2 Samuel 15 - Marahay na Bareta Biblia

Nagplano nin Pagrebelde si Absalom

¹ Pakatapos kaini, kuminua si Absalom nin sarong karwahe asin mga kabayo para saiya, saka singkwentang kalalakihan na masabay saiya sa paglakaw.

² Danay siyang amay na minabangon dangan minatindog sa gilid kan dalan palaog sa syudad. An siisay man na minaagi duman na igwa nin kaso na boot darahon sa hade tanganing hukoman, inaapod ni Absalom saka hinahapot kun saen siya hale. Pakasabi ki Absalom kun sa anong tribu siya gikan,

³ minasabi si Absalom, “Hilinga, marahay asin matanos an saimong sinasabi; alagad mayong itinalaan na tawo an hade tanganing dangogon an kaso mo.”

⁴ Dangan minasabi pa si Absalom, “Gurano an pagmawot kong ako nagin sarong hukom sa daga! Dangan madolok sako an siisay man na igwa nin kaso o dahelan asin tatawan ko siya nin katanosan.”

⁵ Kun minadolok ki Absalom an lalaki tanganing magtao saiya nin galang, inuunat ni Absalom an saiyang kamot, kinakapotan an lalaki dangan hinahadokan.

⁶ Siring an ginigibo ni Absalom sa lambang Israelita na minaduman sa hade tanganing hukoman; kaya nabihag niya an puso kan mga Israelita.

⁷ Pakalihis nin apat na taon, sinabihan ni Absalom si Hadeng David, “Tugote akong magduman sa Hebron tanganing otobon an sarong panuga na ginibo ko sa Kagurangnan.

⁸ Kan nag-eerok pa ako sa Gesur sa Siria, nanuga ako sa Kagurangnan na kun ibalik na niya ako sa Jerusalem sasambahon ko siya sa Hebron.”

⁹ “Lakaw sa katoninongan,” an sabi kan hade. Kaya nagduman si Absalom sa Hebron.

¹⁰ Alagad nagpadara siya nin mga sugo sa gabos na tribu nin Israel tanganing magsabing, “Kun madangog nindo an tanog nin mga trompeta, magkurahaw kamong, ‘Hade na si Absalom sa Hebron!’”

¹¹ Nag-iba ki Absalom an dos syentos na taga Jerusalem na saiyang inalok; dai ninda aram an manongod sa plano ni Absalom asin nag-iba sinda sa marahay na boot.

¹² Mantang nagdodolot si Absalom kan atang, ipinaapod niya an saro kan mga parahatol ni Hadeng David—si Ahitofel kan banwa nin Gilo. Orog na nagkosog an plano laban sa hade; orog man na nagdakul an mga parasunod ni Absalom.

Naghale si David sa Jerusalem

¹³ Nagbareta an sarong sugo ki David, “Nagsurumpa na an mga Israelita na masunod ki Absalom.”

¹⁴ Kaya sinabihan ni David an gabos niyang opisyal na kaiba niya sa Jerusalem, “Kaipuhan makahale tolos kita kun boot tang makadulag ki Absalom! Magmadali kamo ta tibaad maabotan niya kita saka madaog dangan garadanon an gabos na nasa syudad!”

¹⁵ Nagsimbag sinda, “Andam kami na gibohon an anoman na sabihon mo.”

¹⁶ Kaya naghale an hade kaiba an saiyang pamilya asin mga opisyal, pwera kan sampolong kasaroan ni David na iwinalat niya tanganing atamanon an palasyo.

¹⁷ Naglakaw an hade saka an gabos niyang tawohan; nag-ontok sinda sa huring harong.

¹⁸ Nagtindog sa kataed ni David an gabos niyang opisyal mantang an saiyang mga bantay nag-agi sa saiyang atubang. Nag-agi man sa saiyang atubang an seis syentos na soldados na nagsunod saiya hale sa Gat.

¹⁹ Nagsabi an hade ki Ittai na saindang pamayo, “Tadaw ta maiba man kamo samo? Balik kamo asin ibahan nindo an bagong hade; huli ta saro kang dayuhan, sarong nakikihimanwa, harayo sa sadiri mong daga.

