2 Samuel 12 - Marahay na Bareta Biblia

An Mensahe ni Natan asin an Pagsolsol ni David

¹ Pinaduman nin Kagurangnan an propetang si Natan ki David. Nagduman ini asin nagsabi, “Igwa nin duwang lalaki na nag-eerok sa parehong banwa; mayaman an saro asin an saro dukha.

² Dakul nin marahay an mga baka saka mga kordero kan mayaman,

³ mantang an dukha igwa sana nin sarong babaeng kordero, na binakal niya. Inataman kan dukha an kordero, asin nagdakula ini sa laog kan saiyang harong kaiba kan saiyang mga aki. Pinapakakan niya ini kan saiyang kakanon, pinapainom hale sa saiyang kalis, asin pinapahigda sa saiyang daghan. An kordero garong aking babae para sa saiya.

⁴ Sarong aldaw, may nag-abot na bisita sa harong kan mayaman, alagad habong ipabuno kaini an saro kan saiyang mga hayop tanganing lutoon para sa bisita; embes kaiyan, kinua niya an karnero kan dukha asin iyo idto an linuto para sa saiyang bisita.”

⁵ Naanggot nin marahay si David sa mayaman asin nagsabi, “Isinusumpa ko sa ngaran kan buhay na Kagurangnan na dapat magadan an lalaking naggibo kaini!

⁶ Huli sa karatan na ginibo niya asin huli ta dai siya naherak, kaipuhan na bayadan niya nin apat na beses an halaga kan saiyang kinua.”

⁷ Nagsabi si Natan ki David, “Ika an lalaking idto. Ini an itinaram nin Kagurangnan na Dios nin Israel: ‘Linahidan taka bilang hade nin Israel asin ilinigtas sa kamot ni Saul.

⁸ Itinao ko saimo an saiyang kahadean saka mga agom; ginibo takang hade nin Israel sagkod Juda, asin kun kulang pa an bagay na ini, tatawan taka pa nin doble kan inako mo na.

⁹ Tadaw ta sinuhay mo an sakong mga pagboot? Tadaw ta ginibo mo an karatan na ini? Ipinagadan mo sa ralaban si Urias na Heteo; pinabayaan mo siyang magadan kan mga Ammonita dangan kinua mo an saiyang agom!

¹⁰ Kaya magpoon ngunyan, magagadan sa dahas an nagkapira sa saimong kapagarakian sa lambang henerasyon, huli ta tinalikodan mo ako asin saimong kinua an agom ni Urias na Heteo.

¹¹ Isinusumpa kong papalatawon ko an sarong tawo hale sa saimong pamilya tanganing darahan ka nin karatan. Sa atubang mo, kukuahon ko an saimong mga agom dangan itatao ko sinda sa ibang lalaki. Sa liwanag nin aldaw, dodorogan ninda an saimong mga agom.

¹² Nagkasala ka sa hilom alagad papangyarihon ko ini sa liwanag nin aldaw, nganing mahiling kan bilog na Israel.”

¹³ Nagsabi si David, “Nagkasala ako sa Kagurangnan.” “Pinapatawad ka nin Kagurangnan; dai ka magagadan,” an simbag ni Natan.

¹⁴ “Alagad nin huli ta sa gaweng ini ipinahiling mo an pagkaongis sa Kagurangnan, magagadan an saimong aki.”

¹⁵ Dangan nagpuli si Natan sa saiyang harong. Pinahelang nin Kagurangnan an aki ni Batsheba ki David.

Nagadan an Aking Lalaki ni David

¹⁶ Kaya namibi si David sa Dios para sa saiyang aki. Nag-ayuno si David, asin pagkabanggi naglaog siya sa saiyang kwarto dangan pinalihis an bangging nakahigda sa salog.

¹⁷ Nagduman ki David an mga opisyal kan palasyo tanganing pabangonon siya, alagad nagsayuma siya asin habo man niyang maghampang sainda sa pagkakan.

¹⁸ Pakalihis nin sarong semana, nagadan an aki; natakot na magsabi ki David an saiyang mga opisyal. Olay ninda, “Kan buhay pa an aki, nakiolay kita ki David alagad dai niya kita dinangog; paano an gigibohon tang pagsabi saiya na gadan na an aki? Tibaad kun ano pa an saiyang gibohon sa saiyang sadiri!”

¹⁹ Kan mahiling sinda ni David na naghihiring-hingan, nagduda siya na gadan na an aki. Kaya hinapot niya sinda, “Gadan na an aki?” “Iyo,” an simbag ninda.

²⁰ Dangan nagtindog si David, nagkarigos, nagsukray saka nagsangle kan saiyang gubing. Pakatapos, naglaog siya sa Tabernakulo asin nagsamba. Pagbalik niya sa palasyo, naghagad siya nin pagkakan dangan nagkakan.

²¹ Sinabihan siya kan saiyang mga opisyal, “Dai mi nasasabotan an saimong ginibo. Kan buhay pa an aki, nagtangis ka para saiya asin habo mong magkakan; alagad kan magadan siya, nagtindog ka asin nagkakan!”

²² Nagsimbag si David, “Totoo. Nag-ayuno ako asin nagtangis mantang buhay pa an aki. Naghona akong maheherak sako an Kagurangnan asin dai niya tutugotan na magadan an aki.

²³ Alagad ngunyan na gadan na an aki, tano ta maayuno pa ako? Mabubuhay ko daw an aki? Maduman ako sa namumugtakan niya sa maabot na panahon, alagad dai na siya pwedeng magbalik pa sako.”

Namundag si Solomon

²⁴ Dangan rinanga ni David an saiyang agom na si Batsheba. Dinorogan niya si Batsheba, asin nag-aki ini nin lalaki na inapod ni David nin Solomon. Namotan nin Kagurangnan an aki

²⁵ asin sinugo an propetang si Natan na ngaranan an aki nin Jedidias, huli ta namotan nin Kagurangnan an aki.

Sinakop ni David an Rabba

²⁶ Pinadagos ni Joab an pakilaban sa Rabba, an pangenot na syudad nin Ammon, asin madali na niyang masakop ini.

²⁷ Nagpadara siya nin mga sugo ki David tanganing magsabi, “Sinalakay ko an Rabba asin nasakop ko na an hinahalean kan tubig kaini.

²⁸ Tipona an iba mo pang mga tawohan asin salakaya an syudad. Ika na mismo an magsakop kaiyan. Habo kong mapasako an onra sa pagsakop kaiyan.”

²⁹ Kaya tiniripon ni David an saiyang hukbo, nagduman sa Rabba, sinalakay ini asin sinakop.

³⁰ An hade kan mga Ammonita igwa nin bulawan na korona na an timbang minaabot sa treynta y singko kilos. Igwa ini nin tampok na mahalagang bato, na kinua ni David asin ibinugtak sa saiyang korona. Kinua man niya an dakulang halaga nin sinamsam hale sa syudad.

³¹ Pinatrabaho niya an mga tawong taga Rabba na gamit an mga lagadi, mga piko, saka mga patok, asin pinirit sindang maggibo nin mga ladrilyo; iyo man an ginibo ni David sa mga tawo kan ibang mga banwa nin Ammon. Dangan nagbalik sa Jerusalem si David saka an saiyang mga tawohan.