2 Mga Hade 9 - Marahay na Bareta Biblia

Linahidan si Jehu bilang Hade nin Israel

¹ Inapod ni Eliseo an saro kan mga hoben na propeta asin sinabihan, “Mag-andam ka asin magduman ka sa Ramot-gilead. Darahon mo ining sarong dulay na lana nin oliba.

² Pag-abot mo duman hanapon mo si Jehu, na aking lalaki ni Jehosafat saka makoapo ni Nimsi. Ipag-iba mo siya sa sarong tagong kwarto tanganing masiblag siya sa mga kaibahan niya.

³ Dangan iula mo an lanang ini sa saiyang payo, saka sabihan mo, ‘Ini an sinasabi nin Kagurangnan: Linahidan taka bilang hade nin Israel.’ Pakatapos hidali kang maghale duman.”

⁴ Kaya nagduman sa Ramot-gilead an hoben na propeta.

⁵ Inabotan niyang nag-oorolay an mga pamayo kan hukbo. Nagsabi siya, “Igwa ako nin mensahe para saimo.” Naghapot si Jehu, “Siisay samo an dinadarahan mo kan mensahe?” “Ika,” an simbag kan propeta.

⁶ Nagtindog si Jehu asin nagduman sindang duwa sa laog kan harong; dangan inula kan hoben na propeta an lana sa payo ni Jehu. Sinabihan niya si Jehu, “Ini an sinasabi nin Kagurangnan, Dios nin Israel: ‘Linalahidan taka bilang hade kan banwaan nin Israel.

⁷ Tutunawon mo an pamilya kan kagurangnan mong hade, na aki ni Ahab tanganing mapadusahan ko si Jezebel sa panggadan kan sakong mga propeta asin kan gabos kong sorogoon.

⁸ Mapupuho an bilog na pamilya ni Ahab; gagadanon ko an lambang lalaki sa saiyang pamilya, gurang man o aki.

⁹ Gigibohon ko sa saiya an ginibo ko sa pamilya ni Jeroboam na aking lalaki ni Nebat saka sa pamilya ni Baasa na aking lalaki ni Ahias.

¹⁰ Si Jezebel kakakanon kan mga ayam sa daga kan Jezreel asin mayo nin malubong saiya.’” Pakasabi kaini, nagluwas siya sa kwarto asin nagdulag.

¹¹ Kan magbalik si Jehu sa kapwa niya mga opisyal, naghapot sinda, “Ano an nangyari? Ano an kaipuhan saimo kan lolong na idto?” “Naaaraman nindo kun ano an kaipuhan niya,” an simbag ni Jehu.

¹² Nagsimbag sinda, “Dai mi aram. Sabihan samo an itinaram niya!” “Sinabihan niya ako na ini an sinasabi nin Kagurangnan: ‘Linalahidan taka bilang hade nin Israel,’” an simbag ni Jehu.

¹³ Kaya hinuba kan mga opisyal an saindang alikboy asin biniklad sa ibabaw kan hagdan tanganing tindogan ni Jehu. Pinatanog ninda an mga trompeta asin nagkurahaw, “Si Jehu iyo an hade!”

Ginadan si Hadeng Joram nin Israel

^14-15 Dangan nagplano si Jehu kan saiyang gigibohon ki Hadeng Joram mantang ini yaon sa Jezreel. Nagpapabolong kaidto si Joram kan mga lugad na nakua niya sa pakilaban sa Ramot-gilead laban ki Hadeng Hazael nin Siria. Sinabihan ni Jehu an kapwa niya opisyal, “Kun kaapil ko kamo, mangnohon nanggad nindo na dai nin makaluwas sa Ramot-gilead tanganing magpatanid sa Jezreel.”

¹⁶ Dangan naglunad siya sa saiyang karwahe asin nagpasiring sa Jezreel, huli ta nagpapabolong duman si Joram; idtoon man duman si Hadeng Ahazias nin Juda sa pagdalaw ki Joram.

¹⁷ Nakatindog sa bantayan nin Jezreel an sarong bantay asin nahiling niya an nagdadangadang na grupo ni Jehu. “Nahihiling ko an sarong grupo nin mga lalaki,” an sabi kan bantay. Nagsabi si Joram, “Ipasabat mo sinda sa sarong nangangabayo asin ipahapot mo kun katoninongan an katuyohan ninda.”

¹⁸ Kaya sarong nangangabayo an nagsabat ki Jehu. Nagsabi siya, “Ipinapahapot kan hade kun katoninongan an katuyohan mo.” Nagsimbag si Jehu, “Ano an pakilabot mo? Sumunod ka sako.” Nagsabi an bantay, “Nakaabot na an sugo sa grupo, alagad dai na siya nagbalik.”

