2 Samuel 11 - Marahay na Bareta Biblia

Si David asin si Batsheba

¹ Pakatapos kan tig-lipot na iyo an panahon na ipinagduduman sa gera kan mga hade. Sa panahon na iyan, pinalakaw ni David si Joab kaiba an saiyang mga opisyal asin an hukbo nin Israel; dinaog ninda an mga Ammonita asin pinalibotan an syudad nin Rabba. Alagad nagpawalat si David sa Jerusalem.

² Sarong aldaw, kan madali nang magbanggi, nagbangon si David hale sa saiyang pagkatorog asin nagduman sa atop kan palasyo. Mantang naglalakaw-lakaw siya sa atop, natanaw niya an sarong babaeng nangangarigos. Magayon nin marahay an babae,

³ kaya nagpadara siya nin sarong sugo tanganing aramon kun siisay siya. Naaraman niyang Batsheba an ngaran kan babae, aki ni Eliam asin agom ni Urias na sarong Heteo.

⁴ Nagpadara si David nin mga sugo asin ipinakua si Batsheba. (Nakatapos pa sana ini kan bulanan na seremonya nin paglinig sa sadiri.) Dinorogan ni David si Batsheba asin pakatapos, nagpuli na si Batsheba sa saiyang harong.

⁵ Nagbados si Batsheba, kaya ipinaaram niya ini ki David.

⁶ Huli kaini, nagpadara si David nin mensahe ki Joab: “Padigdiha sako si Urias na Heteo.” Kaya pinaduman ni Joab si Urias ki David.

⁷ Pag-abot ni Urias, hinapot siya ni David, “Komusta an kamugtakan ni Joab asin kan hukbo? Ano ngunyan an nangyayari sa ralaban?”

⁸ Dangan sinabihan ni David si Urias, “Magpuli ka asin magpahingalo ngona.” Naghale si Urias, asin sarong regalo an ipinadara saiya ni David sa saiyang harong.

⁹ Alagad dai nagpuli si Urias; nagkatorog siya sa trangkahan kan palasyo sa kaibahan kan mga bantay kan hade.

¹⁰ Kan maaraman ini ni David, hinapot niya si Urias, “Minabalik ka pa sana pakalihis nin haloy na panahon, tadaw ta dai ka nagpuli sa saimong harong?”

¹¹ Nagsimbag si Urias, “Nasa gera an kalalakihan nin Israel saka Juda, asin an Kaban nin Tipan yaon sa kaibahan ninda; an sakong pamayo na si Joab, siring man an saiyang mga opisyal nagkakampo sa kahiwasan. Mapuli daw ako sa sakong harong tanganing magkakan, mag-inom, asin magdorog sa sakong agom? Sa ngaran kan gabos na banal, isinusumpa ko na dai ko iyan magigibo!”

¹² Nagsabi si David, “Kun siring, digdi ka ngona ngunyan na aldaw. Sa aga pababalikon taka sa ralaban.” Kaya nag-ontok si Urias sa Jerusalem kan aldaw na idto asin kan masunod pang aldaw.

¹³ Inalok ni David si Urias na magkakan sa kaibahan niya dangan binurat niya. Alagad kan bangging idto, dai man giraray nagpuli sa saiyang harong si Urias; nagkatorog siya sa saiyang higdaan sa kwarto kan mga bantay sa palasyo.

¹⁴ Pagkaaga, nagsurat si David ki Joab asin ipinadara ki Urias.

¹⁵ An sabi niya sa surat: “Bugtakan si Urias sa enotan, sa lugar na makuri an ralaban, dangan dulagan mo siya asin pabayaan na magadan.”

¹⁶ Kaya mantang sinasalakay ni Joab an syudad, ipinadara niya si Urias sa sarong lugar na aram niyang makosog an mga kaiwal.

¹⁷ Nagluwas an mga kaiwal sa syudad asin linabanan an mga tawohan ni Joab; nagkagaradan an ibang mga opisyal ni David. Nagadan man si Urias na Heteo.

¹⁸ Dangan nagpadara si Joab nin bareta ki David manongod sa ralaban,

¹⁹ asin tinukdoan niya an sugo, “Kun pakabareta mo sa hade manongod sa ralaban,

²⁰ maanggot siya asin maghapot saimong, ‘Tadaw ta nagrani kamo sa syudad tanganing makilaban? Dai nindo inisip na papanaon ninda kamo hale sa mga kudal?

²¹ Dai nindo nagiromdoman kun paano nagadan si Abimelec na aking lalaki ni Gideon? Bakong sarong babae duman sa Tebez an naghulog saiya nin gilingan hale sa itaas kan kudal, kaya nagadan siya? Kun siring, tadaw ta nagrani kamo sa kudal?’ Magsabi ka, ‘Nagadan man an saimong opisyal na si Urias.’”

²² Kaya naglakaw an sugo asin ibinareta ki David an gabos na ipinapasabi saiya ni Joab.

²³ Nagsabi an sugo ki David, “Orog na makosog sa samo an mga kaiwal asin nagruluwas sinda sa syudad tanganing labanan kami sa kahiwasan, alagad napasibog mi sinda sagkod sa mga trangkahan kan syudad.

²⁴ Dangan pinarana ninda kami hale sa ibabaw kan kudal, asin nagadan an nagkapira sa mga opisyal kan hade; kaibahan sa mga nagadan an opisyal mong si Urias.”

²⁵ Sinabihan ni David an sinugo, “Siring kaini an sabihon mo ki Joab: ‘Dai mo dapat ikapurisaw an bagay na ini, huli ta dai mo naaaraman kun siisay an magagadan sa ralaban; dagdagan mo an saimong hukbo sa pagsalakay sa syudad asin sakopa iyan.’ Pakosoga an saiyang boot.”

²⁶ Kan maaraman ni Batsheba na gadan na an saiyang agom, nagtangis siya.

²⁷ Kan matapos an panahon nin pagmondo, kinua ni David si Batsheba asin dinara sa palasyo niya; nagin agom niya si Batsheba dangan nangaki si Batsheba nin sarong lalaki. Alagad dai nawilihan nin Kagurangnan an ginibo ni David.