2 Samuel 2 - Marahay na Bareta Biblia

Nagin Hade si David sa Juda

¹ Pakatapos kaini, naghapot si David sa Kagurangnan, “Dapat daw na magtukad ako pasiring sa arin man kan mga banwa nin Juda?” Nagsimbag an Kagurangnan, “Magtukad ka.” Naghapot si David, “Arin na banwa?” “Sa Hebron,” an simbag nin Kagurangnan.

² Kaya nagduman si David sa Hebron kaiba an duwa niyang agom: si Ahinoam na taga Jezreel, asin si Abigail, an balo ni Nabal, na taga Carmelo.

³ Ipinag-iba man niya an saiyang mga tawohan saka an pamilya ninda, asin nag-erok sinda sa mga banwa sa palibot kan Hebron.

⁴ Dangan nagduman sa Hebron an kalalakihan kan Juda asin linahidan ninda si David bilang hade nin Juda. Kan maaraman ni David na ilinubong kan mga taga Jabes sa Gilead an bangkay ni Saul,

⁵ nagpadara siya nin mga lalaki duman tanganing magsabi, “Bendisyonan logod kamo nin Kagurangnan huli kan pagpahiling nindo kan saindong kaimbodan sa saindong hade sa paglubong saiya.

⁶ Kaherakan logod kamo nin Kagurangnan asin magin maimbod logod siya saindo. Gigibohan ko kamo nin marahay huli kan saindong ginibo.

⁷ Magmakosog asin magmaisog kamo; gadan na si Saul na saindong hade, asin linahidan na ako kan mga taga Juda bilang saindang hade.”

Nagin Hade si Isboset sa Israel

⁸ Si Abner na aking lalaki ni Ner asin pamayo kan hukbo ni Saul, nagdulag sa ibong kan Jordan pasiring sa Mahanaim, kaiba an aki ni Saul na si Isboset;

⁹ duman ginibo siya ni Abner bilang hade kan mga teritoryo nin Gilead, Asher, Jezreel, Efraim, Benjamin, asin kan bilog na Israel.

¹⁰ Kwarentang taon na an edad ni Isboset kan siya magin hade nin Israel, asin naghade siya sa laog nin duwang taon. Alagad si David an minidbid na hade kan tribu ni Juda,

¹¹ asin naghade siya sa Juda duman sa Hebron sa laog nin pito may kabangang taon.

Naglaban an Israel saka an Juda

¹² Hale sa Mahanaim, nagduman sa Gibeon si Abner asin an mga opisyal ni Isboset.

¹³ Sinabat sinda ni Joab, na an ina iyo si Zeruias, kaiba an ibang mga opisyal ni David. Sa tangke nin Gibeon, nagtukaw an sarong grupo sa sarong ibong kan tangke, mantang an saro nagtukaw sa ibong.

¹⁴ Nagsabi si Abner ki Joab, “Paglabanon ta an nagkapirang mga hoben.” “Sige,” an simbag ni Joab.

¹⁵ Kaya nagtindog an doseng kalalakihan hale sa grupo ni Isboset saka sa tribu ni Benjamin, asin nagtindog man an doseng kalalakihan hale sa grupo ni David.

¹⁶ Kinapotan kan lambang saro an payo kan saiyang kalaban dangan binuno sa hirog, kaya nagadan gabos an beynte y kwatrong nagralaban. Huli kaini, an lugar na idto sa Gibeon inapod “Oma nin mga Espada.”

¹⁷ Dangan nagkaigwa nin makuring ralaban, asin nadaog kan mga tawohan ni David si Abner saka an mga Israelita.

¹⁸ Idtoon duman an tolong aking lalaki ni Zeruias na si Joab, Abisai, asin Asahel. Ining si Asahel marikas magdalagan siring sa sarong lalaw na usa.

¹⁹ Mayong saru-salingoy na linamag niya si Abner.

²⁰ Nagsalingoy si Abner asin nagsabi, “Ika si Asahel?” “Iyo,” an simbag niya.

²¹ Nagsabi si Abner, “Mag-ontok ka sa paglamag sako! An saro kan mga soldados an lamagon mo asin kuaha an saiyang rogaring.” Alagad dai nag-ontok sa paglamag saiya si Asahel.

²² Sa ikaduwang beses sinabihan siya ni Abner, “Mag-ontok ka sa paglamag sako! Tadaw ta pinipirit mo akong gadanon ka? Paano ko maatubang an saimong tugang na si Joab?”

²³ Alagad dai nag-ontok si Asahel; kaya patalikod na isinaksak ni Abner an saiyang garod sa tulak ni Asahel, kaya luminagbas sa saiyang likod an garod. Gadan na buminagsak si Asahel sa daga, asin uminontok an gabos na nakaabot sa lugar na nagadanan ni Asahel.

²⁴ Alagad linamag ni Joab saka ni Abisai si Abner, asin kan nagsosolnop na an aldaw, nakaabot sinda sa bulod nin Amma, na nasa sirangan kan Gia sa dalan na pasiring sa kalangtadan nin Gibeon.

²⁵ Nagtiripon giraray an kalalakihan kan tribu ni Benjamin sa pangenot ni Abner, asin nag-ontok sinda sa itaas nin sarong bulod.

²⁶ Dangan inapod ni Abner si Joab, “Kaipuhan daw na ipadagos ta an ralaban? Dai mo aram na magigin mapait an kataposan kaini? Sagkod nuarin bago mo paontokon an saimong mga tawohan sa paglamag sa saindang mga tugang?”

²⁷ Nagsimbag si Joab, “Isinusumpa ko sa buhay na Dios, na kun dai ka nag-apod, ipapadagos kan sakong mga tawohan an paglamag saindo sagkod sa aga.”

²⁸ Dangan pinatanog ni Joab an trompeta bilang tanda para sa saiyang mga tawohan na ontokon na an paglamag sa mga Israelita; kaya naontok an ralaban.

²⁹ Kan bangging idto, naglakaw si Abner asin an saiyang mga tawohan sa Kapantayan nin Jordan; binalyo ninda an Salog nin Jordan, asin pakatapos na maglakaw sinda bilog na banggi sagkod odto, nakabalik sinda sa Mahanaim.

³⁰ Kan ontokon ni Joab an paglamag ki Abner, tinipon niya an gabos niyang tawohan asin naaraman niyang nawawara an dyes y nuebe sainda pwera ki Asahel.

³¹ Alagad an mga tawohan ni David nakagadan nin tres syentos sesentang tawohan ni Abner na hale sa tribu ni Benjamin.

³² Dinara ni Joab asin kan saiyang mga tawohan an bangkay ni Asahel dangan ilinubong sa lulubngan kan saiyang ama duman sa Betlehem. Dangan bilog na banggi sindang naglakaw asin pagkaaga, nakaabot sinda sa Hebron.