¹⁹ Saro pang nangangabayo an pinasabat ki Jehu. Nagsabi siya, “Ipinapahapot kan hade kun katoninongan an katuyohan mo.” Giraray nagsimbag si Jehu, “Ano an pakilabot mo? Sumunod ka sako.”

²⁰ Nagsabi giraray an bantay, “Nakaabot na sainda an sugo alagad dai na siya nagbalik. An lider kan grupo arog ki Jehu karikas magpadalagan nin karwahe.”

²¹ “Andamon mo an sakong karwahe,” an pagboot ni Hadeng Joram. Inandam ninda an saiyang karwahe. Dangan nagluwas sa pagsabat ki Jehu si Hadeng Joram saka si Hadeng Ahazias, na an lambang saro nakalunad sa saiyang karwahe. Nasabatan ninda si Jehu sa oma na sadiri kaidto ni Nabot.

²² Hinapot ni Joram si Jehu, “Katoninongan an katuyohan mo, Jehu?” Nagsimbag si Jehu, “Magkakaigwa daw nin katoninongan mantang pinapadanay kan ina mong si Jezebel an saiyang marigsok na pagsamba sa mga dios-dios asin pangkukulam?”

²³ “Kapasaluiban ini, Ahazias!” an kurahaw ni Joram. Ibinalik ni Joram an saiyang karwahe asin duminulag.

²⁴ Alagad pinana siya ni Jehu. Tinamaan siya sa likod asin luminagbas sa saiyang puso an bosog. Gadan na natumba si Joram sa laog kan saiyang karwahe.

²⁵ Sinabihan ni Jehu an saiyang katabang na si Bidkar, “Buhaton mo an saiyang bangkay asin itapok mo sa oma ni Nabot. Giromdoma an tataramon nin Kagurangnan laban ki Ahab na saiyang ama kan magkasabay kitang nangabayo kasunod niya:

²⁶ ‘Nahiling ko kasuodma an paggadana ki Nabot asin sa saiyang mga aking lalaki. Nanunuga ako na papadusahan taka digdi sa lugar na ini.’ Kaya buhaton mo an saiyang bangkay asin itapok mo sa daga ni Nabot, tanganing maotob an tataramon nin Kagurangnan.”

Ginadan si Hadeng Ahazias nin Juda

²⁷ Kan mahiling ini ni Hadeng Ahazias, duminulag siya pasiring sa Bet-hagan, alagad linamag siya ni Jehu. “Panaa man nindo siya!” an pagboot ni Jehu sa saiyang mga tawohan; asin pinana ninda siya sa laog kan saiyang karwahe duman sa tukadon nin Gur, harani sa banwa nin Ibleam. Alagad nakadulag si Ahazias pasiring sa Megiddo asin duman siya nagadan.

²⁸ An saiyang bangkay ilinunad kan saiyang mga opisyal sa sarong karwahe asin dinara sa Jerusalem dangan ilinubong sa syudad ni David, sa lulubngan nin mga hade.

²⁹ Si Ahazias nagin hade nin Juda kan ikaonseng taon kan paghahade ni Joram sa Israel.

Ginadan si Jezebel

³⁰ Nagduman si Jehu sa Jezreel. Kan mabaretaan ini ni Jezebel, kinoloran niya an palibot kan saiyang mga mata, pinakarahay an buhok asin nagdungaw sa bintana.

³¹ Mantang palaog si Jehu sa trangkahan, nagsabi si Jezebel, “Katoninongan daw an katuyohan mo, Zimri, ika na paragadan kan saimong kagurangnan?”

³² Nagtingkalag si Jehu asin nagkurahaw, “Siisay saindo an kakampi ko?” Nagdungaw an duwa o tolong opisyal sa palasyo,

³³ asin sinabihan sinda ni Jehu, “Ihulog nindo an babaeng iyan!” Ihinulog ninda si Jezebel, asin an saiyang dugo tuminuprik sa kudal sagkod sa mga kabayo. Pinadalagan ni Jehu an saiyang mga kabayo asin karwahe sa ibabaw kan bangkay ni Jezebel,

³⁴ naglaog sa palasyo, dangan nagkakan. Pakatapos, nagsabi siya, “Kuaha nindo an minaldisyon na babaeng idto asin ilubong huli ta aki siya nin hade.”

³⁵ Alagad kan magruluwas an mga lalaking malubong ki Jezebel, an nakua sana ninda iyo an bungo asin an mga tolang kan mga kamot saka mga bitis ni Jezebel.

³⁶ Kan ibareta ninda ini ki Jehu, nagsabi siya, “Iyo ini an tataramon nin Kagurangnan na itinaram niya sa paagi ni Elias na saiyang sorogoon: ‘Kakakanon kan mga ayam sa teritoryo nin Jezreel an hawak ni Jezebel.

³⁷ An saiyang bangkay mawawarak duman na garo odo, tanganing mayo nin makamidbid saiya.’”