2 Mga Hade 3 - Marahay na Bareta Biblia

Gera kan Israel saka Moab

¹ Kan ikadyes y otsong taon kan paghahade ni Jehosafat nin Juda, nagin hade nin Israel si Joram na aking lalaki ni Ahab, asin doseng taon siyang naghade sa Samaria.

² Nagkasala siya sa Kagurangnan, alagad bako siya arog karaot kan saiyang ama o kan ina niyang si Jezebel, huli ta hinale niya an harigi ni Baal na ginibo kan saiyang ama.

³ Alagad, siring ki Hadeng Jeroboam na aking lalaki ni Nebat, pinapagkasala niya an Israel asin habo niyang mag-ontok sa pagkakasala.

⁴ Si Mesa na hade nin Moab sarong paraataman nin mga karnero, asin taon-taon nagbubuhis siya sa hade nin Israel nin syen mil na kordero asin balukag nin syen mil na karnero.

⁵ Alagad kan magadan si Hadeng Ahab nin Israel, nagrebelde siya laban sa Israel.

⁶ Kaya naghale si Hadeng Joram sa Samaria asin tinipon an saiyang mga soldados.

⁷ Nagpadara siya nin tataramon ki Hadeng Jehosafat nin Juda: “Nagrebelde an hade nin Moab laban sako; maiba ka daw sako sa gera laban saiya?” Nagsimbag si Jehosafat, “Maiba ako, asin siring man an sakong mga soldados saka mga kabayo.

⁸ Arin na dalan an satong aagihan sa pagsalakay?” “Sa dalan kan kalangtadan nin Edom,” an simbag ni Joram.

⁹ Kaya nagluwas si Hadeng Joram kaiba an hade nin Juda saka an hade nin Edom. Pakalihis nin pitong aldaw na pagmartsa, naubosan sinda nin tubig; mayo na nin inomon an hukbo asin an mga hayop.

¹⁰ Dangan nagsabi an hade nin Israel, “Magagadan kita! Kitang tolo inapod nin Kagurangnan tanganing itao sa kamot kan hade nin Moab.”

¹¹ Naghapot si Hadeng Jehosafat, “Mayo digdi nin propeta na pwedeng makihumapot sa Kagurangnan para sato?” Sarong opisyal kan hukbo ni Hadeng Joram an nagsimbag, “Yaon digdi si Eliseo na aking lalaki ni Safat. Dati siyang katabang ni Elias.”

¹² “Tunay siyang propeta,” an sabi ni Hadeng Jehosafat. Kaya nagduman ki Eliseo an tolong hade.

¹³ Nagsabi si Eliseo sa hade nin Israel, “Ano an pakilabot ko saimo? Dumuman ka sa mga propeta kan saimong ama asin sa mga propeta kan saimong ina.” Nagsimbag si Joram, “Dai, an Kagurangnan an nag-apod samong tolo tanganing itao sa kamot kan hade nin Moab.”

¹⁴ Nagsimbag si Eliseo, “Minasumpa ako sa buhay na Kagurangnan nin mga hukbo na sakong pinaglilingkodan, na kun bakong huli sa paggalang ko ki Jehosafat na hade nin Juda, dai ako makikilabot saimo.

¹⁵ Ikua nindo ako nin sarong paratugtog.” Mantang nagtutugtog ini sa saiyang arpa, nag-abot ki Eliseo an kapangyarihan nin Kagurangnan.

¹⁶ Nagsabi si Eliseo, “Iyo ini an sinasabi nin Kagurangnan; ‘Magpakalot ka sa palibot kan mamarang sapa na ini.

¹⁷ Dai ka makakahiling nin doros o uran, alagad an sapang iyan mapapano nin tubig tanganing may mainom ka, an saimong mga baka asin an saimong mga hayop.’”

¹⁸ Nagpadagos si Eliseo, “Madali sana ining gibohon nin Kagurangnan; tatawan pa niya kamo nin kapangganahan laban sa mga Moabita.

¹⁹ Sasakopon nindo an lambang pinapusog asin piniling syudad ninda; puputolon nindo an lambang kahoy na nagbubunga, tatahoban an gabos na burabod, asin tatambakan nin mga gapo an lambang oma.”

²⁰ Pagkaaga, sa oras kan pagdolot kan pang-agang sakripisyo, nagbulos an tubig hale sa Edom asin natahoban an daga.

²¹ Kan madangog kan mga Moabita na nag-abot an mga hade tanganing makilaban sainda, inapodan ninda an mga lalaking pwede nang makilaban, magpoon sa matua sagkod sa ngohod, asin ipinadara sa pagdolonan.

²² Sunod na aga, kan magbangon an mga Moabita asin kan masirangan kan aldaw an tubig, nahiling ninda na mapula an tubig siring sa dugo.

²³ Nagsabi sinda, “Dugo iyan! Nagralaban an tolong hade asin naggaradanan sinda. Magduman kita asin samsaman ta an saindang kampo!”

²⁴ Alagad pag-abot ninda sa kampo, sinalakay sinda kan mga Israelita. Nagdulag an mga Moabita alagad dai nag-ontok an mga Israelita sa paglamag sainda; ginadan ninda an nagdudulag na mga Moabita,

²⁵ saka ginaba an mga syudad ninda. Tinapokan nin gapo kan lambang Israelita an lambang oma sagkod na matambonan ini. Tinahoban ninda an lambang burabod nin tubig asin pinutol an gabos na kahoy na nagbubunga. Rinaot ninda an Moab sagkod na an pangenot na syudad na sana nin Kir-hareset an natada. Pinalibotan ini saka sinalakay kan mga paralagpitaw na Israelita.

²⁶ Kan mahiling kan hade nin Moab na madadaog na siya sa gera, ipinag-iba niya an syete syentos na lalaking may mga armas na espada dangan hiningowa nindang makalusot sa mga kaiwal asin makadulag pasiring sa hade nin Siria. Alagad mayo sindang naginibo.

²⁷ Dangan kinua niya an matua niyang aking lalaki, na masalihid saiya bilang hade, saka idinolot bilang sakripisyo sa ibabaw kan kudal. Nagkatarakot an mga Israelita, kaya nagsiribog sinda dangan nagbaralik sa sadiri nindang daga.