2 Samuel 19 - Marahay na Bareta Biblia

Inanggotan ni Joab si David

¹ Nabaretaan ni Joab na naghihibi asin nagmomondo si Hadeng David para ki Absalom.

² Kaya para sa gabos na soldados ni David, nagin kamondoan an kapangganahan kan aldaw na idto, huli ta nadangog nindang ipinagmomondo kan hade an pagkagadan kan saiyang aking lalaki.

³ Nagbalik sa syudad an mga soldados na mayong girong, na garo mga soldados na nasosopog huli ta nagdurulag sinda sa gera.

⁴ Tinahoban kan hade an saiyang lalawogon asin nagkurahaw nin makosog, “O aki ko! Absalom aki ko! Absalom aki ko!”

⁵ Naglaog si Joab sa harong kan hade asin sinabihan siya, “Sinupog mo ngunyan na aldaw an saimong mga tawohan—mga lalaking nagligtas kan saimong buhay, kan buhay kan saimong mga aking lalaki asin babae saka kan buhay kan saimong mga agom sagkod mga kasaroan,

⁶ huli ta ikinakaongis mo an mga namomoot saimo asin namomotan mo an mga naoongis saimo! Ipinahiling mo ngunyan na aldaw na mayo nin halaga saimo an mga opisyal asin mga tawohan mo. Nahiling kong magigin maogma ka kun buhay ngunyan na aldaw si Absalom asin nagkagaradan kami.

⁷ Kaya lakaw asin rangaha an saimong mga tawohan, huli ta isinusumpa ko sa ngaran kan buhay na Kagurangnan na kun dai mo iyan gibohon, mayo nin saro man sa mga tawohan mo an maiba saimo sa aga; iyan an pinakamaraot na mangyayari saimo sa bilog mong buhay.”

⁸ Dangan nagbuhat an hade, asin nagtukaw sa saiyang tukawan sa may trangkahan kan syudad. Nabaretaan kan saiyang mga tawohan na yaon siya duman, kaya nagtiripon sinda sa palibot kan hade. Mantang nangyayari ini, nagdurulag an gabos na Israelita, an lambang saro pasiring sa saiyang harong.

Nagbalik si David sa Jerusalem

⁹ Nagpoon na mag-iriwal an mga Israelita sa bilog na daga. Nagpasinarabihan sinda, “Ilinigtas kita ni Hadeng David sa satong mga kaiwal. Siya an nagligtas sato sa mga Filisteo, alagad nagdulag siya ki Absalom asin naghale.

¹⁰ Linahidan ta si Absalom bilang satong hade, alagad nagadan siya sa ralaban. Tadaw ta mayo kamong sinasabi manongod sa pagpabalik sa hade?”

¹¹ Nakaabot an sinabing ini kan mga Israelita ki Hadeng David. Kaya sinugo niya an mga padi na si Zadok asin si Abiatar tanganing hapoton an kamagurangan nin Juda, “Tano ta kamo an mapahuri sa pagpabalik kan hade sa saiyang palasyo?

¹² Mga kadugo ko kamo, sadiri kong laman asin dugo; tano ta mapahuri kamo sa pagpabalik sako?”

¹³ Tinugon man ni David an mga padi na sabihan si Amasa, “Kadugo taka. Poon ngunyan, ika an ibubugtak kong pamayo kan hukbo embes na si Joab. Gadanon logod ako nin Dios kun dai ko iyan gibohon!”

¹⁴ An mga tataramon na ini ni David an nakabirik kan mga puso kan gabos na taga Juda; kaya nagpatogon sinda sa hade na magbalik na kaiba an gabos niyang opisyal.

¹⁵ Sa pagbalik kan hade, sinabat siya sa Salog nin Jordan kan mga taga Juda, na nagduman sa Gilgal tanganing ibahan siya sa pagbalyo sa salog.

¹⁶ Siring man, si Simei na aking lalaki ni Gera, an Benjaminita na taga Bahurim, naghidali pasiring sa Jordan tanganing sabaton si Hadeng David.

¹⁷ Kaiba niya an sangribong kalalakihan na gikan sa tribu ni Benjamin. Nagduman man si Ziba, an oripon kan pamilya ni Saul, kaiba an kinse niyang aking lalaki saka beynteng sorogoon; naenot sinda sa hade sa pag-abot sa Jordan.

¹⁸ Nagbalyo sinda sa salog tanganing ibahan an grupo kan hade sa pagbalyo niya asin sa paggibo kan anoman na boot ipagibo kan hade. Kan nag-aandam na an hade sa pagbalyo sa salog, nagdapa si Simei sa atubangan ni David

Naherakan ni David si Simei

¹⁹ asin nagsabi, “Mahal na Hade, patawada ako kan ginibo kong sala saimo kan aldaw na maghale ka sa Jerusalem. Dai mo na logod idto giromdomon.

²⁰ Mahal na Hade aram ko na nagkasala ako, kun kaya ako an naenot na nagdigdi hale sa mga tribu sa amihan tanganing sabaton taka ngunyan.”

