2 Samuel 13 - Marahay na Bareta Biblia

Si Amnon asin si Tamar

¹ Si Absalom na aking lalaki ni David igwa nin magayon na tugang na daraga, na an ngaran Tamar. Si Amnon na saro pang aking lalaki ni David namoot ki Tamar.

² Namoot nin marahay si Amnon ki Tamar mala ta naghelang siya, huli ta garo masakit na mapasaiya si Tamar; saro siyang birhen, kaya dai siya tinutugotan na makihampang sa mga lalaki.

³ Alagad igwa si Amnon nin sarong katood na an ngaran Jonadab, an aking lalaki ni Samma na tugang ni David; tuso nin marahay si Jonadab.

⁴ Sinabihan ni Jonadab si Amnon, “Aki nin hade, tano ta aroaldaw kang mamondo? Sabihan sako an saimong problema.” Nagsimbag si Amnon, “Namomoot ako ki Tamar, an tugang na babae kan tugang kong lalaki sa ama na si Absalom.”

⁵ Sinabihan siya ni Jonadab, “Humigda ka asin magsagin-sagin na may helang. Pagdigdi kan saimong ama sa pagkomusta saimo, sabihan mong, ‘Tugoteng magdigdi an tugang kong si Tamar tanganing tawan ako nin tinapay asin pakakanon ako. Boot kong siya an magluto kan pagkakan sa atubang ko dangan siya na mismo an magpakakan sako.’”

⁶ Kaya naghigda si Amnon asin nagsagin-sagin na may helang. Kan nagduman si Hadeng David tanganing komustahon siya, nagsabi si Amnon, “Tugoteng magdigdi an tugang kong si Tamar asin magluto nin nagkapirang tinapay sa atubang ko, saka magpakakan sako.”

⁷ Kaya pinatogonan ni David si Tamar sa palasyo: “Magduman ka sa harong kan tugang mong si Amnon asin iluto mo siya nin pagkakan.”

⁸ Nagduman si Tamar asin naabotan niyang naghihigda si Amnon. Nagkua siya nin minasang arina, inandam dangan naggibo nin tinapay sa atubang ni Amnon.

⁹ Kinua ni Tamar an kawali dangan an laog kaini ibinugtak niya sa atubang ni Amnon, alagad habong magkakan si Amnon. Nagsabi siya, “Pahalea digdi an gabos.” Kaya nagharale sinda.

¹⁰ Dangan sinabihan ni Amnon si Tamar, “Daraha digdi sa sakong higdaan an mga tinapay asin pakakana ako.” Kinua ni Tamar an mga tinapay na saiyang linuto dangan dinara ki Amnon.

¹¹ Alagad kan darahon idto ni Tamar sa harani ni Amnon, pinugol siya ni Amnon dangan sinabihan, “Madya, magdorog kita, tugang ko!”

¹² Nagsimbag si Tamar, “Dai mo ako pagpiriton, tugang ko huli ta an bagay na ini dai ginigibo sa Israel; dai ka maggibo nin siring na karatan.

¹³ Paano ko aatubangon an kasosopgan? Asin ika magigin siring sa saro kan mga lolong nin Israel. Kaya nakikimaherak ako, makiolay ka sa hade, huli ta dai niya ako ipapangalad saimo.”

¹⁴ Alagad dai dinangog ni Amnon si Tamar asin huli ta mas makosog siya ki Tamar, nadaog niya ini asin nalupigan.

¹⁵ Dangan napano si Amnon nin makuring pagkaongis ki Tamar; pagkaongis na orog pa ki sa pagkamoot na namatean niya para saiya. Kinurahawan niya si Tamar, “Hale digdi!”

¹⁶ Alagad nagsimbag si Tamar, “Dai, tugang ko; huli ta mas orog pang maraot na krimen an pagpahale mo sako ki sa ginibo mo na sako!” Alagad dai siya dinangog ni Amnon;

¹⁷ inapod niya an saiyang sorogoon asin sinabihan, “Halea sa sakong atubang an babaeng ini! Tapokan siya sa luwas dangan baratan mo an pintoan!”

¹⁸ Ilinuwas kan sorogoon si Tamar dangan binaratan an pinto. Sulot ni Tamar an sarong halabang gubing na may manggas, gubing na isinusulot nin mga birhen na prinsesa kaidto.

¹⁹ Nagbugtak siya nin abo sa saiyang payo, ginisi an saiyang halabang gubing, dangan naglakaw na naghihibi mantang tinatahoban kan mga kamot an saiyang lalawogon.