²⁰ Halipot pa sanang panahon an pag-erok mo digdi, kaya tadaw ta ipag-iba taka sa paglagalag sa kaibahan ko mantang dai ko aram kun mapasaen ako? Balik kamo dangan ibahan an mga kahimanwa mo—asin ipahiling logod saimo nin Kagurangnan an danay na pagkamoot asin kaimbodan.”

²¹ Alagad nagsimbag si Ittai, “Mahal na hade, isinusumpa ko saimo sa ngaran kan buhay na Kagurangnan na danay akong maiba saimo minsan saen, sa buhay man o sa kagadanan.”

²² Sinabihan ni David si Ittai, “Kun siring, agi na!” Kaya nag-agi sa atubang ni David si Ittai kaiba an gabos niyang tawohan asin an saindang mga pamilya.

²³ Naghibi nin makosog an mga tawo kan maghale an mga parasunod ni David. Binalyo kan hade an sapa nin Kidron, kasunod kan saiyang mga tawohan dangan iriba sindang nagpasiring sa kalangtadan.

²⁴ Yaon duman an padi na si Zadok, kaiba an gabos na Levita; dara ninda an Kaban nin Tipan. Ibinugtak ngona ninda ini sa daga sagkod na makahale an gabos na tawo sa syudad. Yaon man duman an padi na si Abiatar.

²⁵ Dangan sinabihan kan hade si Zadok, “Ibalik nindo an Kaban nin Tipan sa syudad. Kun nawiwilihan ako nin Kagurangnan, tutugotan niya akong makabalik tanganing mahiling ko iyan giraray asin an lugar na namumugtakan kaiyan.

²⁶ Alagad kun dai niya ako nawiwilihan, uya ako asin gibohon logod niya sako an pagmarahayon niya.”

²⁷ Sinabihan pa kan hade si Zadok, “Hilinga, magbalik ka sa syudad sa katoninongan; ipag-iba mo an saimong aking lalaki na si Ahimaaz asin si Jonatan na aking lalaki ni Abiatar.

²⁸ Duman ako maghahalat sa may sinasangahan kan salog sa kalangtadan sagkod na makaabot sako an bareta hale saimo.”

²⁹ Kaya dinara sa Jerusalem ni Zadok asin ni Abiatar an Kaban nin Tipan dangan duman sinda nag-ontok.

³⁰ Alagad naghihibi na nagtukad si David sa Bukid nin mga Oliba; nakabitis sana siya asin may tahob an payo bilang tanda nin pagmondo. An gabos na nagsunod saiya nagtahob man kan saindang payo asin naghibi.

³¹ Kan maosipan si David na uminiba si Ahitofel sa pagrebelde ni Absalom, namibi siya, “O Kagurangnan, namimibi ako saimo na mamugtak logod sa kalolongan an mga hatol ni Ahitofel!”

³² Kan nakaabot si David sa alitoktok kan bulod, saen sinasamba an Dios, sinabat siya kan pinapaniwalaan niyang katood na si Husai na Arkita, na gisi an gubing asin may alpog an payo.

³³ Sinabihan siya ni David, “Magigin pagabat ka pa sako kun mag-iba ka,

³⁴ alagad matatabangan mo ako kun magbalik ka sa syudad. Sabihan mo si Absalom, ‘Magigin sorogoon mo ako, mahal na hade, siring na nagin sorogoon ako kan saimong ama.’ Sa siring na paagi, madadaog mo an hatol ni Ahitofel.

³⁵ Yaon man duman an mga padi na si Zadok asin si Abiatar, kaya kun ano man an saimong madangog sa laog kan palasyo, isabi mo sainda.

³⁶ Kaiba ninda an saindang mga aking lalaki na si Ahimaaz asin Jonatan; sa paagi ninda ikakapadara mo sako an saimong nadangog.”

³⁷ Kaya nagbalik sa syudad an katood ni David na si Husai kan naglalaog si Absalom sa Jerusalem.