²¹ Nagsabi si Abisai na aking lalaki ni Zeruias, “Dapat gadanon si Simei huli ta minaldisyon niya an linahidan nin Kagurangnan bilang hade.”

²² Alagad nagsabi si David ki Abisai asin sa tugang kaining si Joab, “Siisay an naghagad saindo nin hatol? Kamo an matao sako nin problema? Ako na an hade sa Israel ngunyan, asin mayong magagadan na Israelita ngunyan na aldaw.”

²³ Sinabihan kan hade si Simei, “Isinusumpa ko na dai ka gagadanon.”

Naherakan ni David si Mefiboset

²⁴ Naglugsot si Mefiboset na makoapo ni Saul tanganing sabaton an hade. Dai niya hinugasan an saiyang bitis, ni pinutolan an saiyang barabas o linabahan an saiyang gubing magpoon kan maghale an hade sa Jerusalem sagkod na magbalik ini na mapanggana.

²⁵ Pag-abot ni Mefiboset hale sa Jerusalem sa pagsabat sa hade, sinabihan siya kan hade, “Tano ta dai ka nag-iba sako, Mefiboset?”

²⁶ Nagsimbag siya, “Mahal na hade, ika nakakaaram na pilay ako. Sinabihan ko an sakong sorogoon na kamaderohan an asno tanganing makasakay ako asin makaiba saimo, alagad dinaya niya ako.

²⁷ Kaputikan an ibinareta niya saimo manongod sako, alagad arog ka sa anghel nin Dios, kaya giboha an pinaghohona mong marahay.

²⁸ An gabos na kaayon sa pamilya nin sakong ama maninigo kutanang gadanon kan mahal na hade, alagad ipinag-iba mo ako sa mga nagkakarakan sa saimong lamesa. Mayo akong deretso na maghagad pa nin ibang karahayan sa mahal na Hade.”

²⁹ Nagsimbag an hade, “Dai mo na kaipuhan dagdagan pa an saimong sinabi. Nagdesisyon na ako na bangaon nindo ni Ziba an pagsadiri ni Saul.”

³⁰ Nagsabi si Mefiboset sa hade, “Tawan na sana gabos ki Ziba. Tama na para sako na nakapuling ligtas an mahal na Hade.”

Naherakan ni David si Barzillai

³¹ Hale sa Rogelim, nagduman man si Barzillai na taga Gilead, tanganing ibahan an hade sa pagbalyo sa Jordan.

³² Gurang na siya nin marahay, otsentang taon na an edad. Mayaman siya asin dati niyang tinatawan nin pagkakan an hade mantang nag-eerok ini sa Mahanaim.

³³ Sinabihan siya kan Hade, “Mag-iba ka sako sa Jerusalem, asin aatamanon taka.”

³⁴ Alagad nagsimbag si Barzillai, “Madali na akong magadan. Tano ta maduman pa ako kaiba mo sa Jerusalem?

³⁵ Otsentang taon na ako, asin mayo na akong nawiwilihan. Dai ko na nananamitan an sakong kinakakan o iniinom; dai ko na nadadangog an mga tingog nin mga paraawit. Magigin pagabat sana ako sa mahal na Hade.

³⁶ Dai ako maninigong mag-ako kan siring na balos. Kaya maiba sana ako saimo sagkod sa ibong kan Jordan.

³⁷ Dangan tugotan mo ako na makapuli sa sakong harong asin magadan harani sa lulubngan nin sakong mga magurang. Uya si Kimham, an aki kong lalaki, na maglilingkod saimo; siya an ipag-iba mo asin giboha saiya an pinaghohona mong marahay.”

³⁸ Nagsimbag an hade, “Ipag-iiba ko siya asin gigibohon ko saiya an anoman na boot mo. Gigibohon ko man saimo an anoman na mawoton mo.”

³⁹ Dangan nagbalyo si David asin an gabos niyang tawohan sa Jordan. Hinadokan niya si Barzillai asin benendisyonan; dangan nagpuli na si Barzillai.

Nagpasuhay an Juda asin an Israel manongod sa Hade

⁴⁰ Kan makabalyo na an hade kaiba an gabos na kalalakihan nin Juda asin kabanga kan kalalakihan nin Israel, nagdagos siya sa Gilgal kaiba si Kimham.

⁴¹ Dangan nagduruman sa hade an gabos na Israelita asin nagsabi, “Mahal na Hade, tadaw ta naghohona an mga taga Juda na pwede kang kuahon samo dangan ibahan ninda, an saimong pamilya asin an mga tawohan mo sa pagbalyo sa Jordan?”

⁴² Nagsimbag an mga taga Juda, “Ginibo mi ini huli ta kadugo mi an hade. Tadaw ta naanggot kamo? Nagkakan daw kami nin anoman na ginastosan kan hade? Nag-ako daw kami nin regalo hale saiya?”

⁴³ Nagsimbag an mga Israelita, “Sampolong beses kadakul ki sa saindo an samong kahirasan ki Hadeng David, maski kadugo nindo siya. Tadaw ta nagpapalangkaw kamo? Bakong kami an naenot na magsabi na pabalikon an hade?” Alagad mas maringis an mga tataramon kan mga taga Juda ki sa mga taga Israel.