²⁰ Kan mahiling siya kan tugang niyang si Absalom, hinapot siya, “Kinulogan ka ni Amnon? Tugang ko, dai mo dapat ipagkulog nin boot an bagay na ini; tugang mo siya sa ama, kaya dai ka na mag-osip sa kiisay pa man.” Kaya nag-erok si Tamar sa harong ni Absalom na saiyang tugang, namomondo asin napupungaw.

²¹ Kan naaraman ni Hadeng David an nangyari, naanggot siya nin makuri.

²² Naongis nin marahay si Absalom ki Amnon huli kan paglupigi niya ki Tamar, kaya dai na niya kinakaolay si Amnon.

An Pagbalos ni Absalom

²³ Pakalihis nin duwang taon, kan pinapaguntingan ni Absalom an saiyang mga karnero sa Baal-hazor, harani sa banwa nin Efraim, an gabos na aking lalaki kan hade inalok ni Absalom na magduman.

²⁴ Nagduman si Absalom ki Hadeng David asin nagsabi, “Mahal na hade, pinapaguntingan ko an sakong mga karnero. Pwede ka daw magduman asin an saimong mga opisyal?”

²⁵ Nagsimbag an hade, “Dai aki ko; magagabatan ka nin marahay kun magduman kami gabos.” Nagpirit si Absalom, alagad dai nagtugot an hade dangan sinabihan si Absalom na maghale na.

²⁶ Alagad nagsabi si Absalom, “Kun siring, pwede mo daw tugotan na magduman an tugang kong si Amnon?” “Tadaw ta kaipuhan na mag-iba si Amnon saimo?” an hapot kan hade.

²⁷ Alagad pinirit ni Absalom an hade sagkod na tinugotan ni David si Amnon asin an gabos pa niyang aking lalaki. Nag-andam si Absalom nin sarong bangkete na maninigo para sa sarong hade

²⁸ dangan pinagbotan an saiyang mga sorogoon: “Tandaan nindo kun burat na si Amnon; dangan kun sabihan ko kamong, ‘Gadana nindo si Amnon,’ gadanon nindo siya. Dai kamo matakot; ako an bahala. Magmaisog kamo asin dai magduwa-duwa!”

²⁹ Sinunod kan mga sorogoon an pagboot ni Absalom; ginadan ninda si Amnon. Dangan nagtirindog an gabos na aking lalaki kan hade, nagrulunad sa saindang mga mula asin nagdurulag.

³⁰ Mantang nasa dalan pa sinda, nakaabot an bareta ki David na: “Ginadan ni Absalom an gabos mong aking lalaki; mayo nin nakaligtas maski saro man sa sainda!”

³¹ Nagtindog an hade, asin ginisi an saiyang gubing dangan naghigda sa daga; ginirisi man kan mga sorogoon na kairiba niya an saindang gubing.

³² Alagad si Jonadab, na aking lalaki kan tugang ni David na si Samma nagsabi, “Mahal na hade, dai ka maghona na ginadan ninda an gabos mong aking lalaki. Si Amnon man sana an nagadan. Inisip na ini ni Absalom poon pa kan lupigan ni Amnon an saiyang tugang na si Tamar.

³³ Kaya dai ka magtubod sa bareta na gadan na an gabos mong aking lalaki; si Amnon man sana an nagadan.”

³⁴ Alagad nagdulag si Absalom. Dangan nahiling kan bantay na soldados an sarong dakulang grupo nin mga tawo na nagdadangadang paibaba sa bulod sa dalan hale sa Horonaim. Nagduman siya sa hade asin ibinareta an saiyang nahiling.

³⁵ Sinabihan ni Jonadab si David, “Iyo na iyan an saimong mga aking lalaki, siring sa sinabi ko na maabot sinda.”

³⁶ Pakasabi kaini ni Jonadab, nagralaog an mga aking lalaki ni David; nagpoon sindang maghiribi; nagtangis man si David asin an saiyang mga opisyal.

^37-38 Nagdulag si Absalom asin nagduman sa hade nin Gesur, ki Talmai na aking lalaki ni Amihud; nag-erok siya duman sa laog nin tolong taon. Ipinagmondo ni David si Amnon sa halawig na panahon;

³⁹ alagad kan matapos na an saiyang pagmondo sa pagkagadan ni Amnon, nagin labi-labi an pagkapungaw niya na mahiling an aki niyang lalaki na si Absalom.