2 Samuel 17 - Marahay na Bareta Biblia

Nadaya ni Husai si Absalom

¹ Dai nahaloy, sinabihan ni Ahitofel si Absalom, “Tugote akong magpili nin dose mil na kalalakihan, dangan ngunyan na banggi lalamagon ko si David.

² Sasalakayon ko siya mantang pagal siya asin maluya an boot. Matatakot siya asin madurulag an saiyang mga tawohan. Gagadanon ko sana an hade

³ dangan dadarahon ko saimo an gabos niyang tawohan, siring kan sarong agom na babae na minapuli sa saiyang agom. Boot mong gadanon an saro man sanang tawo; asin magigin ligtas an bilog na banwaan.”

⁴ Naoyonan ni Absalom asin kan gabos na lider kan mga Israelita an hatol ni Ahitofel.

⁵ Nagsabi si Absalom, “Apoda man nindo si Husai na Arkita, asin dangogon ta an saiyang sasabihon.”

⁶ Pag-abot ni Husai, sinabihan siya ni Absalom, “Siring kaini an hatol ni Ahitofel; ano sa paghona mo, sunodon ta? Kun dai, sabihi kami kun ano an dapat na gibohon.”

⁷ Nagsimbag si Husai, “Bakong marahay an itinaong hatol saindo ngunyan ni Ahitofel.

⁸ Ika an nakakaaram na an saimong ama asin an saiyang mga tawohan mga maiisog na lalaki; siring sinda kaisog sa sarong ina nin mga oso na hinabonan nin saiyang mga ogbon duman sa oma. Paralaban an saimong ama asin dai nakikisumaro sa saiyang mga tawohan pagkabanggi.

⁹ Tibaad sa oras na ini, nagtatago siya sa sarong lungib o sa ibang lugar. Kun salakayon ni David an saimong mga tawohan, an siisay man na makadangog kaini masabi na nagkadaraog an saimong mga tawohan.

¹⁰ Kaya maski an pinakamaisog na mga lalaki na an puso siring sa puso nin sarong leon, matatakot huli ta an bilog na Israel nakakaaram na sarong dakulang soldados an saimong ama asin matitibay na mga lalaki an saiyang mga tawohan.

¹¹ An hatol ko iyo na tiponon mo an gabos na Israelita magpoon sa sarong poro kan daga sagkod sa ibong na poro, siring sa mga baybay sa dagat, dangan ika mismo an mangenot sainda sa pakilaban.

¹² Makukua ta si David saen man na lugar, dangan bago niya maaraman kun ano an nangyayari, masasalakay ta na siya. Mayo nin siisay man sa sainda an matatadang buhay.

¹³ Kun magsibog siya sa sarong syudad, madara an satong mga tawohan nin mga pisi, dangan satong guguyodon an syudad pasiring sa kapantayan sagkod na mayo ni sarong gapo na matada sa dating namumugtakan kaiyan.”

¹⁴ Nagsabi si Absalom asin an gabos na Israelita, “Mas marahay an hatol ni Husai ki sa hatol ni Ahitofel.” Pinangyari nin Kagurangnan na dai pagsunodon an marahay na hatol ni Ahitofel, tanganing kapahamakan an mag-abot ki Absalom.

Pinatanidan si David asin Nakadulag

¹⁵ Dangan isinabi ni Husai sa mga padi na si Zadok asin Abiatar an hatol na itinao ni Ahitofel ki Absalom saka sa mga lider na Israelita; isinabi man niya an hatol na itinao niya.

¹⁶ Pakatapos, nagsabi si Husai, “Hidali kamong magpadara nin mensahe ki David na dai siya magpaaga sa sinasangahan kan salog sa kalangtadan, kundi magbalyo tolos siya, tanganing siya asin an saiyang mga tawohan dai madakop saka magadan.”

¹⁷ Naghahalat si Jonatan na aking lalaki ni Abiatar asin si Ahimaaz na aking lalaki ni Zadok sa burabod sa Enrogel, huli ta habo nindang mahiling sa laog kan syudad. Sarong sorogoon na babae an danay na minaduman asin minaosip sainda kan nangyayari, dangan sinda an minaduman ki Hadeng David saka minaosip saiya.

¹⁸ Alagad sarong aldaw, nahiling sinda nin sarong aking lalaki asin inosipan kaini si Absalom; kaya naghale tolos sinda dangan nakaabot sa harong nin sarong lalaki sa Bahurim, na may bubon sa natad. Naglusad sinda sa bubon.

¹⁹ An agom kan lalaki nagkua nin pantahob, biniklad sa ngoso kan bubon, dangan winarakan nin trigo tanganing mayong mahiling na anoman.

²⁰ Nag-abot sa harong an mga opisyal ni Absalom saka hinapot an babae, “Haen na si Ahimaaz asin si Jonatan?” Nagsimbag an babae, “Nagbalyo sinda sa salog.” Hinanap sinda kan mga lalaki alagad dai nakua, kaya nagbalik sinda sa Jerusalem.

²¹ Pakahale kan mga lalaki, nagluwas sa bubon si Ahimaaz saka si Jonatan, dangan nagduman ki Hadeng David asin binaretaan kan dapit sa plano ni Ahitofel laban saiya. Nagsabi sinda, “Maghidali ka asin magbalyo sa salog.”

²² Kaya nagbalyo sa Jordan si David asin an saiyang mga tawohan; kan nagbabanaag na an aldaw, nakabalyo na sinda gabos.

²³ Kan mahiling ni Ahitofel na dai sinunod an saiyang hatol, kinamaderohan niya an saiyang asno dangan nagpuli sa sadiring syudad. Kan maasikaso na niya an gabos na dapat gibohon, naghugot siya. Ilinubong siya sa lulubngan kan saiyang pamilya.

²⁴ Nakaabot na si David sa banwa nin Mahanaim kan makabalyo sa Jordan si Absalom asin an mga Israelita. (

²⁵ Si Amasa an ibinugtak ni Absalom na pamayo kan hukbo embes na si Joab. Si Amasa, aking lalaki ni Jeter na Ismaelita; an saiyang ina iyo si Abigail na aki ni Nahas asin tugang ni Zeruias na ina ni Joab.)

²⁶ Nagkampo si Absalom asin an saiyang mga tawohan sa daga nin Gilead.

²⁷ Pag-abot ni David sa Mahanaim, sinabat siya ni Sobi na aking lalaki ni Nahas na taga Rabba sa Ammon, ni Makir, na aking lalaki ni Ammiel na taga Lodebar, asin ni Barzillai, na taga Rogelim sa Gilead.

^28-29 Nagdara sinda nin mga palanggana, koron, higdaan, asin manlaen-laen na pagkakan para ki David saka sa saiyang mga tawohan. Aram ninda na magugutom, mapapaha, asin mapapagal sa kalangtadan si David saka an saiyang mga tawohan.