2 Mga Hade 7 - Marahay na Bareta Biblia

¹ Nagsimbag si Eliseo, “Hinanyoga ining sinasabi nin Kagurangnan: ‘Sa aga, sa siring kaining oras, makakabakal ka sa Samaria nin tolong kilo kan pinakamarahay na trigo o anom na kilo nin sebada sa halagang sarong pedaso nin plata.’”

² An kapitan kan mga bantay kan hade nagsabi ki Eliseo, “Imposible iyan; maski bukasan pa nin Kagurangnan an mga bintana nin langit!” “Mahihiling mo ini, alagad dai ka makakanamit kan pagkakan,” an simbag ni Eliseo.

Naghale an Hukbo nin Siria

³ Apat na lalaking may nakakatakot na helang sa kublit an nasa luwas kan mga trangkahan kan Samaria. Nagsinarabihan sinda, “Tano ta magparaturukaw sana kita digdi sagkod na kita magadan?

⁴ Mayo nin halaga kun maglaog kita sa syudad, huli ta magagadan man kita sa gutom duman; alagad kun magparaturukaw kita digdi, magagadan man giraray kita. Kaya magduman kita sa kampo kan mga taga Siria. An pinakamaraot na mangyayari sato iyo na pwedeng gadanon ninda kita, alagad tibaad iligtas ninda an satong buhay.”

⁵ Kaya kan madorodiklom na, nagpasiring sinda sa kampo kan mga taga Siria; alagad pag-abot ninda duman, mayo sindang inabotan na tawo.

⁶ Huli ta ginibo nin Kagurangnan na madangog kan mga Siro an ribok nin dakulang hukbo, nin mga kabayo asin karwahe. Naghona an mga Siro na tinandanan kan hade nin Israel an mga hadeng Heteo saka Egipcio tanganing salakayon sinda.

⁷ Kaya kan bangging idto, an mga taga Siria nagdurulag tanganing iligtas an saindang buhay. Binayaan ninda an saindang mga tolda, mga kabayo, asin mga asno. Binayaan ninda an bilog na kampo.

⁸ Kan mag-abot an apat na lalaki sa gilid kan kampo, naglaog sinda sa sarong tolda asin nagkakan saka nag-inom. Kan basog na sinda, sinamsam ninda an plata, bulawan saka mga gubing na nagkahiriling duman. Naghale sinda asin tinago an mga sinamsam. Pakatapos, nagbalik sinda sa ibang tolda, dangan ginibo man digdi an ginibo ninda sa enot.

⁹ Alagad nagsinarabihan sinda, “Bakong tama an ginigibo ta. Igwa kita nin marahay na bareta asin dai ta dapat pagtagoon. Kun halaton ta pang mag-aga bago ibareta ini, mapapadusahan kita. Kaya magduman na kita asin iosip ta ini sa mga opisyal kan hade!”

¹⁰ Kaya binayaan ninda an kampo kan Siria, nagbalik sa Samaria asin nagkurahaw sa mga bantay kan mga trangkahan, “Nagduman kami sa kampo kan mga Siro asin mayo kaming inabotan na tawo duman o nadangog na tingog. Mayo kaming nahiling kundi an mga kabayo asin mga asno na nagkakagarakod, asin an mga tolda siring kan bayaan ini.”

¹¹ Ibinareta ini kan mga bantay kan trangkahan, asin inosip sa palasyo.

¹² Nagbangon an hade kan bangging idto asin sinabihan an saiyang mga opisyal, “Sasabihon ko saindo kun ano an plano kan mga Siro! Aram ninda na nagugutom kita, kaya binayaan ninda an saindang kampo tanganing magtago sa kahiwasan. Iniisip ninda na maruluwas kita sa syudad. Kaya dadakopon ninda kita nin buhay, dangan sasakopon ninda an syudad.”

¹³ Nagsabi an saro kan mga opisyal, “Nakatalaan nang magadan an mga tawo digdi sa syudad, arog kan mga nagadan na. Kaya magsugo kita nin nagkapirang lalaki kaiba an limang natatada pang mga kabayo tanganing maaraman ta kun ano an nangyari.”

¹⁴ Kaya nagpili sinda nin nagkapirang lalaki, na lunad sa duwang karwaheng sinugo kan hade, sa pagsiyasat sa kampo kan mga Siro.

¹⁵ Naghale sinda asin nakaabot sagkod sa Jordan; nahiling ninda na an dalan pano nin mga gubing asin kagamitan na itinarapok kan mga Siro sa saindang kasibotan. Nagbalik an mga sinugo asin inosip ini sa hade.

¹⁶ Dangan nagruluwas an mga tawo asin sinamsaman an kampo kan Siria. Kaya sosog sa sinabi nin Kagurangnan, an tolong kilo kan pinakamarahay na trigo o anom na kilo kan sebada ipinabakal sa halagang sarong pedaso nin plata.

¹⁷ Nangyari na ibinugtak kaidto kan hade an trangkahan kan syudad sa pamamahala kan kapitan; tinirimaktimakan siya kan mga tawo duman sa trangkahan asin nagadan, siring kan sinabi ni Eliseo kan an hade magduman saiya,

¹⁸ “Sa aga, sa siring kaining oras makakabakal ka sa Samaria nin tolong kilo kan pinakamarahay na trigo o anom na kilo nin sebada sa halagang sarong pedaso nin plata.”

¹⁹ Sinimbag ini kan kapitan nin, “Imposible iyan; maski bukasan pa nin Kagurangnan an mga bintana nin langit!” Nagsabi si Eliseo, “Mahihiling mo ini, alagad dai ka makakanamit kan pagkakan.”

²⁰ Siring an nangyari saiya, huli ta tinirimaktimakan siya kan mga tawo duman sa trangkahan asin nagadan siya.