan mga namamanwaan.”

³ Alagad nagsimbag si Joab, “Gibohon logod nin Kagurangnan na saimong Dios na magdakul pa nin sanggatos na beses an bilang ngunyan kan namamanwaan sa Israel asin mahiling mo logod na ginigibo niya iyan. Alagad tadaw ta naoogma an Mahal na Hade na gibohon ini?”

⁴ Alagad ipinaotob kan hade ki Joab saka sa mga opisyal niya an saiyang pagboot; naghale sinda sa atubang kan hade dangan naglakaw tanganing sensohon an mga tawo sa bilog na Israel.

⁵ Binalyo ninda an Jordan asin nagkampo sa habagat nin Aroer, an syudad na nasa tahaw kan kapantayan, sa teritoryo nin Gad. Hale duman, nagpa-amihan sinda, sa Jazer,

⁶ sa Gilead saka sa Kades, sa teritoryo kan mga Heteo. Dangan nagpasiring sinda sa Dan, asin nakaabot sa Sidon.

⁷ Dangan nagduman sinda sa bantayan nin Tiro, bago nagpasiring sa gabos na syudad kan mga Heveo saka kan mga Cananeo. Pakatapos, nagduman sinda sa Beer-sheba, sa habagat na parte kan Juda.

⁸ Kaya pakalihis nin siyam na bulan asin beynteng aldaw, nagbalik sinda sa Jerusalem, pakalibot ninda sa bilog na daga.

⁹ Itinao ni Joab sa hade an kabilogan na bilang kan mga lalaking maninigong maglingkod sa hukbo: otso syentos mil sa Israel asin kinyentos mil sa Juda.

¹⁰ Alagad pakatapos kan pagsenso ni David, nagbasol siya asin nagsabi siya sa Kagurangnan, “Nagkasala ako nin makuri huli kan ginibo kong ini! Nakikimaherak ako na patawadon mo ako sa kalolongan kong ini.”

^11-12 Tinaraman nin Kagurangnan si Gad, an propeta ni David, “Lakaw asin sabihan mo si David na tinatawan ko siya nin tolong pagpipilian. Gigibohon ko an arin man na saiyang pilion.” Sunod na aldaw, pakabangon ni David,

¹³ nagduman si Gad saiya asin sinabihan kan itinaram nin Kagurangnan, dangan hinapot, “Arin digdi sa tolo an pipilion mo? Tolong taon nin gutom sa saimong daga o tolong bulan nin pagdulag sa saimong mga kaiwal o tolong aldaw nin peste sa saimong daga? Isipa nin marahay, dangan sabihi ako kan saimong simbag na dadarahon ko sa nagsugo sako.”

¹⁴ Nagsimbag si David ki Gad, “Masakit an kamugtakan ko! Alagad habo kong an tawo an magpadusa sako. An Kagurangnan iyo an magpadusa sako, huli ta dakula an saiyang pagkaherak.”

¹⁵ Kaya pinadarahan nin Kagurangnan nin peste an Israel, poon aga sagkod sa panahon na itinalaan niya. Nagkagaradan an setenta mil na Israelita poon sa Dan sagkod sa Beer-sheba.

¹⁶ Kan an Jerusalem na an raraoton kan anghel nin Kagurangnan, nagliwat siya nin isip dapit sa pagpadusa sa mga tawo. Tinaraman niya an anghel na nanggagadan kan mga tawo, “Ontok! Tama na!” An anghel yaon duman sa may ginikan ni Arauna na Jebuseo.

¹⁷ Nahiling ni David an anghel na nanggagadan kan mga tawo, asin sinabihan niya an Kagurangnan, “Ako an nagkasala. Ako an nakaginibo nin maraot. Ano an naginibo kan mga tawong ini? Ako asin an sakong pamilya an padusahan mo.”

¹⁸ Kan aldaw man sanang iyan nagduman si Gad ki David asin sinabihan, “Magtukad ka sa ginikan ni Arauna dangan maggibo ka nin altar para sa Kagurangnan.”

¹⁹ Kinuyog ni David an pagboot nin Kagurangnan siring sa sinabi ni Gad.

²⁰ Pagdungaw ni Arauna, nahiling niya an hade asin an saiyang mga opisyal na nagpapasiring saiya. Nagdapa siya sa daga sa atubangan ni David

²¹ dangan naghapot, “Mahal na Hade, tadaw ta nagdigdi ka?” Nagsimbag si David, “Sa pagbakal kan lugar na saimong pinaggiginikan tanganing magpatindog nin altar para sa Kagurangnan tanganing maontok an peste.”

²² Nagsimbag si Arauna, “Mahal na Hade, saimo na sana iyan asin magdolot ka sa Kagurangnan kan anoman na pagmarahayon mo. Uya an mga baka para sa atang asin uya man an mga sakal saka an mga tabla bilang igatong.”

²³ Itinao ini gabos ni Arauna sa hade asin nagsabi, “Akoon logod nin Kagurangnan na saimong Dios an saimong dolot.”

²⁴ Alagad nagsimbag an hade, “Babakalon ko an saimong ginikan sa tamang halaga. Dai ako madolot sa Kagurangnan na sakong Dios nin atang na dai ko binayadan.” Kaya binakal ni David sa halagang singkwentang pedaso na kwartang plata an lugar na pinaggiginikan asin an mga baka.

²⁵ Dangan nagpatindog si David nin altar para sa Kagurangnan asin nagdolot nin mga tinutong na atang saka mga dolot para sa katoninongan. Sinimbag nin Kagurangnan an saiyang pamibi, asin naontok an peste sa Israel.